1 Njoka kaweriti mshengeta kuliku wankanyama woseri wa kuntundu yawawumbitwi na Mlungu. Su njoka kamgambira mdala ayu, "Eti Mlungu katakuliti namuliya mabwajubwaju ga mtera goseri gwa mushiwunga?"

2 Mdala kamwankula njoka ulii, "Tuweza kuliya mabwajubwaju ga mtera goseri mushiwunga, 3 kumbiti Mlungu katugambiriti natuliya mabwajubwaju ga mtera gwa pakati pa shiwunga, ama natuushinkula, patutenda hangu hatuhowi."

4 Njoka kamgambira mdala, "Ndala, hapeni muhowi nakamu! 5 Kumbiti Mlungu katakuliti hangu toziya kavimana kuwera pamliya mabwajubwaju ga mtera agu masu genu hagavugulwi na hamulifani na Mlungu, hamuvimani maheri na makondora."

6 Su mdala pakawoniti kuwera mtera agu gufaa kwa shiboga, guherepeziya mumasu na gufaa kwa kupata luhala, kapa mabwajubwaju gamu kaliya. Kampanana na mpalu gwakuyi, yomberi vulaa kaliya. 7 Palaa palii woseri masu gawu gavuguka, wayambuliti kuwera washivula, su walisonera mihamba ya mtera gwa tini, walinyawira na kuligubika mshunu.

8 Mushaka sha pamihi, Adamu pamuhera na mdala gwakuyi wampikaniriti Mlungu kankutyangira mushiwunga, su womberi walififiti pakati pamitera mushiwunga. 9 Kumbiti Mtuwa Mlungu kamkosiyiti Adamu, "Gwakoshi?" 10 Yomberi kamuwankula, "Nikupikanira gwankutyanga mushiwunga, ntira toziya nashivula hera, su nilififa."

11 Mlungu kamkosiya, "Gaa yakakugambiriti gwashivula? Hashi, guliya libwajubwaju lya mtera gwanikuleweriti naguliya?"

12 Mpalu ayu kawankula, "Mdala yagumpananiti kalikali pamuhera na neni ndo yakampananiti mabwajubwaju gamu ga mtera agu na neni ndiya."

13 Shakapanu Mtuwa Mlungu kamkosiya mdala ulii, "Ashi ndo shishi shagutenditi gwenga?" Mdala kamwankula, "Njoka kanzyanga na neni ndiya."

14 Shakapanu Mtuwa Mlungu kamgambira njoka, "Toziya gutenda hangu, nikupangila gwenga pakati pa wankanyama woseri wa kulolerwa na kuliku wankanyama woseri wa kuntundu. Hagugendigendi kwa kukwawa kwa mtima gwaku na haguliyi lidika mashaka goseri ga makaliru gaku. 15 Hantuli ungondu pakati paku na mdala ayu, pakati pa ulera waku na ulera wa mdala ayu, yomberi hakakutiligili mtuwi gwaku na gwenga hagumlumi shisiginu shakuwi."

16 Kayi kamgambira mdala, "Hanikongeri utama wa kuyuwula, na kwa kutama hagwiwuli mwana, pamuhera na hangu haguweri na mata kwa mpalu gwaku, na yomberi hakakukolimlima."

17 Shakapanu kamgambira Adamu, "toziya gwenga gumpikanira mdala gwaku, guliya mabwajubwaju ga mtera gwanikuleweriti naguliya, su nilipangira litapaka toziya ya gwenga, hagutendi lihengu likamala mumakaliru gaku goseri kupata shiboga shakuliya.

18 Litapaka halimerisiyi misontu na magugu na haguliyi vya mumalambu. 19 Kwa livuki na kutenda lihengu likamala haguliyi shiboga shaku mpaka paguwuya mulitapaka, toziya gwenga gwalitapaka, mulitapaka gulawiti na mulitapaka haguwuyi."

20 Adamu kampanana mdala gwakuyi litawu hawa toziya mekaweri mawu gwa wantu woseri yawawuyikiti. 21 Mtuwa Mlungu kawanyawira Adamu na mdala gwakuyi nguwu za lukuli lwa wankanyama, kawavalasiya.

22 Mtuwa Mlungu kalonga, "Vinu muntu kawera gambira yumu gwetu, kamana maheri na makondora. Tufiruwa ndiri kumleka kagugenderi mtera gwa ukomu na kwapa libwajubwaju kaliyi na kulikala mashaka goseri." 23 Su Mtuwa Mlugu kamuwinga Adamu kagendi kunja kwa shiwunga sha Edeni, su kalimi litapaka lyawamlaviyiti. 24 Pakamuwingiti kala Adamu, kamtuliti ntumintumi gwa kumpindi uwega wa kwagulawira mshenji mushiwunga sha Edeni na ligumba lya motu lyaligalambuka galambuka aku na aku, kulolera njira yaigendera mumtera gwa ukomu.