1 Yusufu kagenditi kwa Farao, kamgambira, "Tati gwangu na walongu wangu pamuhera na wakondolu na wang'ombi na ulunda wawu woseri, wasoka kulawa isi ya Kanaani. Vinu wa aku mkowa gwa Gosheni." 2 Yusufu kawasyaguliti walongu wakuyi muhanu kawamaniziya kwa Farao.

3 Farao kawakosiya womberi, "Mwenga mtenda lihengu gaa?"

Womberi wamwankula, "Twenga wantumintumi waku twawalolera wa wankanyama ntambu yawaweriti wambuyi wetu." 4 Shakapanu womberi wamgambira Farao, "Twenga wantumintumi waku twiza kulikala gambira wahenga muisi amu toziya kwana njala nkulu aku Kanaani na kwahera maliziyu ga wankanyama wetu. Su vinu twankulwa guwalekeziyi wantumintumi waku walikali mumkowa gwa Gosheni."

5 Farao kamgambiriti Yusufu, "Tati gwaku na walongu waku wakwizira gwenga. 6 Isi yoseri ya Misri yapasi paku, su guwapanani tati gwaku na walongu waku semu iherepa ya isi ayi. Guwaleki walikali mumkowa gwa Gosheni. Handa paguwamana woseri yawawera waminika, guwatuli waweri wagolokera wa wankanyama waweni."

7 Shakapanu, Yusufu kamjega Yakobu tati gwakuyi kamlamsiyi Farao na Yakobu kampananiti Farao matekeleru gakuyi. 8 Farao kamkosiya Yakobu, "Hashi, gwana mivinja mininga?"

9 Yakobu kamwankula, "Mivinja yaweriti nayi gambira muntu gwa mwanja ndo mivinja miya yimu na malongu matatu. Mivinja ayi ivuwa ndiri na imemiti ntabiku, kayi hayenisoki mivinja yawalikaliti wagogolu wangu gambira wantu wa kuyerayera." 10 Su Yakobu kampeteriti mashi Farao, shakapanu kawukiti kulongolu kwa Farao.

11 Shakapanu Yusufu kawapananiti tati gwakuyi pamuhera na walongu wakuyi semu iherepa nentu mlushi lwa Ramesesi muisi ya Misri, paweri pahala pawu pa kulikala na womberi wapahaliti ntambu yailagaliritwi na Farao. 12 Yusufu kaweriti kankuwapanana shiboga tati gwakuyi na walongu wakuyi pamuhera na kaya yoseri ya tati gwakuyi kulawirana na mawalangu ga wantu yawawatumbiriti.

13 Shakapanu shiboga shipeliti nakamu muisi yoseri. Njala iweriti nkulu nentu, su iwatenditi wantu woseri muisi ya Misri na isi ya Kanaani wayonda. 14 Yusufu kajojoniriti mpiya zoseri zyazilawirana na kushuwuza viboga aku Misri na Kanaani, yomberi kazijegiti kunumba nkulu ya shifalumi ya Farao. 15 Mpiya za wantu wa Misri na Kanaani paziperiti, wantu woseri wa Misri wamwiziliti Yusufu na kumgambira, "Gutupanani shiboga. Hashi, kwa shishi tuhowi palongolu pa masu gaku? Guloli vinu mpiya zetu zipera."

16 Yusufu kawagambira, "Mjegi wankanyama wenu, haniwashuwuziyi viboga kwa kugalambuziyana na wankanyama, tembera mpiya za mwenga zipera." 17 Su womberi wamjegiriti Yusufu wankanyama wawu. Nayomberi kawapananiti shiboga kwa kugalambuziyana na wang'ombi na wakondolu na wambuzi na wankanyama punda wawu. Mushinja ashi shoseri Yusufu kawapananiti shiboga kwa kugambuliziyana na mifugu yawu yoseri.

18 Shinja shilii shashipeliti, womberi wamwiziliti kayi na kumgambira, "Hapeni tufifi unakaka kulongolu kwa mtuwa gwetu kuwera mpiya zyetu zipera na wankanyama wetu wawera ulunda waku. Vinu kwahera shoseri shashisigaliti kwajili ya mtuwa gwetu kumbiti twenga tuweri wamanda waku pamuhera na isi yetu. 19 Yashishi twenga tuhowi palongolu pa masu gaku, twenga pamuhera na isi yatwenga? Su gutuhemeri twenga pamuhera na isi yatwenga, hatuweri wamanda wa Farao. Gutupanani mbeyu su tulikali natwiza kuhowa, isi yatwenga naiza kuwera ushiwa."

20 Su Yusufu kahemera isi yoseri ya Misri iwera ulunda ya Farao. Kila muntu gwa Misri kashuwuziti lirambu lyakuyi, toziya njala iweriti nkulu nentu. Isi iweriti ulunda wa Farao, 21 Yusufu kawatenditi wantu waweri wamanda kulawa uwega wumu wa Misri mpaka uwega umonga. 22 Pamuhera na hangu, yomberi kahemeriti ndiri isi ya watambika, toziya womberi waweriti wankupata semu yawu kulawirana na semu yawapananitwi na Farao. Su womberi washuwuziti ndiri isi yawu.

23 Shakapanu Yusufu kawagambiriti wantu, "Mloli, niwahemerani kala woseri mwenga pamuhera na malambu genu kuwera ulunda wa Farao. Hampananwi mbeyu, mwenga hamugayali malambu genu. 24 Kumbiti mushaka sha kubenanga viboga, mwenga mumpanani Farao semu yimu pa semu za muhanu. Semu za msheshi zyazisigariti hamuzituli kuwera mbeyu kwajili ya malambu na kwajili ya shiboga shenu maweni mwenga pamuhera na wantu wa kaya yenu pamuhera na wana wenu." 25 Womberi wamwankula, "Mtuwa, gugalopola makaliru getu! Toziya gutulanguziya maheri gaku, twenga hatuweri wamanda wa Farao."

26 Su Yusufu katuliti liweri lilagaliru muisi ya misri, lilagaliru ali liwera mpaka leru kuwera semu yimu pa semu za muhanu za viboga haziweri za Farao. Isi ya watambika hera iweriti ndiri ya Farao.

27 Su wantu wa Israeli walikali mumkowa gwa Gosheni muisi ya Misri. Pawawera aku, womberi wapata ulunda uvuwa na wongerekiti nentu.

28 Yakobu kalikaliti muisi ya Misri mivinja lilongu na saba, mpaka pakasokiti mivinja miya na malongu msheshi na saba.

29 Shaka sha kuhowa kwakuyi pashiweriti pakwegera, Yakobu kamshemiti Yusufu mwana gwakuyi na kamgambira, "Vinu handa nakaka gunfira, gutuli liwoku lyaku mumawondu gangu, gulagili kuwera haguntenderi kwa ligoya na uheri nagunfindira aku Misri. 30 Kumbiti gumfindiri pamuhera na wambuyi waneni, guntoli kulawa Misri, gwakamfindiri mumapumba gawu."

Yusufu kamwankula, hantendi ntambu yagutakuliti.

31 Yakobu kamgambira Yusufu, gundapili! "Yusufu kamlapira. Shakapanu Israeli kamguwiriti Mlungu mumtuwi mwa mulisaga lyakuyi."