1 Sarai mdala gwa Abramu, kaweriti hakenimwiwuliri mpalu gwakuyi mwana. Kumbiti kaweriti na yaya mdala yakashemitwi Hagali, kulawa Misri. 2 Su Sarai kamgambiriti Abramu, "Guvimana kuwera Mlungu hakenintendi kupata wana. Gumtoli Hagali yaya gwangu mdala, pamonga hampati mwana kwakuyi." Abramu kavijimiriti visoweru vya Sarai. 3 Pa Abramu kulikala muisi ya Kanaani kwa shaka sha mivinja lilongu, Sarai mdala gwakuyi kamtoliti Hagali mumanda gwakuyi na kampananiti Abramu mpalu gwakuyi, kaweri mdala gwakuyi. 4 Abramu kamumaniti Hagali, na Hagali kapatiti yinda. Yomberi pakavimaniti kuwera kana yinda, kanjiti kulitumba na kumzarawu Sarai.

5 Sarai kamgambiriti Abramu, "Gwenga hagwajibiki udoda wantenderwa. Neni Nikupananiti yaya gwangu mdala, kumbiti pakapatiti yinda, kanjiti kulitumba na kunzarawu! Mtuwa katozi pakati pa gwenga na neni."

6 Abramu kamgambira Sarai, "Yaya gwaku mdala kapasi pa uwezu waku, gumtendi ntambu yagufira." Su Sarai kamtabisiyiti Hagali mpaka kawuka.

7 Ntumintumi gwa Mtuwa, kamwoniti Hagali pambwiru ya mashi yagabwitula kushiwala, mbwiru ya mashi yaiwera munjira kugenda Shuri. 8 Ntumintumi gwa Mtuwa kamkosiya, "Hagali, yaya gwa Sarai! Gulawa koshi na gwankugenda koshi?" Hagali kamwankula, "Nimtira Sarai."

9 Ntumintumi gwa Mtuwa kamgambiriti, "Guwuyi kwa Sarai na gwakamjimiri." 10 Ntumintumi gwa Mtuwa kongeriti kutakula, "Hanishiyongeri shiyiwuku shaku, hapeni wawezi kushiwalanga kwa uvuwa wawu."

11 Ntumintumi gwa Mtuwa kamgambiriti vilaa, "Gwenga gwana yinda na hagwiwuli mwana mpalu, litawu lyakuyi hagumshemi Ishimaeli mana yakuwi Mtuwa kapikanira kulila kwaku. 12 Ishimaeli hakalikali gambira nkanyama punda gwa kuntundu, hakaweri mngondu kwa kila muntu, na kila muntu hakaweri mngondu gwakuyi na hakalikali kutali na walongu wakuyi." 13 Su Hagali kampananiti litawu Mtuwa Mlungu yakayoweritii nayu aku, "Gwenga gwa Mlungu yagumona neni," toziya kaliholiti, "Nakaka panu nimwoniti yomberi yakamona!" 14 Ndomana linegu lilii lishemuwa Beeri Lahai Roi, mana yakuwi linegu lya ulii yakawera na ukomu yakamoniti, linegu ali lya pakati pa Kadeshi na Beredi.

15 Hagali kamwiwulira Abramu mwana mpalu, Abramu kamshema litawu Ishimaeli. 16 Abramu kaweriti na mivinja malongu nani na sita shaka Hagali pakamwiyuwiriti Ishimaeli.