1 Isaka kaweriti mgogolu na masu gakuyi ganjiti kuwona ndiri, su kamshemiti Esawu mwana gwakuyi mkulu na kamgambira, "Mwana gwangu!" Na yomberi kitikira, napanu tati!

2 Isaka kalonga, "Guloli, neni vinu namgogolu na nilimana ndiri lishaka lyaneni lya kuhowa. 3 Vinu gutoli upindi waku na misali yaku, gugendi kuntundu gwakagomiziyi nkanyama gunjegeri. 4 Shakapanu guntandiri shiboga shilii shinoga shanfira, gunjegeri su ndiyi, su hanikupeteri mashi pamberi pa kuhowa kwangu."

5 Kumbiti Isaka pakaweriti kunkuyowera na Esawu, Rebeka kaweriti kankupikinira. Su Esawu pakagenditi kuntundu kugomiziwa wankanyama, 6 Rebeka kamgambiriti Yakobu mwana gwakuyi, "Nimpikanira tati gwaku pakamgambira kaka gwaku Esawu, 7 kanjegeri nkanyama yakamgomiziyiti na kamtelekeri shiboga shinoga ndiyi, hanikupeteri mashi kulongolu kwa Mtuwa Mlungu, pamberi neni hanehowi. 8 Vinu mwana gwangu, gupikanili weri shanukugambira. 9 Gugendi muliboma lya wankanyama, gunjegeri wana wawili wa mbuzi waherepa, su neni hantandiri shiboga shinoga ntambu yakafira tati gwaku. 10 Shakapanu gumjegeri tati gwaku kaliyi, kapati kukupetera mashi pamberi pa kuhowa kwakuyi."

11 Kumbiti Yakobu kamgambiriti Rebeka mawu gwakuyi, "Guliholi kaka gwangu Esawu kana nvili zivuwa mushimba, neni nahera. 12 Hayiweri hashi tati pakanshikula na kuyambuya kuwera nimzyanga? Hanilijegeri pangilu namweni badala ya matekeleru."

13 Mawu gwakuyi kamgambira, mwana gwangu guleki pangilu yoseri impati neni, "Gwenga gutendi ntambu yanikulagalira, gugendi gwakanjegeri wana wa mbuzi." 14 Su Yakobu kagenda, katola wana wawili wa mbuzi, kamjegera mawu gwakuyi na yomberi katandira shiboga shinoga shakafiriti Isaka tati gwakuyi. 15 Shakapanu Rabeka katola nguwu ziherepa za Esawu mwana gwakuyi mkulu yakaweriti nazi ukaya, kamvalasiya Yakobu mwana mpusu. 16 Vilaa kamvalasiya lukuli lwa wana wa mbuzi, mumawoku na semu zazihera nvili musingu yakuwi. 17 Shakapanu kampanana shiboga shinoga shilii na libumunda lyakalitandiriti.

18 "Su Yakobu kingira mnumba mwa tati gwakuyi, kamshema tati gwangu!

Na yomberi kitikira, napanu, gwagaa gwenga mwana gwangu?"

19 Yakobu kamwankula tati gwakuyi, neni Esawu, shipanta njira waku. "Ntenda ntambu yagung'ambiliti, vinu gulikali na guliyi shilii shangomiziyiti, su gupati kumpetera mashi."

20 Kumbiti Isaka kamkosiyiti mwana gwakuyi, "Iwera hashi gupata kalongola ntambu ayi shagugomiziyiti mwana gwangu? Yakobu kamwankula, Mtuwa Mlungu, Mlungu gwaku kampananiti.

21 Shakapanu Isaka kamgambiriti Yakobu, gusegeleri pakwegera mpati kukushinkula su nivimani kuwera nakaka gwenga gwamwana gwangu Esawu ama ndala." 22 Yakobu kamgenderiti kulikala pakwegera na Isaka tati gwakuyi, "Yomberi kamshinkula shinkula na kulonga, liziwu lya Yakobu, kumbiti mawoku ga Esawu." 23 Yomberi kayambuliti ndiri, toziya mawoku gakuyi gaweriti gawera na nvili gambira mawoku ga Esawu kaka gwakuyi, su kanjiti kumpetera mashi. 24 Yomberi kamkosiyiti kayi, "Nakaka gwenga gwa mwana gwangu Esawu?

Yomberi kawankula, yina.

