1 Sara kalikaliti mivinja miya na malongu mawili na saba. Ayi ndo iweriti mivinja ya makaliru ga Sara. 2 Yomberi kahowiti aku Kiriatiariba, vinu ishemuwa Hebroni muisi ya Kanaani, na Abrahamu kadaya na kutenda shiwembu kwa Sara mdala gwakuyi.

3 Abrahamu kagaleka mauti ga mdala gwakuyi, kalawa kagenda kuyowera na Wahiti, kawagambira, 4 "Neni nilikala gambira muhenga pakati pa mwenga, munshuwuziriri semu ya litapaka yamwenga, su mpati kugasira mauti ga mdala gwangu."

5 Wahiti wamwankula, 6 "Gwee mtuwa gwetu, gutupikaniri, gwenga gwa mkulu nentu pakati pa twenga. Gufintiri mauti ga mdala gwaku mulipumba lyoseri lyagufira pakati pamapumba getu. Kwahera muntu pakati pa twenga hakakwimi lipumba lyakuyi ama kukulewelera kugasira mauti ga mdala gwaku." 7 Shakapanu Abrahamu kagoloka na kung'ong'ola kwa ligoya kulongolu kwawu wenikaya Wahiti, 8 kawagambira, "Paiwera munjimira nigafindira mauti ga mdala gwangu, shondi mumluwi Efroni mwana gwa Sohari, toziya ya neni, 9 yomberi kanshuuziri mpanga yakuwi ya Makipera yayiwera mumbwega mwa lirambu lyakuyi. Mumluwi ntendi mapumba gangu, kampanani kwa beyi ya imanika palaa panu palongolu penu."

10 Efroni mweni kalikaliti pakati pa wantu wakuyi, yomberi kamwankuliti Abrahamu kulongolu kwa Wahiti woseri yawaweriti paligomi lya lushi. 11 Kamgambiriti, "Ndala mtuwa gwangu, shondi shondi gumpikaniri neni, nankupanana lirambu lyoseri na mpanga yaiweramu, kayi nankumupanana kulongolu kwa wenikaya wayangu. Kufintira mauti ga mdala gwaku."

12 Abrahamu kang'ong'onala kayi kwa ligoya kulongolu kwa wenikaya, 13 na kamgambira Efroni, wenikaya woseri pawapikanira, "Shondi gumpikaniri. Hanikupanani mpiya za lirambu lyaku. Gunjimiri kuwanka mpiya azi su wezi kugasira mauti ga mdala gwangu."

14 Efroni kamwankula Abrahamu, 15 "Mtuwa gumpikaniri, lirambu lyana samani ya magwala ga mpiya miya msheshi, kumbiti iwera shishi pakati pa neni na gwenga? Gufintiri mauti ga mdala gwaku." 16 Abrahamu kajimilirana na Efroni, kampanana yomberi ntambu yakakantiti kulongolu kwa Wahiti woseri, magwala ga mpiya miya msheshi yagatendelitwi na washuwuzi mumashaka galii.

17 Su lirambu lya Efroni lya aku Makipela, kwagulawa mshenji aku Mamire, 18 mpanga na mitera yoseri yayiweriti pamuhera na pahala poseri liweriti lya Abrahamu kulongolu kwa Wahiti woseri yawaliwoniti paligomi lya lushi.

19 Pa aga, Abrahamu kagasira mauti ga mdala gwakuyi mupanga lyaliweriti mulirambu lya Makipela, uwega wa kwagulawa mshenji aku Mamire, vinu ishemuwa Hebroni mlushi lwa Kanaani. 20 Lirambu na mpanga vyaviweriti amu vyavishuwuzitwi na Wahiti kwa Abrahamu, nakaka viwera vyakuwi kuwera pahala pa kufindira wantu wakuyi.