1 Yakobu pakapatiti visoweru kuwera aku Misri kuweriti na viboga, kawagambiriti wana wakuyi, "Iwera hashi mwapanu mwankulilola hera? 2 Neni mpikanira kuwera Misri kwana viboga. Mseleri kugenda aku mwakahemeri shiboga natwiza kuhowa kwa njala."

3 Su walongu walii lilongu wa Yusufu wagenditi Misri kuhemera shiboga. 4 Kumbiti Yakobu kamlekiti ndiri Benjamini mpusu gwa Yusufu, kagendi pamuhera na kaka wakuyi, toziya katiriti kuwera mekatabiki. 5 Su wana wa Israeli wasokiti Misri pawawera muwamu mwa walii yawagenditi kuhemera shiboga, toziya njala iweriti nkulu nentu vilaa muisi ya Kanaani.

6 Shaka ashi Yusufu kaweriti ndo mgolokera mkulu aku muisi ya Misri. Yomberi ndo yakaweriti kankuwashuwuzira wantu shiboga. Su kaka wakuyi pawasokiti, wasuntamaliti makukama kulongolu kwa Yusufu. 7 Yusufu pakawawoniti kaka wakuyi kawamana, kumbiti kalitenditi kuwera kawamaniti ndiri, kayoweriti nawa kwa kukalipa. Su kawakosiya, mwenga mlawa koshi?

"Womberi wamwankula, twenga tulawa muisi ya Kanaani, twiza kuhemera shiboga."

8 Tembera Yusufu kawamaniti kaka wakuyi kumbiti womberi wamumaniti ndiri. 9 Yusufu Kaholiti ndotu zakuwi za makashu kuusu kaka wakuyi, kawagambira, "Mwenga mwawalolalola mwiza kulolalola ugoigoi wa isi ya twenga."

10 Womberi wamwankula, ndala mtuwa gwetu. "Twenga wantumintumi waku twiza kuhemera shiboga. 11 Twenga twawalongu wana wa tati yumu, twenga twawantu ndiri walolalola kumbiti twawantu waminika."

12 Kumbiti Yusufu kahimiziya kuwagambira, ndala! "Mwenga mwiza su kulolalola handa isi ya twenga yahera likakala."

13 Womberi wamgambira, "Twengapa wantumintumi waku, twawalongu lilongu na mbili. Mlongu gwetu yumu kahowiti na mpusu gwetu kasigala na tati gwetu ukaya."

14 Kumbiti Yusufu kawagambira, "Ntambu yantakuliti kuwera mwenga walolalola. 15 Hangu ndo ntambu hamjeruwi, Nakaka nilirapa kwa litawu lya Farao, hapeni muwuki panu mpaka pakiza mpusu gwenu panu. 16 Mumtumi yumu gwenu kagendi kamjegi mlongu gwenu mpusu, wamonga wenu pawawera mushibetubetu. Panu mwenga hamumaniki kuwera mtakula nakaka. Paiwera ndiri hangu, nilirapa kwa litawu lya Farao kuwera mwenga walolalola!" 17 Shakapanu kawatatiliti woseri mushibetubetu kwa mashaka matatu.

18 Lishaka lya tatu Yusufu kawagambiriti kaka wakuyi, "Toziya neni nimtira Mlungu, mtendi hangu su mpati kulikala. 19 Handa nakaka mwenga mwa wantu waheri, yumu gwenu kasigali mushibetubetu, wamonga wawajegeri shiboga walongu wenu yawatabika na njala. 20 Shakapanu mumjegi mlongu gwenu mpusu. Ayi ayilanguziyi nakaka visoweru vyenu na mwenga hapeni mlaguwi. Su womberi wajimira kutenda hangu."

21 Shakapanu womberi walitakuziyana weni kwa weni, nakaka twengapa twankutabika toziya ya mlongu gwetu. "Tembera tuwoniti hinginika yakuwi, kumbiti twenga tumsheriti ndiri ata pakatuluwiti. Ndo maana ntabiku ayi yoseri yankutupata."

