1 Su Isaka kamshemiti Yakobu, kampetera mashi na kamlagalira pakalonga, "Naguyuga mdala yoseri muntu gwa Kanaani. 2 Gugendi Padan Aramu, ukaya kwa mbuyi gwaku Betueli tati gwa mawu gwaku, gwakayugi yumu gwa muhinga gwa Labani kaka gwa mawu gwaku. 3 Mlungu yakawera na likakala na kakutekeleri gupati walera wavuwa na kwongereka mpaka guweri mbuyi gwa wantu wa isi zivuwa. 4 Kakutekeleri gwenga pamuhera na shiyiwuku shaku matekeleru galii gakamtekeleriti Abrahamu, su guhali isi yagulikala gambira muhenga, isi Mlungu yakampananiti Abrahamu!" 5 Su Isaka kamlekeziyiti Yakobu kagendi, yomberi kagenditi Padan Aramu kwa Labani mwana gwa Betueli muntu gwa Aramu, kaka gwa Rebeka, ulii mawu gwawu Yakobu na Esawu.

6 Vinu Esawu kavimaniti kuwera Isaka kampeteriti mashi Yakobu na kamlagaliriti yomberi kagendi kuyuga aku Padan Aramu na pakampetiriti mashi, kamleweleriti nakayuga mdala muntu gwa Kanaani. 7 Yakobu kamjimiriti mawu gwakuyi na tati gwakuyi, su kagenditi Padan Aramu. 8 Shakapanu Esawu kavimaniti kuwera tati gwakuyi kafiriziwitwi ndiri na wadala wa Kanaani, 9 su kagenditi kwa Ishimaeli mwana gwa Abrahamu na kamuyugiti Mahalati muhinga gwa Ishimaeli, dada gwakuyi Nebayoti.

10 Yakobu kawukiti Beri Sheba na kugenda Harani. 11 Pakasokiti pahala pamu, kagonjiti mpota toziya mshenji guweriti gunala. Yomberi katoliti libuwi limu lya pahala palii, kalitenda msagamu, kagonja. 12 Mumpota yomberi kalota, kawoniti lukweneru lwalugolosiwitwi kugenda kumpindi, wantumintumi wa kumpindi waweriti wankukwena kugenda kumpindi na kusuluka mlukweneru alu. 13 Mtuwa Mlungu kagolokiti pampindi pa lukweneru alu, kamgambira, "Neni ndo Mtuwa, Mlungu gwa Abrahamu tati gwaku, na Mlungu gwa Isaka. Lushi lwagulugonjera hanikupanani gwenga na shiyiwuku shaku. 14 Shiyuwuku shaku hashiweri shivuwa gambira lidika lya litapaka, na hamuweri kila pahala, kwagulawa mshenji na kwaguzyeta mshenji, kushana na kusika. Wantu woseri wa pasipanu hawatekelerwi kupitira gwenga na shiyiwuku shaku. 15 Neni napamuhera na gwenga, hanikuloleri weri kwoseri kwagugenda na kukuwuziya mlushi alu. Hapeni nikuleki mpaka pantenda shilii shanukulagiliti."

16 Shakapanu Yakobu kimuka kulawa mumpota, kaliholiti, "Nakaka Mtuwa kapanu, neni nivimaniti ndiri!" 17 Yakobu katiriti na kulonga, "Pahala panu patiliziya nentu! Pamonga pawera numba ya Mlungu na ligomi lya kumpindi."

18 Yakobu kimukiti mandawira putiputi, katola libuwi lilii lyakatenditi msagamu, kaligolosiya gambira lusiki na kalumiminiriti lipaki panani pakuwi na kulitenda liweri lya Mlungu. 19 Yomberi kapashema pahala palii Beteli, kumbiti litawu ligona lya pahala pali liweriti Luzi. 20 Shakapanu Yakobu kalapiriti pakalonga, "Handa haguweri pamuhera naneni na kundolera weri mumwanja gwangu na pagumpanana shiboga na nguwu ya kuvala, 21 su mbuyi salama ukaya kwa tati gwangu, gwenga Mtuwa Mlungu haguweri Mlungu gwangu. 22 Na libuwi ali lyangolosiyiti panu gambira lusiki, hapaweri pahala pa kukuguwira, naneni hanikupanani semu ya lilongu lya vintu vyoseri vyagugenda kumpanana neni."