1 Mtuwa Mlungu kamgambira Nuhu, "Gwingili mngati muuwatu, gwenga pamuhera na kaya yaku yoseri, toziya mushileri ashi gwenga guwera muheri kulongolu kwaneni. 2 Gutoli pamuhera na gwenga wankanyama woseri yawawera waherepa yaniwajimila kulaviwa tambiku, gutoli washipalu saba na washidala saba, kumbiti gutoli washipalu yumu na washidala yumu wankanyama yawawera wahumba yaniwajimira ndiri kulaviwa tambiku. 3 Vilaa virii gutoli wampongu wa kulyera washipalu saba na washidala saba, su kuwatula walikali ntambu zawu pasipanu. 4 Pamashaka saba kwanjira vinu hantowi nvula pasipanu kwa mashaka malongu msheshi paliwala na pashiru na haniwagamiziyi nakamu mupasipanu kila shiwumbi shashilikala shanushiwumbiti." 5 Nuhu katenditi vyoseri vyakalagaliritwi na Mtuwa.

6 Nuhu kaweriti na mivinja miya sita shaka mashi gavuwa makulu pagalawiriti pasipanu. 7 Nuhu na mdala gwakuyi, wana wakuyi wapalu pamuhera na wadala wawu, woseri wingiriti mngati mwa muwatu su washapili mashi gavuwa makulu. 8 Shipalu na shidala gwa kila nkanyama na wampongu na viwumbi vyoseri vyavikwawakwawa mulitapaka vyavijimirwa kulaviwa tambiku na vyaviwera vihumba, 9 washipalu wawili na washidala wawili wingiriti mngati mwa uwatu pamuhera na Nuhu, Mlungu ntambu yakamlagaliriti. 10 Pagapititi mashaka saba, mashi gavuwa makulu ganja kugubika pasipanu.

11 Nuhu pakaweriti na mivinja miya sita, mulishaka lya lilongu na saba mumwezi gwa pili, lishaka ali mbwiru zoseri za mashi gabwitula pahala poseri na mashi ga kumpindi gagubutuka. 12 Na nvula itowiti pasipanu kwa mashaka malongu msheshi, paliwala na pashiru. 13 Mulishaka lilaa ali nvula payiyanjiti kutowa, Nuhu pamuhera na mdala gwakuyi, wana wakuyi wapalu, Shemu na Hamu na Yafeti pamuhera na wadala wawu, woseri wingiriti mngati mwa uwatu mkulu. 14 Womberi wingiriti pamuhera na ntambu zoseri za wankanyama wa kuntundu na ntambu zoseri za wankanyama wa kulolerwa na ntambu zoseri za wankanyama yawakwawakwawa mulitapaka na kila ntambu za wampongu. 15 Shipalu yumu na shidala yumu gwa kila ntambu ya viwumbi, wingiriti pamuhera na Nuhu muwatu mkulu. 16 Kila ntambu yawu wingiriti mpalu na mdala gambira Mlungu ntambu yakamlagaliriti Nuhu. Shakapanu Mtuwa kamtatira Nuhu mlaa ligomi lwa uwatu mkulu.

17 Mashi gavuwa makulu galikaliti pasipanu mashaka malongu msheshi, mashi gongeleka na kuunyasula uwatu mkulu guyeruka pasipanu. 18 Mashi gendereya kwongoleka nentu pasipanu na uwatu mkulu uyeruka. 19 Mashi aga gaweriti gavuwa nentu pasipanu, gavigubika vigongu vyoseri vitali pasipanu. 20 Gongelekiti ata kugubikira vigongo shyasi sha mawoku saba na nusu. 21 Viwumbi vyoseri vyavilikwawa kwawa pasipanu vihowiti; wampongu na wankanyama wa kulolerwa na wankanyama wa kuntundu, vipinga vyoseri vya viwumbi vyoseri pasipanu na wantu woseri. 22 Kila shiwumbi shashilikala mulitapaka liyuma, shihowiti. 23 Kila shiwumbi shashilikaliti pasipanu shyagamiziwituwi, wantu na wankanyama na viwumbi vyavikwawa kwawa mulitapaka na wampongu wa kulyera, woseri wagamiziwitwi pasipanu. Nuhu gweka yakuwi ndo yakasigaliti pamuhera na woseri yawaweriti na yomberi muuwatu mkulu. 24 Mashi aga galikaliti pasipanu mashaka miya na malongu muhanu.