22 Rubeni kawagambira, hashi, neni niwagambiriti ndiri natutenda vidoda kwa kumtenduwa yomberi? "Kumbiti mwenga mumpikaniriti ndiri neni! Vinu twankuazibiwa kwajili ya mwazi gwakuyi."

23 Womberi wavimaniti ndiri kuwera Yusufu kavimaniti goseri aga gawatakuliti, toziya kuweriti na muntu gwa kumtakulira shawayoweriti.

24 Su Yusufu kagenditi kumbwega kaliliti, pakanyamaliti kawuyiti kuyowera nawomberi. Shakapanu kalagaliriti kuwera Simiyoni kakamulitwi na kumtawa pingu kulongolu kwa masu gawu.

25 Yusufu kalagaliriti mumalobota gawu wamemiziyi viboga, kila yumu gwawu wamwuziliri mpiya mulilobota lyakuyi, na wapananwi shiboga sha munjira. Shitwatira ashi shitendikiti kwa womberi, 26 wawapapiziya wankanyama punda wawu, visanka vyawu vya viboga, shakapanu wawukiti. 27 Womberi pawasokiti pahala pa kugonjera mwanja kwa wahenga, yumu gwawu kayopoliti lilobota lyakuyi su kapati kumliziya nkanyama punda gwakuyi, su kalikangashiti kuwona mpiya mumlomu mwa lilobota lyakuyi. 28 Su kawagambiriti walongu wakuyi, mpiya zangu ziwuzilirwa, zamumlomu mwa lilobota lyangu!

"Womberi pawapikaniriti aga, wafuwa moyu. Waliloliti weni kwa weni na kutetema pawalikosiya, shitwatira gaa ashi shakatutenderiti Mlungu?"

29 Pawasokiti muisi ya Kanaani kwa tati gwawu Yakobu, womberi wamgambiriti goseri yagawapatiti, wamgambira.

30 "Mkulu gwa isi ilii katakuliti na twenga kwa kukalala, na kutugambira twenga twawalolalola muisi mwakuyi. 31 Kumbiti twenga tumgambira kuwera twenga twawantu walolalola ndiri kumbiti twawantu waheri. 32 Tumgambiriti vulaa kuwera twenga twawalongu lilongu na mbili wana wa tati yumu na yumu gwetu kahowiti kala na mpusu ulii kaukaya muisi ya Kanaani pamuhera na tati gwetu. 33 Mkulu gwa isi ayi katugambiriti hangu, ntambu ayi hanivimani kuwera nakaka mwenga wantu waheri. Mumleki kwaneni mlongu gwenu yumu, wamonga wajegi viboga ukaya kwa walongu wenu yawatabika na njala. 34 Shakapanu mumjegeri mpusu, su hanivimani kuwera mwenga wantu waheri. Pamtenda hangu hanimlekiziyi mlongu gwenu, na mwenga hamlekeziwi kushuwuza vintu muisi ayi." 35 Pawaweriti wankwitira viboga kulawa mumalobota gawu, walikangashiti kuwona kila yumu gwawu wamtulira mpiya mulilobota lyakuyi. Womberi pawawoniti hangu, woseri pamuhera na tati gwawu, waweriti na lyoga nentu. 36 Tati gwawu Yakobu kawagambira, mumpoka wana waneni. "Yusufu kwahera, Simiyoni kwahera, vinu mfira kumtora Benjamini. Goseri aga gampata neni!"

37 Palii Rubeni kamgambiriti tati gwakuyi, panumwuziya ndiri Benjamini, guwalagi wana waneni wawili. "Gumleki Benjamini mumawoku gangu, neni hanimloleri na kumwuziya kwa gwenga."

38 Kumbiti tati gwakuyi kamwankula, mwana gwangu hapeni kagendi pamuhera na mwenga, kaka "Gwakuyi kahowiti na kasigala ayu gweka yakuwi. Paiwera hakapatwi shoseri shidoda mumwanja gwamfira gugenda, su hamundagi kwa hinginiku."