25 Shakapanu Isaka kalongiti, mwana gwangu gunjegeri vinofu avi ndiyi, su hanikupeteri mashi. Yakobu kamjeriti na yomberi kaliyiti, kamjegiriti vilaa divayi kalanda. 26 Isaka tati gwakuyi kamgambiriti, mwana gwangu, gusegeleri pakwegera na gunoni. 27 Su yomberi kamsegelera pakwegera na kamnona, tati gwakuyi pakapatiti ununkira wa nguwu zakuwi, yomberi kampeteriti mashi na kulonga,

guloli, ununkira wa mwana gwangu

gulifana gambira ununkira wa lirambu Mtuwa Mlungu lyakalitekeleriti!

28 Mlungu kakumiminiri mangami ga kumpindi,

kakupanani litapaka lyaliwera na mbotu,

kakupanani viboga na divayi ivuwa.

29 Wantu wakutenderi gwenga

na wantu wa isi wakusuntamaliri.

Guweri mkolamlima kwa walongu waku,

kapangiluwi yoseri yakakupangila,

na katekelerwi yoseri yakakutekelera!"

30 Isaka pakamaliliti kumpetera mashi Yakobu na Yakobu pakaweriti kankuwuka kulongolu kwa tati gwakuyi, Esawu kaka gwakuyi kawuya kulawa mukugomiziya. 31 Esawu katandira shiboga shinoga vilaa, "Kamjegera tati gwakuyi na kamgambira, shondi shondi tati, gwimuki guliyi shangomiziyiti neni mwana gwaku, su gupati kumpetera mashi!"

32 "Isaka kamkosiya, gwenga gwa gaa?

Yomberi kamwankula, neni mwana gwaku, Esawu shipanta njira waku.

33 Isaka katetema nentu kwa lyoga, katakula, hashi, gaa yakagomiziyiti nkanyama na kunjegera, neni ndiyiti kala pamberi pa gwenga kwiza? Nimpetera kala mashi, yomberi Watekeleritwi kala.

34 Esawu pakapikaniriti visoweru vya tati gwakuyi, kalira kwa liziwu na kwa utama mumoyu na kumgambira tati gwakuyi, shondi shondi tati gwangu, gumpeteri mashi naneni vilaa!

35 Kumbiti Isaka kalonga, Mlongu gwaku kiza kwa kunzyanga na katola matekeleru gaku.

36 Esawu kalonga, ndo mana kashemwa Yakobu! Katola lupenyu lwangu mala mbili, kwanja katola vintu vyaneni vyoseri vya shipanta njira na vinu katola matekeleru gangu. Shakapanu kamkosiya tati gwakuyi, hashi, gundekera ndiri tekeleru lyoseri?

37 Isaka kamwankula, nimtenda kala Yakobu kaweri mkolamlima gwaku na kumpanana walongu wakuyi woseri waweri wantumintumi wakuyi, nimtenda kaweri na viboga pamuhera na divayi. Hashi, mwana gwangu, nikutenderi shishi vinu?

38 Esawu kamgambira tati gwakuyi, tati, gwana litekeleru limu hera? Tati gumpeteri mashi naneni! Su Esawu kanjiti kulila kwa liziwu. 39 Shakapanu Isaka tati gwakuyi kamgambiriti,

pakulikala paku hapaweri kutali na litapaka lyaliwera na mbotu,

kutali na mangami ga kumpindi.

40 Hagulikali kwa ligumba lyaku,

na hagumtenderi mpusu gwaku,

kumbiti pagulema,

haguweri mlekeru kulawa kwa mpusu gwaku." 41 Su Esawu kamkalaliriti "Yakobu toziya tati gwakuyi kampeteriti mashi Yakobu. Esawu kaligambiriti mweni, mashaka ga kudaya shiwembu pagapera, hanimlagi mpusu gwangu Yakobu."

42 Kumbiti Rebeka pakavimaniti liholu lya mwana gwakuyi shipanta njira, "Kamgambiriti Yakobu, gulikali weri, kaka gwaku Esawu kankulihola mumoyu kukulaga. 43 Vinu mwana gwangu gutendi shanukukugambira. Gutugili kugenda kwa kaka gwangu Labani aku Harani, 44 gulikali na yomberi mpaka maya ga kaka gwaku pagapera. 45 Mlongu gwaku pakahera maya na gwenga na kalyaluwa shagumtendiriti, hanikujegeri ujumbi guwuyi. Kwashishi niwapotuziyi woseri wawili kwa shaka shimu?"

46 Rebeke kamgambira Isaka, "Nahera nemeru nakamu mumakaliru gangu toziya ya wadala awa wa aku Hiti. Paiwera Yakobu hakayugi yumu gwawu gwa wadala awa kwa Wahiti, neni hapeni weri na mota ya kulikala."