1 Vinu Abrahamu kaweriti mgogolu gwa mivinja ivuwa na Mtuwa kamtekeleriti mukila ntambu. 2 Abrahamu kamgambiriti ntumintumi gwakuyi yakaweriti mzewi kuliku wamonga na mgolokera gwa ulunda wakuyi woseri, "Gutuli mawoku gaku mumawondu gangu, 3 na neni Hanikulapiri kwa litawu lya Mtuwa, Mlungu gwa kumpindi na pasipanu, kuwera hapeni gumuyugiri mwana gwangu mdala yoseri muwamu mwa wahinga wa Wakanaani yanilikala nawu, 4 kumbiti hagugendi mpaka muisi yangu na kwa walongu wangu, gwakamsakuliri mdala mwana gwangu Isaka."

5 Ntumintumi kamkosiya, "Pamonga madala ayu hakalemi kugenda pamuhera na neni kwiza aku, payiwera hangu, hashi nimwuziyi mwana gwaku kuisi kwagulawiriti?"

6 "Abrahamu kamwankula, ndala! Guloli weri nagumwuziya mwana gwangu aku." 7 Mtuwa Mlungu gwa kumpindi, "Yakandaviyiti ukaya kwa tati gwangu na kulawa mulushi mwakayiwukiti na yakatakuliti na neni na kanagiliti kwa kulirapa kuwera hakashipanani shiyiwuku shaneni isi ayi. Yomberi hakamlagaliri ntumintumi gwakuyi gwa kumpindi kulongolu kwaku su gumjegeri mwana gwangu mdala kulawa aku. 8 Payiweri mdala ayu hakalemi kugenda pamuhera na gwenga, su kulirapa lya neni hapeni likuleweleri. Kumbiti kwa ntambu yoseri nagumwuziya aku mwana gwangu." 9 Su ntumintumi ayu katula liwoku lyakuyi muliwondu mwa Abrahamu mtuwa gwakuyi, kalirapa kuusu shitwatira ashi.

10 Shakapanu ntumintumi ulii katoliti wankanyama ngamiya lilongu wa mtuwa gwakuyi, kawuka pakawera na mafupu gaherepa ga kila ntambu. Yomberi kagenditi Misopotamia, mlushi lwakakaliti Nahori. 11 Pakasokiti aku, yomberi kawasuntamaziya wankanyama ngamiya pakwegera na linegu lyaliweriti kunja kulushi, iweriti pamihi shaka wadala waweriti wankugenda kulinegu kuteka mashi. 12 Shakapanu yomberi kamluwa Mlungu, "Gwee Mtuwa, Mlungu gwa mtuwa gwangu Abrahamu, guntangi leru na gumtenderi uheri mtuwa gwangu Abrahamu. 13 Guloli napanu pampeku pa linegu lya mashi, wahinga wenikaya wa lushi alu wiza kuteka mashi. 14 Su muhinga yang'enda kumgambira, gutuli vulu yaku ya mashi, gumpanani mashi nandi na yomberi pakalonga, gulandi na haniwapanani wankanyama ngamiya waku, yomberi kaweri ndo yagumsyaguliliti ntumintumi gwaku Isaka. Shitwatira ashi hashinanguziyi kuwera gumpanana uheri mtuwa gwangu."

15 Pamberi pakumalira kuluwa, kamkamu Rabeka kiziti pakalitwika vulu ya mashi mulikombi lyakuyi. Yomberi kaweriti muhinga gwa Betueli mwana gwa Milika, ulii yakaweriti mganafu gwa Nahori, mlongu gwa Abrahamu. 16 Muhinga ayu kaweriti kaherepa nentu, vilaa kaweriti luyenja, kaweriti hakeniliwoni na mpalu yoseri. Yomberi kiziti kulinegu lya mashi, kasulukiti kuteka mashi na kamemiziyiti vulu yakuwi na kakweniti kuwuya. 17 Su ntumintumi ulii kagenditi kalongola kuliwona na yomberi, kamgambira, "Shondi shondi, gumpanani mashi nandi kulawa muvulu yaku."

