1 Pashitwatira ashi, shisoweru sha Mlungu shimwiziriti Abramu mumawonu,

"Abramu nagutira.

Neni hanikuloleri gwenga.

Na hanikupanani lifupu likulu kwa kunjimira."

2 Kumbiti Abramu kalongiti, "Gwee Mtuwa Mlungu, hagumpanani shishi, uganu paendereya kulikala pota mwana na muhala gwa ulunda wangu hakaweri Eliezeri gwa Damasko? 3 Guloli! Gumpanana ndiri mwana, mumanda yakayiwukiti ukaya kwaneni hakaweri muhala gwangu."

4 Shakapanu shisoweru sha Mtuwa shimwiziriti Abramu, "Ayu hapeni kaweri muhala gwaku! Mwana gwaku gwa kumlera mweni ndo hakaweri muhala gwaku." 5 Mtuwa Mlungu kamjegiti Abramu kunja na kumgambira, "Guloli Kumpindi na guwalangi ntondu handa nakaka guweza kuwalanga." Kamgambiriti kayi, "Hangu ndo wiwuka waku ntambu hawaweri wavuwa."

6 Abramu kamjimiriti Mtuwa Mlungu na Mtuwa kamjimira Abramu kuwera muheri kulongolu kwakuyi.

7 Mtuwa Mlungu kamgambira Abramu vilaa, "Neni ndo Mtuwa yanikujegiti kulawa Uri, lushi lwa Wakalidayu, su nikupanani isi ayi iweri yaku."

8 Kumbiti Abramu kamgambira, "Gwee Mtuwa Mlungu, hanivimani hashi kuwera hayiweri yaneni isi ayi?"

9 Mtuwa Mlungu kamgambiriti, "Gunjegeri mwana gwa ng'ombi gwa mivinja mitatu na mwana gwa mbuzi gwa shidala gwa mivinja mitatu na kondolu gwa shipalu gwa mivinja mitatu na teteli na mwana gwa ng'unda." 10 Abramu kamjegera woseri awa, kahanja kila nkanyama vipandi viwili kavitula misitali miwili, pavituluwa uwega wa aku na aku kumbiti wampongu kawahanja ndiri vipandi viwili. 11 Shakapanu wampongu yawaliya vinofu vya nkanyama, watukiliti pavinofu, kumbiti Abramu kawawinga.

12 Mshenji paguweriti gwankuzyeta, Abramu kakolitwi na mpota, lyoga na luwindu totolu vimgubikira. 13 Shakapanu Mtuwa kamgambira Abramu, "Guvimani nakamu kuwera shiyiwuku shaku hashilikali gambira wahenga muisi yaiwera yawu ndiri, hawaweri wamanda na hawatabisiwi kwa shaka sha mivinja miya msheshi. 14 Kumbiti haniyitabisiyi isi yawaitendera umanda, na upeleru wakuyi shiyiwuku shaku hashilawi pashiwera na ulunda uvuwa. 15 Kumbiti gwenga hagulikali makaliru ga mivinja ivuwa na haguhowi kwa ponga. 16 Mushileri sha msheshi, shiyiwuku shaku hashiwuyi panu toziya ukondola wa Waamori hawenikamiliki kwazibiwa vinu."

17 Mshenji paguzyetiti na pakwinaliti, shiwiga shashitumiziya lyosi na limbamba lyaliyaka motu, vumu vipita pakati pa vipandi vya vinofu. 18 Lishaka ali, Mtuwa Mlungu katuliti lipatanu na Abramu pakatakula, "Shiyuwuku shaku Hanishipanani isi ayi, kulawa lushemba lukulu lwa Misri mpaka lushemba lulii lukulu lwa Eufrati, 19 isi ya Wakeni na Wakenizi na Wakadimoni. 20 Wahiti na Waperizi na Warefai, 21 Waamori na Wakanaani na Wagiligashi na Wayebusi."