1 Shakapanu Mungu kamuhola Nuhu pamuhera na wankanyama woseri wa kulolerwa na wa kuntundu, woseri yawaweriti pamuhera na yomberi muuwatu mkulu, Mlungu su kavumisiya lihega pasipanu mashi gayanja kusera. 2 Mushaka ashi, mbwiru za mashi na madilisha ga mashi ga kumpindi gatatitwi kala. Nvula ilekiti kutowa, 3 mashi gendereyiti kusera mpolimpoli pasipanu. Upeleru pamashaka miya na malongu muhanu, mashi gaweriti gasera nentu. 4 Mulishaka lya lilongu na saba mumwezi gwa saba, uwatu mkulu gugolokiti pavigongu vya Ararati. 5 Mashi gendereyiti kusera mpolimpoli na lishaka lya kwanja lya mwezi gwa lilongu, migongu iwoneka.

6 Pamashaka malongu muhanu Nuhu kavuguliti dilisha lyakalinyawiti muuwatu mkulu 7 na kamlaviya mpongu kungulu na yomberi kawuya ndiri kumbiti kaguluka aku na aku mpaka mashi pagayumiti pasipanu. 8 Shakapanu Nuhu kamlaviya ng'unda kapati kuwona handa mashi gaweriti gasera pasipanu. 9 Kumbiti ng'unda kapatiti ndiri pahala pa kutukira toziya kuweriti na mashi kila pahala pa pasipanu, su kawuyiti kwa Nuhu muuwatu mkulu. Nuhu kalitalapisiya liwoku lyakuyi, kamtola na kumuwuziya muuwatu. 10 Nuhu kaheperiti mashaka saba gamonga, shakapanu kamlaviya kayi ng'unda ayu. 11 Ng'unda ayu pakamwuyiriti Nuhu pamihi, kaweriti na shitomoru shiwisi sha mtera gwa mzeyituni! Su Nuhu kavimaniti kuwera mashi gaweriti gasera pasipanu. 12 Su yomberi kaheperiti mashaka saba gamonga, kamlaviya kayi ng'unda ulii, shaka ashi ng'unda kawuyiti ndiri kayi.

13 Nuhu pakaweriti na mivinja miya sita na yimu, mulishaka lya kwanja lya mwezi gwa kwanja, mashi gaweriti gayuma pasipanu. Nuhu kavuguliti shifuniku sha shitwiku sha uwatu mkulu na pakaloliti, kawona kuwera pasipanu paweriti payuma. 14 Mulishaka lya malongu mawili na saba mumwezi gwa pili, pasipanu paweriti payuma nakamu.

15 Su Mlungu kamgambiriti Nuhu, 16 "Gulawi muuwatu mkulu, gwenga pamuhera na mdala gwaku, wana waku wapalu pamuhera na wadala wawu. 17 Guwalaviyi kunja vilaa na viumbi vyoseri wakomu wakila ntambu yawaweriti pamuhera na gwenga, wampongu na wankanyama na kila shiwumbi shashikwawa kwawa mulitapaka, su wapati kulera kuwera wavuwa pasipanu na kweneya kila pahala." 18 Su Nuhu kalawa muuwatu mkulu pamuhera na wana wakuyi na mdala gwakuyi, pamuhera na wamikawana wakuyi. 19 Wankanyama woseri na viwumbi vyoseri vyavikwawa kwawa palitapaka na wampongu woseri na kila shashigendagenda pasipanu, walawiti muuwatu mkulu kulawirana na ntambu zawu.

20 Nuhu kamunyawira Mtuwa Mlungu, shitalawanda sha mabuwi sha kutambikira na kamtoliti yumu mukila ntambu ya wankanyama na mpongu waherepa, kamlavilira Mlungu tambiku ya kulunguziya pahala pa kutambikira. 21 Ununkira uherepa wa tambiku ayi, umuherepeziyiti Mtuwa Mlungu, Mtuwa kalitakuliti mweni, "Hapeni nilipangili kayi litapaka toziya ya wantu, nivimana kuwera maholu gakuyi gapotoka kwanjira uwana wakuyi, ama hapeni nagamiziyi viwumbi ntambu yantenditi. 22 Pasipanu papandereya, shaka sha kuyala na kubena, shaka sha mpepu na shaka sha hemuka, shaka sha mihamba kutomola na shaka sha mihamba kutuluka, shaka sha pashiru na shaka sha paliwala, vyoseri havi hapeni vyoyi."