1 Su kunyawuwa kwa kumpindi na pasipanu pamuhera na vyoseri vyaviweramu vimalirikiti. 2 Lishaka lya saba Mlungu kamaliriti kala lihengu lyakuyi lyoseri lyakatenditi, su mulishaka lya saba ali Mlungu koyera pakamaliliti lihengu lyakuyi lyoseri lyakatenditi. 3 Mlungu kalitekelera lishaka lya saba na kulitenda liweri linanagala, toziya Mlungu koyeriti pakamaliti lihengu lyoseri lya kuumba lyakalitenditi.

4 Hangu ndo ntambu kumpindi na pasipanu papaumbituwi.

Mtuwa Mlungu pakaumbiti kumpindi na pasipanu, 5 paweriti ndiri na vimeru paisi na mitera itomoriti ndiri toziya Mtuwa Mlungu kayitoweriti ndiri nvula, na paweriti ndiri muntu gwa kulima. 6 Kumbiti mashi galawiti muisi galowiziya litapaka lyoseri.

7 Su Mtuwa Mlungu kamuwumba mpalu kwa litapaka, kampulilira mumpula upumula wa ukomu na mpalu ayu kawera shiwumbi shikomu.

8 Shakapanu Mtuwa Mlungu katenda shiwunga kwakulawira mshenji, pahala pa Edeni na aku kamtula mpalu yakamuumbiti. 9 Mtuwa Mlungu kameriziya kulawa mulitapaka kila ntambu ya mitera iherepa yayilera mabwajubwaju ga kuliya. Pakati pa shiwunga ashi paweriti na mtera gwa ukomu na mtera gwa kuvimana maheri na madoda. 10 Kuweriti na lushemba kulawa aku Edeni lwalunyinyirikiti na kulowiziya shiwunga ashi, lushemba alu lulekanika luwera nshemba za msheshi. 11 Lushemba lwa kwanja lushemuwa Pishoni, lushemba alu lutindira isi yoseri ya Hawila kwakuweriti na zahabu. 12 Zahabu ya isi ayi iherepa nentu. Aku vilaa kwana utuli yawaushema bedola na mabuwi ga beyi nkulu gawagashema shohamu. 13 Lushemba lwa pili lushemuwa Gihoni, alu lunyinyirika isi yoseri ya Kushi. 14 Litawu lya lushemba lwa ntatu lushemuwa Tigilisi, na lunyinyirikia kugenda uwega wa Ashuru kwagulawa mshenji. Na litawu lya lushemba lwa msheshi lushemuwa Eufrati.

15 Su Mtuwa Mlungu kamtola mpalu ayu kamtula mushiwunga sha Edeni, kalimi na kaloleri weri. 16 Mtuwa Mlungu kamgambiriti mpalu ayu, "Guweza kuliya mabwajubwaju ga mtera goseri mushiwunga, 17 kumbiti mabwajubwaju ga mtera gwa kumana maherepa na ukondora, naguliya toziya lishaka pagulia mabwajubwaju ga mtera, nakaka haguhowi."

18 Mtuwa Mlungu kalonga, "Iherepa ndiri mpalu ayu kuwera gweka yakuwi, hanimtenderi muyaguwi gwa kumfaa." 19 Su kulawa mulitapaka, Mtuwa Mlungu kaumba kila nkanyama gwa kuntundu na kila mpongu gwa kulyera. Shakapanu kawajega kwa mpalu ayu su kawapanani matawu na matawu gakavipananiti viwumbi avi gawera ndo matawu gawu. 20 Su mpalu ayu kawapanana matawu wankanyama woseri wa kulolerwa na wa kuntundu na wampongu woseri wa kulyera. Kumbiti kapatikaniti ndiri muyaguwi gwa kumfaa mpalu ayu.

21 Su Mtuwa Mlungu katenditi mpalu ayu kagonji mpota nkulu na pakaweriti mumpota, Mlungu katola luwavu lumu lwa muntu ayu na pahala palii pawawusiyiti luwavu kapagubika kwa shinofu. 22 Shakapanu Mtuwa Mlungu kamuwumba mdala kulawa muluwavu lyalulaviyitwi kwa mpalu ulii, kamjega kwa mpalu ulii. 23 Su mpalu ulii kalikangasha na kalonga,

"Yina, ayu ndo shifupa kulawa mumafupa ganeni,

na shinofu kulawa muvinofu mwaneni.

Na ayu hakashemwi mdala.

Toziya kalaviyitwi kulawa kwa mpalu." 24 Toziya ayi mpalu hakawaleki tati gwakuyi na mawu gwakuyi na hakalimamatiri na mdala gwakuyi na womberi wawili hawaweri nshimba yimu. 25 Mpalu na mdala gwakuyi woseri waweriti shivula hera kumbiti wawoniti ndiri soni.