1 Su Israeli kanjiti mwanja gwakuyi pamuhera na ulunda wakuyi woseri. Pakasokiti Beeri Sheba, yomberi kamlavilira tambiku Mlungu gwa Isaka tati gwakuyi.

2 Mlungu kayoweriti na Israeli mundotu pashiru, kamshema, "Yakobu! Yakobu!"

Yakobu kawankula, "Yina! Neni napanu."

3 Mlungu kamgambira, "Neni ndo Mlungu, Mlungu gwa tati gwaku, nagutira kugenda Misri. Paguwera aku hanikutendi guweri na wantu wavuwa. 4 Neni namweni hang'endi pamuhera na gwenga aku Misri na kukuwuziya aku Kanaani. Yusufu hakaweri na gwenga shaka paguhowa."

5 Su Yakobu kawukiti Beeri Sheba. Wana wakuyi wamtoliti yomberi na wananguta wawu wadidini pamuhera na wadala wau mumbutuka zyakukwegwa na farasi, zilii Farao zyakazijegiti kumtola. 6 Womberi watoliti vulaa mifugu yawu pamuhera na ulunda wawu woseri yawaupatiti muisi ya Kanaani, su wagenditi Misri. 7 Yakobu kashitoliti shileri shakuwi shoseri, wana wakuyi na wazukulu wakuyi wapalu na wadala, woseri kagenditi nawu Misri.

8 Shiyuwuku sha Israeli shashigenditi pamuhera na yomberi waweriti Rubeni shipanta njira wakuyi, 9 pamuhera na wana wa Rubeni, Hanoki na Palu na Hesironi na Karimi. 10 Simiyoni pamuhera na wananguta wakuyi, Yemueli na Yamini na Ohadi na Yakini na Sohari na Shauli, ulii yakiwuyikiti kwa mdala muntu gwa Kanaani.

11 Wana wa Lawi waweriti Gorisheni na Kohati na Merari. 12 Wana wa Yuda waweriti Eri na Onani na Shela na Peresi na Zera. Kumbiti Eri pamuhera na Onani wahowiti muisi ya Kanaani.

Wana wa Peresi waweriti Hesironi na Hamuli.

13 Wana wa Isakari waweriti Tola na Puva na Yashubu na Shimironi. 14 Wana wa Zabuloni waweriti Seredi na Eloni na Yaleeli. 15 Womberi ndo wana Leya yakamwiwuliriti Yakobu kulii Padan Aramu, pamuhera na Dina muhinga gwakuyi. Wana wakuyi na wahinga wakuyi pamuhera na wazukulu wakuyi waweriti wantu malongu matatu na ntatu.

16 Wana wa Gadi waweriti Sifioni na Hagi na Shuni na Esiboni na Eri na Arodi na Areli. 17 Wana wa Asheri waweriti Imina na Ishiva na Ishivi na Beria na Sera dada gwawu. Wana wa Beria waweriti Heberi na Malikieli.

18 Womberi ndo wananguta wa Zilipa, ulii yakamwiwuliriti Yakobu, Labani yakampananiti muhinga gwakuyi Leya, su woseri waweriti wantu lilongu na sita.

19 Raheli kamwiwuliriti Yakobu wana wawili. Yusufu na Benjamini. 20 Aku Misri, Asenati muhinga gwa Potifera, ulii yakaweriti mtambika gwa lushi lwa Oni, yomberi kamwiwuliriti Yusufu wana wawili, Manasi na Efraimu.

21 Wana wa Benjamini waweriti Bela na Bekeri na Ashibeli na Gera na Naamani na Ehi na Roshi na Mupimuna na Hupimu na Aridi. 22 Womberi ndo wananguta wa Raheli yakamwiwuliriti Yakobu. Woseri waweriti wantu lilongu na msheshi.

23 Dani pamuhera na Hushimu mwana gwakuyi. 24 Wana wa Nafutali waweriti Yaseeli na Guni na Yeseri na Shilemu. 25 Womberi waweriti wananguta wa Biliha, ulii yakamwiwuliriti Yakobu, yaya mdala Labani yakampananiti Raheli muhinga gwakuyi.

26 Wantu woseri yawagenditi Misri pamuhera na Yakobu, walii yawaweriti wantu wa shileri shakuwi, pota kuwalanga wamikamwana wakuyi, womberi waweriti wantu malongu sita na sita. 27 Pamuhera na wananguta wawili, Yusufu yakawapatiti aku Misri, woseri wa shileri sha Yakobu shashigenditi Misri, waweriti wantu malongu saba.

28 Su Yakobu kamlonguziya Yuda kugenda kwa Yusufu kumluwa waliwoni aku lushi lwa Gosheni. Womberi pawasokiti mlushi lwa Gosheni, 29 Yusufu kakweniti mbutuka yakuwi ya kukweguwa na farasi, su kagenditi kumwanka Israeli, tati gwakuyi aku lushi lwa Gosheni. Pakasokiti kwa tati gwakuyi, yomberi kamkisikiliti na kaliriti nentu.

30 Israeli kamgambiriti Yusufu, "Vinu nakala kuhowa, toziya nikuwona na kuvimana kuwera gwankali mkomu."

31 Yusufu kawagambiriti walongu wakuyi na woseri wa kaya ya tati gwakuyi, "Nankugenda kumgambira Farao, walongu wangu na kaya ya tati gwangu, yawaweriti muisi ya Kanaani wiza kwaneni. 32 Wantu awa ndo walolera wa wankanyama, wiza na vipinga vikulu vya wakondolu na wambuzi na wang'ombi pamuhera na kila shintu shawaweriti nashi.’ 33 Su Farao pakawashema na kuwakosiya, hashi, mwenga mtenda lihengu gaa? 34 Mwenga mumwankuli, twenga wantumintumi waku, twawalolera wa wankanyama kwanjira uwana mpaka leru, toziya ndo ntambu yawaweriti watati wetu. Mtakuli ntambu ayi su mpati ulekeziwu wa kulikala mlushi lwa Gosheni." Yusufu kalongiti hangu, toziya walolera woseri wa wankanyama wawera nkalaliru kwa wantu wa Misri.