18 Muhinga kamwankula, "Gulandi mtuwa gwangu," na palaa palii katula vulu yakuwi, pakagukolera su kamlandisiyi. 19 Pakampananiti kala mashi, kamgambira, haniwatekeri mashi, "Mankanyama ngamiya wakuyi vilaa, walandi woseri mpaka watosheki." 20 Su yomberi katenditi kalongola, kawamiminira mashi ga vulu yakuwi pahala pa kulandira mashi, katugira kulinegu kateka mashi gavuwa na kuwalandasiya ngamiya wakuyi woseri. 21 Muntu ulii kaweriti kakumlola weri pota kutakula shoseri, su kavimani kuwera Mtuwa katenda uheri mumwanja gwakuyi ama ndala.

22 Ngamiya pawamaliriti kulanda mashi, ntumintumi ulii kampananiti muhinga ulii peti ya zahabu yaiwera nkulu na itopa, kampananiti vilaa bangili mbili zyaziwera nkulu na zitopa, kamvalasiya mumawoku gakuyi. 23 Kamgambira, "Shondi shondi gung'ambili, gwenga mshina gaa? Hashi, kwana shiwogu kwa twenga kugonja ukaya kwa tati gwaku?" 24 Rebeka kamwankula, "Neni muhinga gwa Betueli, mwana gwa Milika, mdala gwa Nahori. 25 Kwa twenga, kwana mahamba gavuwa ga kuwaliziya wankanyama pamuhera na pahala pakugonja wahenga."

26 Muntu ulii kasuntama makukama na kamguwiriti Mtuwa, 27 katakuliti, "Kakwisuwi Mtuwa, Mlungu gwa mtuwa gwangu Abrahamu, ulii yakalyaluwiti lagiru lyakuyi na ujimirika wakuyi kwa mtuwa gwangu. Mtuwa Mlungu kanongoziya namweni mpaka kwa walongu wa mtuwa gwangu."

28 Shakapanu muhinga ulii katugiti kuwagambira walongu wa mawu gwakuyi kuusu vitwatira avi. 29 Vinu Rebeka kaweriti na kaka gwakuyi yakashemwa Labani, yomberi kawukiti kalongola kuliwona na muntu ulii kulinegu. 30 Pamberi pa Labani kugenda kulinegu kulii, kaweriti kawona peti ilii na bangili mumawoku mwa dada gwakuyi na kupikanira vitwatira Rebeka vyakagambiritwi na muntu ulii. Labani kamwoniti muntu ulii kagolokiti pakwegera na wankanyama ngamiya wakuyi pampeku palinegu. 31 Labani kamgambira, "Gwizi kwa twenga gwenga gwagutekelerwa na Mtuwa Mlungu. Iwera hashi gugoloka panu? Neni ntandira kala na pahala pa kuwatula ngamiya waku."

32 Su ntumintumi ayu gwa Abrahamu kagenditi kwingira mnumba, Labani kawayopola ngamiya wakuyi na kawapananiti mahamba ngamiya wakuyi, kawapananiti yomberi pamuhera na wantu wakuyi, mashi ga kunaviya magulu gawu. 33 Su wamtandiriti shiboga, kumbiti yomberi kalongiti, "Hapeni ndiyi mpaka ntakuli shanfiriti kutakula."

Labani kamgambira, "Aya gutugambiri."

34 Muntu ulii katakula, "Neni ntumintumi gwa Abrahamu." 35 Mtuwa kamtekeleri nentu mkulu gwangu, na yomberi kaweri muntu kamanikana kampa vipinga vya wakandolu na mifugu ivuwa, madini ga mpiya na zahabu, wantumintumi wapalu na wadala, ngamiya na punda! 36 Sara mdala gwa mtuwa gwangu mwana na mtuwa gwangu kampa mwana ayu lunda yakuwi yoseri. 37 Mtuwa gwangu kantenda napiri pakatakula, "Namsyagulila mwana gwangu muhinga yoseri pakati pa wahinga wa Wakanaani yawalikala muisi yawu. 38 Su hagugendi mpaka isi yangu kwa walongu wangu, su gumsakulili mdala mwana gwangu Isaka. 39 Na neni nimgambiriti mtuwa gwangu, pamonga mdala ayu hakalemi kugenda pamuhera na neni kwiza aku, hantendi hashi? 40 Kumbiti yomberi kawankula, Mtuwa Mlungu yakanongoziya mumakaliru gangu, hakamtumi ntumintumi gwakuyi gwa kumpindi kagendi pamuhera na gwenga na kugutenda weri mwanja gwaku na gwenga hagumyugili mwana gwangu mdala kulawa kwa walongu wangu na numba ya tati gwangu. 41 Handa pagusoka kwa walongu wangu na wakupananiti ndiri muhinga, su hapeni gulewelerwi na kulapirwa kwaneni.

