1 Raheli pakawoniti kuwera kamwiwulira ndiri Yakobu mwana yoseri, su kamwoneriti weya Leya, dada gwakuyi na kamgambiriti Yakobu, "Gumpanani wana, paiwera ndiri hangu hahowi." 2 Yakobu kamkalaliriti Raheli na kamgambiriti, "Neni wera badala ya Mlungu, yakakutenda nagupata wana?" 3 Shakapanu Raheli kamgambiriti Yakobu, "Biliha yaya gwangu mdala kapanu, gugonji nayu su mpati wana kupitira yomberi."

4 Su Raheli kamlekeziya Yakobu, Biliha yaya gwakuyi. Yakobu kamgonja na Biliha, 5 na shakapanu kapatiti yinda na kumwiyulira Yakobu mwana mpalu. 6 Raheli kalonga, "Mlungu kantendera weri, kapikana kulira kwaneni na kampanana mwana mpalu." Mwana ayu kamshema Dani. 7 Biliha yaya mdala gwa Reheli kapatiti yinda kayi na kamwiwulira Yakobu mwana mpalu gwa pili. 8 Shakapanu Raheli kalonga, "Tulilewiti nentu na dada gwangu na neni nimkanga." Su mwana ayu kamshema Nafutali.

9 Leya pakawoniti koya kwiyula wana, yomberi kamtoliti Zilipa, yaya gwakuyi mdala na kampanana Yakobu mpalu gwakuyi su kaweri mdala gwakuyi. 10 Zilipa kamwiwulira Yakobu mwana mpalu. 11 Leya katakula, "Bahati iherepa." Su kampanana mwana litawu Gadi. 12 Zilipa yaya gwa Leya, kamwiwuliriti Yakobu mwana gwa pili mpalu. 13 Leya kalonga, "Bahati iherepa, vinu wadala awa hawanshemi nemeru." Su kampanana mwana litawu Asheri.

14 Mushaka sha kubena nganu, Rubeni kagenditi kulirambu na aku kapatiti shimeru, mishigira yakuwi yaiweza kumtenda mdala kawezi kupata yinda, su kamjegeriti Leya mawu gwakuyi. Reheli kamgambira Leya, "Shondi shondi, gumpanani mishigira yakawera nayu mwana gwaku, ilii yaiweza kumtenda mdala kapati yinda."

15 Kumbiti Leya kamgambiriti pakakalipa, "Hashi ikutoshiti ndiri kumtola mpalu gwangu, na vinu gufira gutoli mishigira yaimtenda mdala kawezi kupata yinda, mishigira yakawera nayu mwana gwangu?"

Raheli kamwankula, "Handa pagumpanana mishigira ayi yakawera nayu mwana gwaku, Yakobu hakagonji na gwenga pashiru leru." 16 Su Yakobu pakaweriti kankuwuya kulawa kulirambu, Leya kagenditi kumwanka, su kamgambira, "Leru mpaka gugonji na neni, toziya nikuazima kwa mshigira yaimtenda mdala kawezi kupata yinda, mishigira yakawera nayu mwana gwangu." Su Yakobu kagonjiti kwa Leya pashiru pamu.

17 Mlungu kapikana kuluwa kwa Leya na yomberi kapatiti yinda kamwiwulira Yakobu mwana mpalu gwa muhanu. 18 Leya kalongiti, "Mlungu kampanana shanfiriti toziya nimpananiti mpalu gwangu, yaya gwangu mdala." Su kampanana mwana litawu Isakari. 19 Leya kapatiti kayi yinda na kamwiwuliriti Yakobu mwana mpalu gwa sita. 20 Yomberi kalongiti, "Mlungu kampananiti lifupu lya upeleru. Vinu mpalu gwangu hakanjimiri toziya nimwiwulira wana wapalu sita." Su kampanana mwana litawu Zabuloni. 21 Shakapanu kamwiwula mwana mdala kamshema Dina.

22 Shakapanu Mlungu kamuhola Raheli, kajimiriti kuluwa kwakuyi, kamtenditi kapati mwana. 23 Raheli kapatiti yinda, kamwiwula mwana mpalu, yomberi kalonga, "Mlungu kambusilira soni yangu." 24 Su kampanana mwana litawu Yusufu, yomberi pakalonga, "Mtuwa Mlungu kanongeri mwana mpalu gwingi."

