1 "Pa aga, Yusufu wamgambiriti kuwera tati gwaku kalwala. Su kawatoliti wana wakuyi wawili, manasi pamuhera na Efraimu, kagenditi nawu kwa tati gwakuyi." 2 "Yakobu pawamgambiriti, mwana gwaku Yusufu kiza kukuwona, yomberi kalikamziya kwimuka na kalivagiti mulisaga."

3 Yakobu kamgambiriti Yusufu, "Mlungu yakana makakala kandawiriti kulii paweriti Luzu muisi ya Kanaani, kantekeleriti. 4 Kang'ambiriti, guloli, hanikutendi guweri na shiyiwuku shivuwa na hanikongeri na hanikutendi guweri na wantu wavuwa. Hanikupanani isi guhihali mashaka goseri gwenga pamuhera na shiyiwuku shaku pagwenga. 5 Vinu, wana waku wawili, yawiwukiti aku Misri pamberi pa neni kwiza kwa gwenga, hawawalangwi kuwera waneni, Efraimu na Menasi hawaweri waneni gambira Rubeni na Simiyoni ntambu yawaweriti waneni. 6 Kumbiti wana yagugenda kuwapata shakapanu hawaweri wagwenga. Kumbiti womberi hawashemwi uhala wawu kupitira litawu lya walongu wawu Efraimu na Manasi. 7 Ntenditi hangu toziya ya mawu gwawu. Paweriti nankuwuya kulawa Padani, muhinginika yaneni, Reheli kahowiti muisi ya Kanaani patuweriti twankugenda mwanja pakwegera kusoka Efrata. Su nimfindiriti aku, mumbwega na njira yaigenda Efrata. Vinu ishemuwa Betilehemu.

8 Israeli pakawoniti wana wa Yusufu, kamkosiya, hashi, awa washina gaa?

9 Yusufu kamwankula tati gwakuyi, awa wana wangu Mlungu yakampananiti pawera panu.

Israeli kalonga, shondi shondu, guwajegi pakwegera mpati kuwapetera mashi."

10 Masu ga Israeli gaweriti gawona weri ndiri toziya ya ugogolu. Su Yusufu kawajega womberi pakwegera na tati gwakuyi, yomberi kawanonera na kuwakisikira.

11 Shakapanu Israeli kamgambiriti Yusufu, "Neni holiti ndiri kushiwona sheni shaku kayi, kumbiti Mlungu kantenda wezi kuwawona wana waku vilaa."

12 Su Yusufu kawawusiya wana wakuyi pamanung'unu ga tati gwakuyi, shakapanu kansuntamira makukama.

13 Yusufu kawanyasula wana wakuyi wawili, Efraimu muliwoku lyakuyi lya kumliwu na Manasi muliwoku lyakuyi lya kumshigi, pakamlonguziya muliwoku lya kumliwu lya tati gwakuyi, su kawasegiziya pakwegera na mbuyi gwawu. 14 Kumbiti Israeli kagapingikiti mawoku gakuyi, liwoku lyakuyi lya kumliwu kalitula pampindi pamtuwi gwa Efraimu tembera kaweriti mpusu, na liwoku lyakuyi lya kumshigi kalituliti pamtuwi gwa Manasi yakaweriti shipanta njira.

15 Shakapanu Israeli kampeteriti mashi Yusufu, pakalonga,

"Mlungu ulii watati waneni

Abrahamu na Isaka wamjimiliti mumakaliru gawu,

Mlungu ndo yakawera mlolera

gwa makaliru gangu goseri mpaka leru.

16 Na ntumintumi gwa kumpindi kanopoliti mumadoda goseri,

mweni kawatekeleri wantemba awa.

Na washemuwi kwa litawu lyaneni na kwa matawu ga watati wangu Abrahamu na Isaka.

Womberi wongereki kuwera wavuwa mupasipanu."

17 Yusufu pakawoniti kuwera tati gwakuyi kalitula liwoku lyakuyi pamtuwi gwa Efraimu, yomberi kafiliziwiti ndiri. Su katoliti liwoku lya tati gwakuyi kulawa mumtuwi gwa Efraimu na kugutula pamtuwi gwa Manasi.

18 Yusufu kamgambiriti tati gwakuyi, ndala. "Tati ayu ndo shipanta njira. Shondi shondi, gutuli liwoku lyaku lya kumliwu pamtuwi gwakuyi."

19 Kumbiti tati gwakuyi kalemiti pakalonga, nivimana mwana gwangu, nivimana. "Yomberi vilaa hakaweri na wantu wavuwa, vilaa hakaweri mkulu. Pamuhera na hangu, mpusu gwakuyi hakaweri mkulu kuliku mweni na shileri shakuwi hawaweri wantu wavuwa.

20 Su Israeli kawapetiriti mashi lishaka lilii na kulonga,

wantu wa Israeli hawagatenderi matawu genu kupetera mashi,

Mlungu kawatendi gambira Efraimu na Manasi.

21 Shakapanu Israeli kamgambiriti Yusufu, neni napakwegera kuhowa, kumbiti Mlungu hakaweri pamuhera na gwenga na hakawawuziyi muisi ya wambuyi wenu. 22 Pamuhera na hangu, nikupanana gwenga pota walongu waku, pahala pamu kulugongu lwanuwapokiti Waamori patulikomiti ngondu kwa magumba na misali."