1 Pa mivinja miwili yoseri, Farao kalotiti ndotu. Yomberi kaweriti kagolokiti kumpeku kulushemba Naili, 2 kawawoniti wang'ombi saba waherepa pawalawa mulushemba na kuliya mahamba. 3 Shakapanu, wang'ombi wamonga saba yawayonditi nentu walawiti mulushemba Naili, wiziti na kugoloka pakwegera na wang'ombi walii waherepa, kumpeku kulushemba. 4 Wang'ombi awa yawayonditi nentu wawaliyiti wang'ombi walii wamonga waherepa. Su Farao kimukiti mumpota. 5 Pakagonjiti kayi kalotiti mala ya pili, kawoniti mikunguwi saba mikulu na iherepa yankutomola mushitepu shimu. 6 Shakapanu pa ayi, mikunguwi imonga saba iyonda na yaiyumiziwitwi na lihega liyuma lya kushiwala lilawira. 7 Mikunguwi saba iyonda iyimiti mikunguwi saba mikulu yaimemiti mbuji. Su Farao pakimukiti kayambuliti kuwera kaweriti kankulota. 8 Shilawu yakuwi mandawira, Farao pakaweriti na shashatika nentu, kawashemiti wahawi woseri wa Misri pamuhera na yawawera na luhala, kawagambiriti ndotu zyakuwi, kumbiti kuweriti kwahera ata yumu yakaweziti kumtakulilira ndotu azi.

9 Shakapanu mlolera mkulu gwa virandu kamgambiriti Farao, "Leru niguhola ga nkositi! 10 Shaka tunga Farao kawakalaliriti wantumintumi wakuyi, neni pamuhera na mkulu gwa wahoshiya mabumunda, katutatiriti muliboma lya mkulu gwa shipinga sha walolera. 11 Pashiru pamu tulotiti ndotu, kila muntu kalotiti ndotu yakuwi yaiwera na mana yakuwi. 12 Su muntemba yumu Mweburaniya ntumintumi gwa mkulu gwa shipinga sha ulolera, kaweriti pamuhera na twenga mshibetubetu. Patumgambiriti kulota kwa twenga, yomberi kaweziti kumtakulira mana kwa kila muntu ntambu yakalotiti. 13 Ntambu yakatutakuliriti irawiriti ntambu iraa ilii. Neni mbuziwituwi mulihengu lyangu, mkulu gwa wahoshiya mabumunda kapingikitwi pamtera."

14 Su Farao kalagalira wamshemi Yusufu, yomberi wamlaviyiti mushibetubetu kalongola. Yusufu pakamogiti kala na kuvala nguwu zakuwi zingi, kiziti kulongolu kwa Farao.

15 Farao kamgambiriti Yusufu, "Neni ndota kumbiti kwahera muntu yakaweziti kuntakulira ndotu yaneni. Mpikanira nzyumi zaku kuwera gwenga pagugambirwa ndotu guweza kuitakulira."

16 Yusufu kamgambira Farao, "Hapeni wezi kuitakulira kumbiti Mlungu hakakupanani lyankulu liherepa."

17 Shakapanu Farao kamgambiriti Yusufu, "Ndotiti kuwera ng'olokiti mumbwega mwa lushemba lwa Naili. 18 Moniti wang'ombi saba waherepa na wanenepa pawalawira mulushemba na kuliya mahamba. 19 Pa wang'ombi awa, wafatitwi na wang'ombi wamonga saba yawaweriti goyigoyi, wababani na wayonditi nentu. Neni hanenipati kuwawona wang'ombi wa ntambu ayi muisi ya Misri. 20 Su wang'ombi walii yawayonditi nentu, wawaliyiti wang'ombi wamonga saba walii yawanenepiti. 21 Kumbiti wang'ombi walii yawayonditi ata pawawaliyiti kala wang'ombi yawanenepiti, kwahera muntu yoseri mekavimani kuwera wawaliyiti wayawu, toziya waweriti wayonda ntambu yawaweriti kwanja. Shakapanu neni nimukiti mumpota.

22 Vilaa mundotu yamonga moniti mikunguwi saba iherepa yaimemiti viboga payitomoliti mushitepu shimu. 23 Shakapanu ifatiti mikunguwi saba yamonga yahera shintu, iyonda na iyumisiwitwi na lihega liyuma lya kushiwala. 24 Mikunguwi saba ilii yaiyonditi, iyimiti mikunguwi saba ilii yaiherepa. Su neni niwagambiriti wahawi kumbiti kwahera muntu yakaweziti kuntakulira."

25 Shakapanu Yusufu kamgambiriti Farao, "Ndotu zaku zoseri mbili ziwera na mana yimu, Mlungu kamgubutulira Farao shilii shakagenda kushitenda. 26 Ng'ombi saba waherepa walii ndo mivinja saba, mikunguwi saba iherepa viraa ndo mivinja saba. Ndotu azi ziwera na mana yimu. 27 Wang'ombi saba yawayonditi nentu, walii yawawafatiti walii yawanenepa na mikunguwi saba yahera shintu, yaiyumisiwitwi na lipuga liyuma lya kushiwala, mana yakuwi mivinja saba vya njala.

28 Ntambu yanikugambiriti, gwee Farao, Mlungu kakugubutulira vitwatira vyavigenda kulawira pakwegera. 29 Hakuweri na mivinja saba vya viboga vivuwa muisi yoseri ya Misri. 30 Kumbiti shakapanu hakuweri na mivinja saba ya njala na mivinja saba yoseri ya viboga hayilyaluwi, toziya njala haiyagamiziyi isi ayi. 31 Mivinja ya viboga vivuwa ayi hayilyaluwi nakamu toziya njala yaigenda kulawila hayiweri nkulu nentu. 32 Kulota kwakuyi kuwuyiriti mala mbili kwa kulifana kulanguziya kuwera nakaka Mlungu hakatendi shintu hashilawiri pakwegera."

