1 Lishaka limu Mlungu kamgambiriti Yakobu, "Gwanji mwanja gugendi gulikali Beteli na gumnyawiri Mlungu shitalawanda sha mabuwi sha kutambikira, Mlungu yakakulawiriti shaka pagutugiti kumtira kaka gwaku Esawu."

2 Su Yakobu kawagambiriti wantu wa kaya yakuwi pamuhera na woseri yawaweriti pamuhera na yomberi, "Mwasili kutali vinyagu vya milungu ya shihenga vyamuweriti navi, myogi mashi na kuzigulula nguwu zenu. 3 Shakapanu mwizi, tugendi Beteli su hanimnyawiri shitalawanda sha kutambikira Mlungu yakantangiti lishaka lya kutabika kwangu na kaweriti na neni poseri kwang'enditi." 4 Su womberi wampananiti Yakobu vinyagu vyoseri vya milungu ya shihenga vyawaweriti navi pamuhera na heleni zyawazivariti mumakutu, nayomberi kavikulira pasi pa mtera gwa mwaloni yaguweriti pakwegera na Shekemu.

5 Yakobu pamuhera na wana wakuyi pawaweriti wankugenda mwanja, Mlungu kawatenditi wenikaya wa lushi zoseri za pakwegera waweri na lyoga, su womberi wasinditi kuwafata wana wa Yakobu. 6 Su Yakobu pamuhera na wantu woseri yakaweriti nawa, kasokiti Luzu yaishemwa vinu Beteli muisi ya Kanaani. 7 Kanyawiti palii shitalawanda sha mabuwi sha kutambikira na kupashema Eli Beteli toziya pahala palii Mlungu pakalilanguziyiti mweni kwa yomberi shaka pakaweriti kankutuga kumtira kaka gwakuyi. 8 Debora, yaya gwa Rebeka, kahowiti na kafintirwa pasi pa mtera gwa mwaloni, su Yakobu kalushema lushi alu Aloni Bakuti.

9 Yakobu pakawuyiti kulawa Padan Aramu, Mlungu kamlawiriti kayi na kamtekeleriti. 10 Mlungu kamgambiriti, "Litawu lyaku Yakobu, kumbiti hapeni gushemwi kayi Yakobu, kumbiti litawu lyaku hagushemwi Israeli." Su Yakobu kashemitwi Israeli. 11 Na Mlungu kamgambiriti yomberi, "Neni ndo Mlungu yakawera na makakala, guweri na shiyiwuku shivuwa na shyongereki. Kwaku hakulawiri wantu wa isi zivuwa na wafalumi hawalawiri mushiyiwuku shaku. 12 Isi yaniwapananiti Abrahamu na Isaka hanikupanani gwenga pamuhera na shiyiwuku shaku." 13 Shakapanu Mlungu kawukiti kulawa pahala palii kwakayoweriti na yomberi. 14 Su Yakobu kagolosiyiti lusiki lya libuwi pahala palii pakayoweriti na Mlungu, kalituliti liweri lya Mlungu kwa kwitira tambiku ya divayi na lipaki. 15 Su Yakobu kapashema Beteli pahala palii pakayowiliti na Mlungu.

16 Yakobu na walongu wakuyi woseri wendereyiti na mwanja gwawu kulawa Beteli. Pawaweriti utali tunga pamberi pa kusoka Efrata, Raheli kaweriti na utama nentu wa kwiyura. 17 Na yomberi pakaweriti muutama wa kwiyura, mkunga kamgambiriti, "Nagutira, gupata mwana yumonga mpalu." 18 Raheli pakaweriti pakwegera na kuhowa, kampananiti mwana litawu Benoni kumbiti tati gwakuyi kampananiti mwana ayu litawu Benjamini. 19 Su Raheli kahowiti na kufindirwa pambwega munjira yayigenda Efrata vinu ishemuwa Betilehemu. 20 Yakobu kagolosiya lusiki lwa libuwi kuwera liholu pambindi palisembi lya Raheli lyeni liwera mpaka leru.

21 Israeli kendereyiti na mwanja gwakuyi, kagenditi kugonjera mwanja pakapititi kala shinara sha Ederi.

22 Shaka Israeli pakaweriti kankulikala muisi ayi, Rubeni mwana gwakuyi kagonjiti na Biliha, mdala gwa kumbwega gwa tati gwakuyi, na tati gwakuyi kapikaniriti shisoweru ashi.

Yakobu kaweriti na wana lilongu na mbili.

23 Wana wa Leya waweriti Rubeni shipanta njira gwa Yakobu, viraa kaweriti Simiyoni na Yuda na Isakari na Zabuloni. 24 Wana wa Raheli waweriti Yusufu na Benjamini. 25 Wana yawawiyukiti kwa Biliha, yaya mdala gwa Raheli, waweriti Dina na Nafutali. 26 Wana wa Zilipa, yaya mdala gwa Leya, waweriti Gadi na Asheri. Awa ndo wana wa Yakobu, yawawiyukiti pakaweriti Padan Aramu kulii.

27 Yakobu kawuyiti Mamire kwa Isaka tati gwakuyi aku Kiriatiariba, vinu ishemuwa Hebroni, pahala Abrahamu na Isaka walikaliti gambira wahenga. 28 Isaka kalikaliti mivinja miya na malongu manani. 29 Kahowiti pakawera mzewi gwa mivinja ivuwa, Esawu na Yakobu wana wakuyi wamsiriti.