1 Mlungu kamtekeriti Sara ntambu yakalagiliti. 2 Su Abrahamu pakaweriti mgogolu, Sara kapatiti yinda na kaleriti mwana mpalu shaka shilaa shilii Mlungu shakamlagaliti Abrahamu. 3 Abrahamu kampanana litawu Isaka, mwana ayu yakaleritwi na Sara. 4 Isaka pakaweriti na mashaka nani, Abrahamu kamwingiziyiti jandu tambu yailagaliritwi na Mlungu. 5 Abrahamu kaweriti na mivinja miya shaka Isaka mwana gwakuyi pakayiwukiti. 6 "Sara kalonga, Mlungu kampanana nemeleru, yoseri yakapikanira visoweru avi, hakanemeleri pamuhera na neni. 7 Shakapanu kongera, gaa mekamgambiri Abrahamu kuwera neni Sara hanoniziyi wana? Kayi nimuyiwulira mwana mpalu muugogolu wakuyi."

8 Isaka kandereyiti kukula na lishaka pakamlekeziyiti kunona, Abrahamu katenditi msambu mkulu. 9 Shakapanu Sara kamwoniti Ishimaeli, mwana gwa Abrahamu yakiyiwukiti na Hagali Mmisri, pakashiniga na kumtendera lijonga Isaka mwana gwakuyi. 10 "Su Sara kamgambira Abrahamu, gumuwingi kutali mumanda ayu mdala na mwana gwakuyi. Hapeni mwana gwa mumanda mdala kuhala pamuhera na mwana gwangu Isaka." 11 Shitwatira ashi shimtenditi Abrahamu kahinginiki nentu toziya Ishimaeli kaweriti mwana gwakuyi vilaa.

12 Kumbiti Mlungu kamgambiriti Abrahamu, "Naguhinginika toziya ya mwana ayu ama mumanda gwaku. Shitwatira shoseri shakakugambiriti Sara gushitendi, toziya shiyiwuku shaku hashilawirani kupitira Isaka ntambu yanilagiliti. 13 Hanimtendi vilaa mwana gwa mumanda gwaku mdala kaweri tati gwa isi nkulu toziya yomberi vilaa mwana gwaku."

14 Shilawu yakuwi mandawira putiputi, Abrahamu katola shiboga na shibuyu sha mashi, kampanana Hagali na kamtwika mulikombi, kamlekeziyiti kawuki pamuhera na mwana. Hagali kawuka, kawera kankuyerayera kushiwala Beeri Sheba. 15 Mashi pagaperiti muvulu, Hagali kamgonjiziya mwana gwakuyi pasi pa tera. 16 Shakapanu yomberi kagenda pambwega, kalivaga utali wa ligulu limu, pakalitakulira mumoyu mwakuyi; "Mbaka namona mwana gwangu pakahowa." Na pakaweriti kalivaga palii, kanjiti kulila.

17 Mlungu kampikaniriti mwana ayu kankulira na ntumintumi gwa kumpindi gwa Mlungu kamshemiti Hagali kulawa kumpindi, "Kamkosiya gwana shishi Hagali? Nagutira, Mlungu kapikanira liziwu lya mwana kwakawera aku. 18 Gugoloki gumnyasuli mwana na gumkoli mumawoku mwaku, tembera hanimtendi kaweri tati gwa wantu wavuwa." 19 Mlungu kamvugula masu Hagali na yomberi kawona linegu lya mashi. Kagenda na kashimemiziya shibuyu sha mashi na kumlandasiya mashi mwana gwakuyi. 20 Mlungu kawera pamuhera na mwana ayu, na yomberi kendereyiti kukula, kalikaliti kushiwala na kuwera yakaguma misali mgangamala nentu. 21 Kaweriti kankulikala kushiwala sha Parani na mawu gwakuyi kamhetera mdala kulawa isi ya Misri.

22 Shaka shilii, Abimeleki pamuhera na Fikoli, mkulu gwa wanjagira wakuyi, kamgenderiti Abrahamu kamgambira, "Mlungu kapamuhera na gwenga mukila shintu shagutenda. 23 Su gundapili kwa litawu lya Mlungu kuwera hapeni guntendi gunzyangi neni pamuhera na wana wangu ama shiyiwuku shangu. Gunanguziyi uheri ulaa ulii ntambu yanikutendiriti gwenga."

24 Abrahamu kawankula, "Nilirapa." 25 Shakapanu Abrahamu kamlalamikira Abimeleki kuusu linegu lya mashi, wantumintumi wa Abimeleki wampokiti. 26 Abimeleki kamgambira, "Neni nivimana ndiri gaa yakatenditi hangu. Gwenga gung'ambiliti ndiri, leru ndo pampikanira visoweru vyakuwi."

27 Su Abrahamu katola kondolu na ng'ombi kampanana Abimeleki, womberi wawili watenditi lipatanu. 28 Abrahamu kawatula gweka wana wa kondolu saba washidala. 29 Abimeleki kamkosiyiti Abrahamu, "Iwera hashi guwatula gweka wana saba wa kondolu awa?"

30 Abrahamu kamwankula, "Wana saba wa kondolu awa yanikupananiti kwa mawoku gangu namweni handa ukapitawu kuwera mbawiti linegu ali." 31 Su pahala palii pashemitwi Beeri Sheba, toziya woseri wawili walirapiliraniti palii.

32 Pawatenditi kala mapatanu aku Beeri Sheba, Abimeleki pamuhera na mkulu wa wanjagira wakuyi, wawuyiti muisi ya wafilisti. 33 Abrahamu kayaliti mtera gwa ukwashu aku Beeri Sheba na kamguwiriti Mtuwa Mlungu gwa mashaka goseri. 34 Abrahamu kalikaliti isi ya Wafilisti shaka shivuwa.