1 Pamashaka tunga, Mlungu kamjeriti Abrahamu. Mlungu kamshemiti, "Abrahamu!"

Yomberi kawankula, "Naam, napanu!"

2 Mlungu kamgambira, "Gumtoli Isaka mwana gwaku gwa gweka yagumfira, gugendi mpaka isi ya Moriya, gwakamlaviyi tambiku ya kulunguziya, kulii palugongu lwang'enda kukulanguziya." 3 Su shilawu yakuwi mandawira, Abrahamu kamtandiriti punda gwakuyi. Yomberi kawatoliti wantumintumi wakuyi wawili pamuhera na Isaka mwana gwakuyi. Kazitandira mbawu vilaa za kutendera tambiku ya kulunguziya, shakapanu kanjiti mwanja kugenda pakalagaliritwi na Mlungu. 4 Mulishaka lya ntatu, Abrahamu kanyasuliti masu gakuyi kapawona pahala palii kwa kutali. 5 Yomberi kawagambiriti wantumintumi wakuyi, "Muhepi panu na punda ayu, neni pamuhera na mwana gwangu hatugendi mpaka kulii, twakamlaviliri tambiku Mlungu, shakapanu hatuwawuyili." 6 Abrahamu kazitola mbawu zilii, kamtwika Isaka mwana gwakuyi, yomberi katola makala ga motu na shimagi mumawoku. Su wawukiti wawili pamuhera. 7 Isaka kamkosiya tati gwakuyi, "Tati makala ga motu na mbawu twanazi, kumbiti mwana gwa kondolu gwa tambiku ya kulunguziya kakoshi?"

8 Abrahamu kamwankula, "Mlungu hakalipanani mweni mwana gwa kondolu gwa tambiku ya kulunguziya." Su wendereyiti na mwanja gwawu.

9 Pawasokiti pahala Mlungu pakamlagaliriti, Abrahamu kanyawiti shitalawanda sha mabuwi sha kutambikira na kwankanira mbawu pampindi pakuwi. Shakapanu kamtawa Isaka mwana gwakuyi na kumgonjeziya pambawu pakutambikira. 10 Abrahamu kalitapilisiyiti liwoku lyakuyi, katola shimagi su kamlikituli mwana gwakuyi. 11 Kumbiti ntumintumi gwa kumpindi gwa Mtuwa kamshemiti kulawa kumpindi, "Abrahamu! Abrahamu!"

Yomberi kawankula, "Naam, napanu mpikinira."

12 Ntumintumi gwa kumpindi kamgambiriti, "Nagutenda shoseri kwa muntemba ayu. Vinu nivimana kuwera gumtira na Mlungu, toziya gunima ndiri mwana gwaku, mwana gwa gweka." 13 Abrahamu kanyasuliti masu gakuyi kawona kondolu gwa shipalu, magoli gakuyi gagomiziwa mushitogolu. Su kagenda kumtola kondolu ayu, kamtendera tambiku ya kulunguziwa badala ya mwana gwakuyi. 14 Su Abrahamu kapapanana pahala palii litawu, "Mtuwa Mlungu hakapanani." Ntambu yawatakula mpaka leru, "Mulugongu lwa Mtuwa, wantu wapananwa."

15 Ntumintumi gwa kumpindi gwa Mtuwa, kamshemiti Abrahamu kulawa kumpindi kwa mala ya pili, 16 na kamgambiriti, "Mlungu kalonga hangu, nilirapira namweni kuwera toziya gutenda hangu na gunima ndiri mwana gwaku, 17 nakaka hanikutekeleri na hanishitendi shiyiwuku shaku shiweri gambira ntondu za kulyera, vilaa gambira muhanga gwa kumpeku kwa bahari. Shiyuwuku shaku hashihali lushi za wangondu wawu, 18 kulawirana na shiyiwuku shaku, isi zoseri za pasipanu hawatekelerwi, toziya gwenga gunjimira neni."

19 Su Abrahamu kawawuyiriti wantumintumi wakuyi walii na womberi wawukiti pamuhera kuwuya Beeri Sheba. Abrahamu kalikaliti aku Beeri Sheba. 20 "Pavitwatira avi, Abrahamu kapatiti visoweru kuwera Milika vilaa kapatiti wana, kamwiwulira wana wapalu Nahori mlongu gwaku. 21 Usi shipanta njira na Buzi mlongu gwakuyi na Kemueli tati gwa Aramu, 22 na Kesedi na Hazu na Pilidashi na Yidilafu na Betueli." 23 Betueli kamwiwuliriti Rebeka. Milika kamwiwuliriti Nahori, mlongu gwa Abrahamu, wana wanani. 24 Gamonga ga aga, Leuma na mdala gwa kumbwega gwa Nahori, vilaa kamwiwuliriti Teba na Gahamu na Tahashi na Maaka.