1 Yusufu wamjegiti mpaka Misri, muntu gwa Misri yumu yakashemitwi Potifa, ulii yakaweriti mkulu gwa Farao na kaweriti mkulu gwa shipinga sha ulolera, yomberi kamuhemeriti kulawa kwa Waishimaeli yawamjegiti Misri.

2 Mtuwa Mlungu kaweriti pamuhera na Yusufu na kamtenditi kaherepi nentu mushila shintu shakatenditi. Yomberi kalikaliti mnumba mwa Mmisri mtuwa gwakuyi, 3 na mtuwa gwakuyi kavimaniti kuwera Mtuwa Mlungu kaweriti pamuhera na Yusufu, ndo yakatenditi vitwatira vyoseri kwa Yusufu. 4 Su Yusufu kapatiti upendeleu kulongolu kwa Potifa, yomberi kaweriti ntumintumi gwakuyi gwa gweka, kamtenditi kaweri mgolokera gwa numba yakuwi na mlolera wa ulunda wakuyi woseri. 5 Kwanjira shaka shilii ashi Potifa pakamtenditi Yufusu kaweri mgolokera gwa numba yakuwi, Mtuwa Mlungu kayitekeleriti numba ya Mmisri ayu toziya ya Yusufu. Matekeleru ga Mtuwa Mlungu gaweriti kwa kila shakaweriti nashu mnumba na mumalambu. 6 Su Potifa kalekiriti shoseri shakaweriti nashu muulolera wa Yusufu, viraa Potifa kalekiti kutenda shoseri kumbiti shiboga shakuwi mweni.

Yusufu kaweriti muntemba kaherepa na gwa kufiriziya. 7 Pashaka tunga mdala gwa Potifa keniti matamata na Yusufu na kumgambiriti, "Gugonji na neni."

8 Kumbiti Yusufu kalema na kumgambira mdala gwa mtuwa gwakuyi, "Gupikanili! Mpalu gwaku kampananiti uwezu wa kila shintu pakaya panu, toziya napanu, katenda ndiri shintu shoseri kayi. 9 Kwahera muntu yakawera mkulu kuliku neni mnumba amu. Mpalu gwaku kandewelera ndiri shintu shoseri ira gwenga hera, toziya gwenga gwamdala gwakuyi. Hapeni ntendi shitwatira shidoda gambira ashi na kutenda vidoda kulongolu kwa Mlungu." 10 Tembera mdala ulii kendereyiti kumgambira Yusufu kila lishaka, kumbiti Yusufu kalemiti kugonja nayu ama kuwera pakwegera na yomberi.

11 Lishaka limu Yusufu kingiriti mnumba kutenda mahengu gakuyi na kuweriti kwahera ntumintumi yoseri yakaweriti kankutenda lihengu mnumba. 12 Su mdala gwa Potifa kamukamuliti yomberi kwa kulikola lihabiti lyakuyi na kumgambira, "Gwizi gugonji na neni!" Kumbiti Yusufu kashapiriti na kumlekera lihabiti lyakuyi mumawoku mwakuyi, su katugiriti kunja. 13 Mdala ulii pakawoniti kuwera Yusufu kalileka lihabiti lyakuyi mumawoku mwakuyi na katugiriti kunja, 14 su kawashemiti wantumintumi wa mnumba mwakuyi na kuwagambira, "Mloli! Mweburaniya ayu yatujegitwi panu kutuhigilanga, kiziti kwaneni pakafira kugonja na neni, kumbiti neni mbotanga. 15 Yomberi pakapikaniriti kuwera mbontanga, kalilekiti lihabiti lyakuyi na katugiriti kunja."

16 Su mdala ulii kalituliti lihabiti lilii mpaka mpalu gwakuyi pakawuyiti. 17 Shakapanu kamgambiriti shashirawiriti pakalonga, "Ntumintumi ayu Mweburaniya yagumjegiti kwa twenga kaniziriti su kanigirangi. 18 Kumbiti pambotangiti, yomberi kalekiti lihabiti lyakuyi na kutugira kunja."

19 Su Potifa pakapikaniriti visoweru vya mdala gwakuyi vyakamgambiriti, "Ayi ndo ntambu yakantendiriti ntumintumi gwaku." Potifa kaweriti na maya nentu. 20 Potifa kamtoliti Yusufu na kumtatira mushibetubetu pahala pawatatiritwi watatirwa wa mfalumi. Kumbiti ata Yusufu pakaweriti kulii mushibetubetu, 21 Mtuwa Mlungu kaweriti pamuhera na Yusufu pakamtula weri ata kamtenda kapati upendelewu kulongolu kwa mkulu gwa shibetubetu. 22 Mkulu gwa shibetubetu ayu kamtula Yusufu kaweri mkulu gwa watatirwa woseri mushibetubetu mulii, kila shintu shashitendikiti amu, shitendikiti kwa uwezu wakuyi. 23 Mkulu gwa shibetubetu, katenditi ndiri kayi na shintu shoseri shakampananiti Yusufu toziya Mtuwa Mlungu kaweriti pamuhera na yomberi na kutenda weri mukila shintu shakashitenditi.