1 Kulawa Mamure, Abrahamu kagenditi mwanja kushana pahala pa Negebu, kalikaliti pakati pa Kadeshi na Shuri, shakapanu kagenda kulikala kwa shaka aku Gerari. 2 Pakawera aku, Abrahamu katakuliti kuwera Sara mdala gwakuyi, "Ayu dada gwangu." Su mfalumi wa Gerari kalagaliriti wamjegi Sara na yomberi kamtola. 3 Kumbiti Mlungu kamwiziriti Abimeleki mukulota pashiru, kamgambira, "Gwenga gwankugenda kuhowa, toziya mdala yagumtoliti kayugwa kala."

4 Shaka ashi Abimeleki kaweriti hakenigonji na Sara, su kawankula, "Hashi Mtuwa, haguwalagi wantu yawahera likosa? 5 Abrahamu mweni ndo yakatakuliti kuwera, ayu dada gwangu, kayi na Sara mweni katakuliti kuwera, ayu kaka gwangu! Neni ntenda vyantenditi kwa moyu guherepa, nahera likosa."

6 Su Mlungu kamgambira mumpota, "Yina, nivimana kuwera gutenda hangu kwa moyu guherepa, neni ndo yanikuleweleriti kutenda vidoda kwaneni. Toziya ayi nikuleka ndiri gumshinkuli mdala ayu. 7 Vinu gumuwuziyi mdala ayu kwa mpalu gwakuyi, toziya Abrahamu ndo mbuyi gwa Mlungu. Yomberi hakakuluwili na gwenga hagulikali. Kumbiti pagumuwuziya ndiri, guvimani kuwera gwenga pamuhera na wantu waku woseri, hamuhowi." 8 Su Abimeleki kimuka mandawira putiputi, kawashema wakulu woseri yawawera pasi pakuwi woseri na kuwagambira vitwatira vyakaviwoniti mumpota na womberi watiriti nentu. 9 "Shakapanu Abimeleki kamshemiti mnumba Abrahamu na kamkosiya, kututendera shishi? Nikutendera shishi shidoda ata gujega ukondora mkulu ntambu ayi kwaneni na ufalumi waneni? Guntendera vitwatira vyavifiruwa ndiri kutendwa. 10 Kayi Abimeleki kamkosiya Abrahamu, shintu gaa shashikutenda gutendi hangu?"

11 "Abrahamu kamwankula, ntenditi hangu toziya niliholiti kuwera kwahera yakamtira Mlungu pahala panu na womberi hawandagi toziya ya mdala gwangu. 12 Pamuhera na aga, nakaka yomberi mwana gwa mlongu gwa tati gwangu, kumbiti mawu gwantambu yingi na neni nimuyuga kawera mdala gwangu. 13 Su Mlungu pakantenditi ng'endi kutali na kaya ya tati gwangu, nimgambiriti, hagulanguziyi mafiliru gaku kwaneni, kila pahala pagugenda, kuusu neni gulongi, neni ndo kaka gwaku."

14 Abimeleki katola wakondolu na wang'ombi pamuhera na wamanda, kampanana Abrahamu na kumuwuziya Sara mdala gwakuyi. 15 "Abimeleki kamgambiriti Abrahamu, guloli, isi yoseri ayi yaneni, gulikali kwoseri kwagufira. 16 Kayi Abimeleki kamgambiriti Sara. Guloli, neni nimpanana mlongu gwaku magwala elufu yimu ga mpiya su kuwalanguziya woseri yawawera na gwenga kuwera gwahera likosa, gulanguziwa nakaka kuwera gwahera likosa."

17 Shakapanu Abrahamu kamluwiti Mlungu na Mlungu kamponiziya Abimeleki na mdala gwakuyi pamuhera na wamanda wakuyi su wawezi kupata wana, 18 toziya Mtuwa kaweriti kawafindikiti wadala woseri wa kaya ya Abimeleki kupapa wana toziya ya Sara mdala gwa Abrahamu.