1 Shaka tunga pa vitwatira avi, mkulu gwa yawatenda lihengu muvirandu wamfalumi wa Misri pamuhera na mkulu gwa yawoshiya mabumunda, wamtendiriti vidoda mtuwa gwawu mfalumi gwa Misri. 2 Farao kawakalaliriti wakulu wakuyi wawili awa, mkulu gwa yawatenda lihengu muvirandu pamuhera na mkulu gwa yawoshiya mabumunda, 3 yomberi kawatatiliti muliboma lya mkulu gwa shipinga sha walolera mushibetubetu, pahala pakatatirituwi Yusufu. 4 Mkulu gwa shikosi sha walolera kamsyaguliti Yusufu kawatenderi na womberi wendereyiti kuwera mushibetubetu kwa shaka tunga.

5 Su pashiru pamu, mkulu gwa yawatenda lihengu muvirandu pamuhera na mkulu gwa yawoshiya mabumunda wa mfalumi, walotiti ndotu mushibetubetu, na kila yumu kalotiti ndotu na kila ndotu iwera na mana yakuwi. 6 Yusufu pakagenditi kwa womberi mandawira, kawawoniti kuwera waweriti na shashatika. 7 Su Yusufu kawakosiya wakulu walii wa Farao yawaweriti mushibetubetu pamuhera na yomberi mnumba mwa mtuwa gwawu, "Iwera hashi leru muwera na sheni zyazihinginika?"

8 Womberi wamwankula, "Twenga tulota na kwahera yakaweza kutakulira ndotu azi."

Yusufu kawagambira, "Hashi, kutakulira ndotu lihengu lya Mlungu ndiri? Su mung'ambiri shamlotiti."

9 Mkulu gwa yawatenda lihengu muvirandu wa mfalumi kamgambiriti Yusufu kulota kwakuyi, pakalonga, "Ndotu yaneni mona mzyabibu kulongolu kwaneni, 10 na guweriti na mintambi mitatu. Katepu yanjiti kutomola mahamba, uluwa wakuyi utomoliti mikunguwi na iwera zyabibu ziwula. 11 Mumawoku mwaneni muweriti na lwindi lwa mfalumi Farao, su nizitoliti zyabibu nizikamiriti mulwindi alu na nimpananiti Farao."

12 Shakapanu Yusufu kamgambiriti, "Matakuliru ga ndotu yaku ndo aku; mintambi mitatu ilii ndo mashaka matatu. 13 Pa mashaka matatu Farao hakakulaviyi kulawa mushibetubetu na kukuwuziya kayi mulihengu lyaku, haguwezi kayi kumpanana Farao lwindi mumawoku ntambu yagutenditi kwanja. 14 Kumbiti guholi neni, vitwatira paviherepa kwaku, gutakuli maheri kuusu neni kulongolu kwa Farao su ndawi mushibetubetu amu. 15 Toziya neni ntolosiwitwi kulawa muisi ya Waeburaniya, na panu ntenditi ndiri shoseri shashintenda ntatilwi mushibetubetu."

16 Mkulu ulii gwa yawoshiya mabumunda pakawoniti kuwera matakulilu galii gaherepa, su kamgambiriti Yusufu, "Vulaa neni ndotiti! Mundotu yaneni moniti nilitwikiti nseru ntatu za mabumunda. 17 Muluseru lwa pampindi, kuweriti na viboga vya ntambu ivuwa vyavihoshiwitwi kwajili ya Farao. Kumbiti wampongu waweriti wankuliya muluseru amu pamtuwi paneni." 18 Yusufu kamgambira, "Matakuliru ga ndotu ayi ndo ayi, nselu zilii ntatu ndo mashaka matatu. 19 Pamashaka matatu Farao hakakulaviyi kulawa mushibetubetu, hakagulikituli mtuwi gwaku na kukukong'ondera mumtera na wampongu hawailiyi nshimba yaku."

20 Palishaka lya tatu, lishaka lyaliweriti msambu gwa kwiyuka kwakuyi Farao, Farao kawatandiriti shiboga wantumintumi wakuyi woseri, kamlaviyiti mushibetubetu mkulu gwa yawawoshiya mabumunda pamuhera na mkulu yawatenda lihengu muvirandu, su kawatuliti kulongolu pakati pa wantumintumi wakuyi. 21 Shakapanu kamwuzilira ukulu wakuyi mkulu gwa yawatenda lihengu muvirandu kapati kumpanana lwindi Farao. 22 Kumbiti mkulu gwa yawoshiya mabumunda, kamlikituliti mtuwi na kamkong'onderiti mumtera gambira Yusufu ntambu yakazitakuliriti ndotu zawu. 23 Pamuhera na hangu, mkulu gwa yawatenda lihengu muvirandu kamuholiti ndiri Yusufu, kumbiti kamlyaluwiti nakamu.