25 Raheli pakamwiyuliti kala Yusufu, Yakobu kamgambira Labani, "Gundekeziyi mbuyi muisi yangu. 26 Gumpanani wadala wangu pamuhera na wana wangu yawalawiraniti na kukutendera lihengu. Gwenga guvimana kwantambu shyasi gaa shanukutendiriti lihengu."

27 Kumbiti Labani kamgambiriti, "Gundeki na neni ntakuli. Nivimana kwa kutunga kuwera Mtuwa Mlungu kantekelera toziya ya gwenga." 28 Yomberi kendereyiti kulonga, "Gutakuli shibenamgongu shaku na neni hanikupanani."

29 Yakobu kamgambira, "Gamweni gwenga guvimana ntambu yanikutenderiti lihengu na ntambu yanikuloleriti weri wankanyama waku. 30 Pamberi pa kwiza kwa gwenga, guweriti na ulunda utangala ndiri, ulunda waku wongerekiti nentu na Mtuwa Mlungu kakutekeleriti nentu kwoseri kwang'enditi. Kumbiti vinu haniyiloleri ndii kaya yangu?"

31 Labani kamkosiya, "Nkupi shishi?" Yakobu kamwankula, "Hapeni gumpanani shoseri. Hanendereyi kuwalolera wankanyama waku payiwera haguntenderi shitwatira ashi. 32 Gundekeziyi mpiti pakati pa vipinga vya wankanyama waku leru, mbaguli kuwatula gweka kila kondolu yakawera na madowa na mabaka na kila kondolu yakawera mtitu na mbuzi yawawera na madowadowa na mabakamabaka. Ashi hashiweri shibena mgongu shaneni. 33 Su mgohilila gwangu hagung'ambiri shakapanu, pagwiza na kuwona shibenamgongu shangu. Mbuzi yoseri yakahera madoadoa ama mabakabaka, ama kondolu yoseri yakawera mtitu ndiri mulipinga lyangu lya wankanyama, ayu hakaweri wamwiwa."

34 Labani kalongiti, "Yina! Iweri ntambu yagulongiti." 35 Kumbiti lishaka lilaa lii, Labani kagenditi kuwabagula gweka wankanyama woseri washipalu yawawera na madowadowa na wambuzi woseri washidala yawawera na madowadowa na mabakabaka, kila nkanyama yakaweriti mfufu mushimba mwakuyi na kila kondolu mtitu, woseri kawatuliti pasi pa uloleruwa wa wana wakuyi. 36 Shakapanu Labani kalikala gweka na Yakobu mwanja gwa shaka sha mashaka matatu, Yakobu kendereyiti kuwalolera wankanyama wa Labani yawasigaliti.

37 Shakapanu Yakobu katoliti fimbu ya mtera gwa mwalamoni, kayibandula misitali mifufu iwoneki mufimbu azi. 38 Kazigolosiya fimbu zilii zakabanduliti palongolu pa wankanyama mulinegu lya mashi pahala wankanyama pawaweriti wankwiza kulanda mashi. Su wankanyama pawiziti kulanda mashi, toziya waweriti mushaka sha kupata yinda, 39 su wapatiti yinda kulongolu kwa fimbu azi, wawiwuliiti wankanyama yawawera na malembu na mabakabaka pamuhera na madoadoa.

40 Yakobu kawatula gweka wakondolu na wambuzi awa, shakapanu mushaka sha wankanyama kupata yinda, yomberi kawaloleziya muwankanyama yawawera na malembu na yawawera watitu mushipinga sha Labani. Su kwa ntambu ayi, Yakobu kapatiti shipinga sha wankanya wakuyi mweni, kalihanganiyiti ndiri na shipinga sha wankanyama wa Labani.

41 Kila shaka sha wankanyama sha kupata yinda pashisokiti, Yakobu kazituliti fimbu zilii kulongolu kwawu mulinegu lya mashi, su wankanyama waweri na yinda kupitira fimbu azi. 42 Kumbiti kazitula ndiri fimbu azi kulongolu kwa nkanyama legilegi pawaweriti na yinda. Katepu hera wankanyama legilegi waweriti wa Labani na yawanenepa waweriti wa Yakobu. 43 Su Yakobu kaweriti mlunda nentu, kaweriti na vipinga vikulu vya wankanyama, wantumintumi wadala na wapalu, wankanyama ngamiya na wankanyama punda.