1 Abrahamu kayugiti mdala yumonga, litawu lyakuyi Ketula. 2 Ketula kamwiwuliriti Zimrani na Yokishani na Medani na Midiani na Ishibaki na Shuwa. 3 Yokishani kamwiwuliriti Sheba na Dedani, shiyiwuku sha Dedani waweriti Waashuru na Waletushi na Walewumi. 4 Wana wa Midiani waweriti Efa na Eferi na Hanoki na Abida na Elidaa, woseri awa waweriti washiyiwuku Abrahamu kupitira Ketula.

5 Abrahamu kamuhalaziyiti Isaka, ulunda wakuyi woseri. 6 Kumbiti wana wa wadala wapusu, yomberi kawapananiti mafupu shaka pakaweriti kankali mkomu, shakapanu kawajegiti mulushi lwa gwagulawa mshenji, kutali na Isaka mwana gwakuyi.

7 Abrahamu kalikaliti mivinja miya na malongu saba na muhanu. 8 Abrahamu kahowiti pakawera na mashaka gavuwa gaherepa, katulwi pamuhera na wantu wakuyi yawamlongoleriti. 9 Isaka pamuhera na Ishimaeli, wana wa Abrahamu, wamsiriti tati gwawu mumpanga lya Makipela pakwegera na Mamire, mulirambu lyalihemiritwi kwa Efroni mwana gwa Zohari Muhiti, 10 lirambu Abrahamu lyakalihemeriti kwa Wahiti. Mlaa Abrahamu kafindirwa, pahala pakafintilitwi Sara mdala gwakuyi. 11 Pakahowiti kala Abrahamu, Mlungu kamtekeleriti Isaka mwana gwakuyi, yakalikariti pakwegera na linegu lya Beeri Lahai Roi.

12 Ashi ndo shiyiwuku sha Ishimaeli, ulii yakayiwukiti kwa Hajili muntu gwa Misri, yakaweriti yaya gwa Sara. 13 Aga ndo matawu ga mwiwuku gwa Ishimaeli, yagakantitwi kulawirana na uwiyuka wawu, Nebayoti shipanta njira, shakapanu kiwukiti Kedali na Adibeeli na Mibisamu, 14 Mishima na Duma na Masa 15 na Hadadi na Tema na Yetuli na Nafishi na Kedema. 16 Awa ndo wana wapalu wa Ishimaeli na aga ndo matawu ga wakolamlima wa nkolu lilongu na mbili ga wantu, kulikala kwawu na vijiji vyawu wamanikana kulawirana na matawu gawu. 17 Ishimaeli kaweriti na mivinja miya na malongu matatu na saba, pakahowiti kafindiritwi pahala pawasirituwi walongu wazewi wakuyi yawamlongoleriti. 18 Shiyiwuku sha Ishimaeli walikaliti pahala pakati pa Hawila na Shuri. Womberi wakaliti gwekagweka na shiyiwuku shimonga sha Abrahamu.

19 Aga ndo matawu ga wana wa Isaka mwana gwa Abrahamu. 20 Isaka pakweriti na mivinja malongu msheshi kamuyugiti Rebeka muhinga gwa Betueli, Mwalamu gwa Padan Aramu. Rebeka kaweriti dada gwakuyi Labani. 21 Toziya Rebeka kaweriti mpendi, su Isaka kamluwiti Mtuwa Mlungu. Mtuwa Mlungu kajimira kuluwa kwakuyi na Rebeka kapatiti yinda. 22 Yinda ayi iweriti ya mawila. Wana wawili awa wasinganiti weni kwa weni mumtima mwa Rebeka, na Rebeka kalongiti, "Handa vitwatira avi vya ntambu ayi, kwa shishi kulikala?" Su yomberi kagenditi kumkosiya Mtuwa Mlungu.

23 Mtuwa kamwankula,

"Kwana nkolu mbili mumtima mwaku,

na wantu wawili yawagenda kwiyuka kwa gwenga, hawalibaguli.

Yumu hakaweri na makakala kuliku yumonga,

mkulu hakamtenderi mpusu."

24 Mashaka gakuyi ga kwiyura pagasokiti, Rebeka kawiyura wana wapalu mawila. 25 Gwa kwanja kaweriti msheri, kana nvili nshimba yoseri, su kamshema Esawu. 26 Gwa pili kiwukiti pakawera kamkola Esawu shisukulumbi, su kampapananiti litawu Yakobu. Isaka kaweriti na mivinja miya na malongu na sita, shaka Esawu na Yakobu pakiwukiti.

27 Wana awa wakula Esawu kaweriti mgomiziya mgangamala gwa wankanyama, muntu gwa kuntundu, kumbiti Yakobu kaweriti muntu gwa jii yakalikaliti ukaya. 28 Su Isaka kamfiriti Esawu toziya kafiliti kuliya vyakagomiziyiti, kumbiti Rebeka kamfiriti Yakobu.

29 Lishaka limu, Yakobu pakaweriti kankutereka Dengu, Esawu kawuyiti ukaya kulawa kugomiziya wankanyama, yomberi kaweriti na njala nentu. 30 Su kamgambiriti Yakobu, "Shondi shondi gumpanani shiboga shisheri ashi ndiyi, toziya nana njala nentu." Ayi ndo mana wampananiti litawu Edomu, mana yakuwi nsheri. 31 Yakobu kamuwankula, "Kwanja gunshuwuzili vintu vyoseri vyagufiruwa kupata shipanta njira."

32 Esawu kalonga, "Guloli neni sambira howa, vintu vyoseri vyanfiruwa kupata shipanta njira, havinfai shishi?" 33 Yakobu kamgambira, "Gunapili huti." Su Esawu kamlapira na kashuuza kwa Yakobu, vintu vyoseri vyavifiruwa kupata shipanta njira.

34 Shakapnu Yakobu kampananiti Esawu libumunda na likolu lya dengu. Yomberi kaliyiti na kulanda shakapanu kagenditi zakuwi.

Su Esawu kazarawu vintu vyakuwi vyoseri vyakafiruwa kupata shipanta njira.