33 "Su vinu gwee Farao, gumsyaguli muntu yakawera na mahala na luhala, gumpanani lihengu lya kuigolokera isi yoseri ya Misri. 34 Kayi gwee Farao, guwasyaguli wagolokera muisi, guwalagaliri wajojoniri semu ya muhanu ya mabenu goseri ga Misri mushaka ashi sha mivinja saba ya viboga vivuwa. 35 Guwalagaliri wagolokera awa wajojoniri shiboga shoseri mumivinja saba yaiyiza ya viboga vivuwa. Viboga avi vituluwi kwa ulolera gwaku gwee Farao, shiweri shigubikiru kwa lushi zoseri na wavituli weri viboga avi. 36 Shiboga ashi hashiweri shigubikiru sha isi ya Misri naiyiza kwagamila kwa njala, mivinja saba yaiza shakapanu."

37 Shisoweru shakatakuliti Yusufu shiwoneka shiherepa kulongolu kwa Farao pamuhera na wakulu yawaguwi woseri. 38 Su Farao kawakosiya wakulu wayaguwi, "Hashi, hatuwezi kumpata muntu yoseri gambira ayu, Rohu gwa Mlungu kamngati mwakuyi?"

39 Shakapanu kamgambira Yusufu, "Toziya Mlungu kakugubutulira goseri aga, kwahera muntu gwingi yakawera na mahala na luhala gambira gwenga. 40 Gwenga haguweri mgolokera gwa numba yaneni na wantu waneni woseri hawaweri pasi pa malagaliru gaku. Neni hera ndo mkulu kuliku gwenga toziya Nilivaga mushibanta sha shifalumi.

41 Su Farao kamgambiriti Yusufu, guloli, nikusyagula gwenga guweri mgolokera muisi yoseri ya Misri." 42 Shakapanu Farao kayivula peti yakuwi ya shimaniziru kulawa mushyala shakuwi na kushivalisiya shyala sha Yusufu. Kamvalasiya vilaa mahabiti ga shifalumi na ukufu wa zahabu msingu. 43 Farao kamkweniziya mumbutuka yakuwi ya pili yaikwegitwi na farasi, "Walolera walongoleriti kulongolu kwa Yusufu pawabotanga na kulonga, msegeri kutali munjira! Msegeri kutali munjira! Farao kampanana Yusufu ugolokeru muisi yoseri ya Misri." 44 Kayi Farao kamgambira Yusufu, "Neni ndo Farao! Muntu yoseri muisi yoseri ya Misri nakanyasula liwoku ama ligulu lyakuyi pota shibali shaku." 45 Farao kampananiti Yusufu litawu Safenatipanea, kamuyugira Asenati muhinga gwa Potifera, ulii mtambika gwa lushi lwa Oni. Su Yusufu kanjiti kutyangira isi yoseri ya Misri.

46 Yusufu kaweriti na mivinja malongu matatu pakanjiti kumtendera Farao, mfalumi gwa Misri. Kalawiti muliboma lya Farao na katyangiriti isi yoseri ya Misri.

47 Mushaka sha mivinja saba ilii ya viboga vivuwa, malambu ga Misri galaviyiti viboga vivuwa nentu. 48 Yusufu kajojoniriti viboga vyoseri, mushaka ashi sha mivinja saba ya viboga na kuvitula shigubikiru mlushi za Misri. Mukila lushi katuliti shigubikiru sha viboga kulawa mumalambu yagaweriti pakwegera na lushi alu. 49 Yusufu katuliti shigubikiru sha viboga vivuwa nentu viwera vivuwa gambira muhanga gwa bahari ata viweza ndiri kuwalangwa.

50 Pamberi pa mivinja vya njala kwiza, Yusufu kaweriti kapatiti kala wana wapalu wawili kupitira mdala gwakuyi Asenati muhinga gwa Potifera, ulii mtambika gwa lushi lwa Oni. 51 Yusufu kamshema mwana gwakuyi shipanta njira litawu Menasi, yomberi pakalonga, "Mlungu kantenda nilyaluwi kutabika kwangu kwoseri pamuhera na walongu wa tati gwangu. 52 Mwana gwakuyi gwa pili kamshema Efraimu, pakalonga, Mlungu kampanana wana muisi ya kutabika kwaneni."

53 Mivinja ilii saba ya viboga vivuwa muisi ya Misri ipititi. 54 Yanjiti mivinja saba ya njala ntambu yaitakulitwi na Yusufu kwanja. Isi zimonga zoseri ziweriti na njala, kumbiti isi yoseri ya Misri iweriti na shiboga shivuwa. 55 "Isi yoseri ya Misri paiweriti na njala, Wantu wanjiti kumlilira Farao kawapanani shiboga. Na Farao kawagambiriti wantu woseri wa Misri, mgendi kwa Yusufu, shakawagambira mtendi."

56 Njala payongeriti kuwera nkulu na kweneya muisi yoseri, Yusufu kavuguliti hanja zoseri na kawashuwuzira Wamisri shiboga. 57 Vilaa wantu wa isi zimonga pasipanu wiziti Misri kuhemera shiboga kwa Yusufu, toziya njala iweriti nkulu nentu pasipanu poseri.