1 Yakobu kendereyiti na mwanja gwakuyi, kasokiti isi ya wantu aku kwagulawa mshenji. 2 Lishaka kawoniti linegu lya mashi muntundu, vilaa kawoniti vipinga vitatu vya wakondolu wagonja pakwegera na linegu lilii toziya waweriti wankulanda mashina mulinegu ali. Libuwi lyaligubika linengu liweriti likulu 3 na wakondolu pawajojonika palii, walolera wa wankanyama waliwusiyaga libuwi ali palinegu na kuwalandasiya mashi. Shakapanu waliwuziya kugubika linegu.

4 Yakobu kawakosiya walolera wa wankanyama, "Walongu wangu mlawa koshi?"

Womberi wamwankula, "Tulawa Harani,"

5 Yomberi kakosiyiti kayi, "Mumumana Labani mzukulu gwa Nahori?"

Womberi wamwankula, "Yina, Tummana."

6 Yakobu kendereyiti kuwakosiya, "Hashi, yomberi kakashina?"

Womberi wamwankula, "Yina kakashina, ata Raheli muhinga gwakuyi Labani, kankwiza na wakondolu wakuyi!"

7 Yakobu kawagambira, "Mloli, kwankali paliwala na shaka ashi shakujojonira ndiri wakondolu, su muwalandasiyi mashi wakondolu, mgendi mwakawaloleri."

8 Womberi wamgambira, "Tuweza ndiri kutenda ntambu ayi mpaka vipinga vyoseri vijojoniki pamuhera na libuwi libiringisiwi kumbeku kulinegu tuwalandasiyi mashi wakondolu."

9 Yakobu pakaweriti kankali kankuyowera na walolera wa wankanyama, Raheli kasoka pakawera na wakondolu wa tati gwakuyi, mweni kaweriti kankuwalolera. 10 Yakobu pakamwoniti Raheli muhinga gwa Labani, kaka gwa mawu gwakuyi na pakawoniti wakondolu wa Labani, yomberi kagenditi kulibilingisiya libuwi lilii palinegu na kavilandasiyiti mashi vipinga vya wakondolu wa Labani kaka gwa mawu gwakuyi. 11 Shakapanu Yakobu kamnonera Raheli na kanjiti kulira kwa liziwu. 12 Su Yakobu kamgambiriti Raheli kuwera mweni yumu gwa walongu wa tati gwakuyi, vilaa mwana gwa Rebeka. Raheli katugiriti ukaya kumgambira tati gwakuyi.

13 Labani pakapikaniriti visoweru kuusu Yakobu mwipa gwakuyi, katugiti kugenda kumwanka, yomberi kamkisikira na kumunonera, kamshemera ukaya kwakuyi. Yakobu kamgambiriti Labani vitwatira vyoseri vyavilawiriti. 14 Labani kalonga, "Nakaka, gwenga gwa mlongu gwangu gwa mwazi." Yakobu kalikaliti nayomberi kwa mwezi gumu.

15 Labani kamgambira Yakobu, "Gwenga gwa mlongu gwangu, kumbiti hapeni gutendi lihengu pota shibenamgongu. Gung'ambili, hashi hanikupanani malipu shyasi gaa?" 16 Vinu Labani kaweriti na wahinga wawili, mkulu kashemwa Leya na mpusu kashemwa Raheli. 17 Leya kaweriti na masu ga kulembula, kumbiti Raheli kaweriti kaherepa nentu.

18 Yakobu kamfiriti Raheli, su kamgambiriti Labani, "Hanikutenderi lihengu kwa mivinja saba,su nimuyugi Raheli muhinga gwaku mpusu." 19 Labani kamgambira, "Mbaka nikupanani muhinga ayu gwenga kuliku kumpanana muntu yumonga yoseri. Gwendereyi kulikala panu naneni." 20 Su Yakobu kamgendiriti lihengu Labani kwa mivinja saba toziya kamuyugi Raheli, kumbiti kwa yomberi shaka ashi shiweriti shaka shididini toziya kamfiriti nentu Raheli.

21 Shakapanu Yakobu kamgambiriti Labani, "Gumpanani mdala gwangu mfira kumuyuga toziya shaka shaneni kutenda lihengu shipela." 22 Su Labani kawashemeriti wantu woseri wa pahala palii na katenditi msambu gwa ndowa. 23 Kumbiti pashiru, Labani kamtola Leya muhinga gwakuyi mkulu na kumjega kwa Yakobu, Yakobu kagonja nayu. 24 Labani kamlaviya Zilipa ntumintumi gwakuyi mdala kaweri yaya gwa Leya muhinga gwakuyi. 25 Mandawira shilawu yakuwi, Yakobu kayambuliti kuwera yomberi kaweriti Leya. Yakobu kakalaliti na kamkosiyiti Labani, "Hashi, guntendera shitwatira gaa? Nikutenderiti lihengu toziya ya Raheli, iwera hashi gunzyanga?"

26 Labani kamwankula, "Mlushi lwa twenga hatwenitendi shitiba sha ntambu ayi, kumlaviya muhinga mpusu pamberi pa muhinga shipanta njira. 27 Gumaliri mashaka saba ga msambu gwa ndoa kulikala na Leya, shakapanu hanikupanani Raheli muhinga ayu mpusu kwa kuntendera lihengu mivinja yamonga saba."

28 Yakobu katenditi ntambu yawamlagiliriti. Yomberi kamaliriti mashaka saba ga msambu gwa ndoa kulikala na Leya, shakapanu Labani kampanana Yakobu, Raheli muhinga gwakuyi mpusu kaweri mdala gwakuyi. 29 Labani kamlaviya Biliha, ntumintumi gwakuyi mdala kaweri yaya gwa Raheli. 30 Yakobu su kagonja na Raheli vilaa, yomberi kamfiriti nentu Raheli kuliku Leya. Su kamtenderiti lihengu Labani kwa mivinja saba yamonga.

31 Mtuwa Mlungu pakawoniti kuwera Leya kakalalirwa, kampanana wana, kumbiti Raheli kaweriti mpendi. 32 Leya kapata yinda, kawiyula mwana mpalu, kamshema Rubeni, yomberi kalonga, "Mtuwa Mlungu kawona hinginiku yangu, pamonga mpalu gwangu hakanfiri." 33 Yomberi kapatiti kayi yinda yamonga, kamwiwuliti mwana mpalu, kamshema Simoni, su kalonga, "Mtuwa kampanana mwana mpalu yumonga toziya kapikanira ntambu yankalalirwa." 34 Yomberi kapatiti kayi yinda yamonga, kamwiwula mwana mpalu, kamshema Lawi, su kalonga, "Shaka ashi mpalu gwangu hakalimatiri pamuhera na neni toziya nimwiwulira wana wapalu watatu." 35 Leya kapatiti kayi yinda, kamwiwula mwana mpalu, kamshema Yuda, yomberi kalonga, "Shaka ashi Hanimkwisi Mtuwa Mlungu" Shakapanu Leya koyiti kwiyula wana.