42 Leru pansokiti palinegu nduwa, Mlungu gwa mtuwa gwangu Abrahamu, paguherepeziwa, guntenderi uheri mumwanja gwaniziriti. 43 Guloli, ngoloka pakwegera pa linegu lya mashi, handa muhinga pakiza kuteka mashi, neni hanimluwi, Shondi shondi gumpanani mashi ga kulanda, 44 na yomberi pakampanana neni mashi, su yomberi kaweri mdala, Mtuwa Mlungu yakamsyagulira mwana gwa mtuwa gwangu." 45 Pamberi hanenemalili kuluwa mumoyu mwangu, palaa palii Rebeka kasokiti na vulu yakuwi ya mashi pakalitwika mulikombi. 46 "Yomberi kaseleriti kulinegu kuteka mashi na neni nimgambiriti, shondi shondi gumpanani mashi ga kulanda. 47 Nimkosiyiti, tati gwaku gaa? Kang'ambiriti, neni muhinga gwa Betueli, mwana gwa Milika, mdala gwakuyi Nahori. Su neni nimpananiti peti na kumvalasiya bangili mumawoku mwakuyi. 48 Shakapanu nsutamaliti makukama na kumguwira Mtuwa Mlungu, Nimkwisa Mtuwa, Mlungu gwa mtuwa gwangu Abrahamu, ulii yakanongoziyiti kwiza kwa muhinga gwa shiyiwuku sha wa mtuwa gwangu kwajili ya mwana gwakuyi." 49 Vinu handa pamunanguziya uheri na ujimirika kwa mtuwa gwangu, mung'ambiri. Na paiwera ndala, vilaa mung'ambiri, neni nivimani shakutenda.

50 Labani na Betueli wamwankuliti, "Shitwatira ashi shilawa kwa Mtuwa Mlungu, twenga tuweza ndiri kutakula shoseri. 51 Rebeka kapanu, gumtoli gugendi nayu kaweri mdala gwa mwana gwa mtuwa gwaku, Mtuwa Mlungu ntambu yakatakuliti."

52 Ntumintumi gwa Abrahamu pakapikaniliti aga kamsuntamalira makukama na kumguwira Mtuwa Mlungu. 53 Shakapanu kalaviyiti vintu vya madini ga mpiya na zahabu na nguwu, su kampanana Rebeka. Vilaa kawapanana mafupu walongu wa Rebeka pamuhera na mawu gwakuyi Rebeka mafupu ga mpiya zivuwa. 54 Ntumintumi gwa Abrahamu na wantu yakiziti nawu, waliyiti na walanditi na wagonjiti aku. "Paushiyiti kala shilawu yakuwi, yomberi katakuliti, nduwa kuwuya kwa mtuwa gwangu."

55 Kumbiti walongu wa Rebeka pamuhera na mawu gwakuyi walongiti, "Gumleki muhinga kalikali na twenga shaka shididini hera, mashaka lilongu hangu, shakapanu hamuwezi kuwuka nayu."

56 Kumbiti yomberi kawagambiriti, "Shondi shondi namuntenda nkawi, toziya Mtuwa kantendera weri kala mwanja gwangu, nduwa mundekiziyi mbuyi kwa mtuwa gwangu."

57 Na womberi wamankula, "Su guleki tumshemi muhinga mweni tumkosiyi. 58 Womberi wamshemiti Rebeka na wamkosiya, hashi, hagugendi na muntu ayu?

Yomberi kawankula, hang'endi."

59 Su wamleka Rebeka kagendi pamuhera na yaya gwakuyi, ntumintumi gwa Abrahamu pamuhera na wantu wakuyi. 60 Su wamtekeleriti Rebeka pawalonga,

"Gwee dada gwetu, guweri mawu gwa wana wavuwa yawawalangika ndiri!

Na walerwa waku wazikolimlima lushi za wangondu waku!"

61 Shakapanu Rebeka na yaya wakuyi wakwena panani pa nkanyama ngamiya na kumfata ntumintumi ayu gwa Abrahamu na woseri wawukiti.

62 Shaka shilii Isaka kawukiti Beeri Lahai Roi, kaweriti kankulikala aku Negebu. 63 Lishaka limu pamihi, Isaka kagenditi kuhola kumalambu, su pakanyasuliti masu gakuyi kawona wankanyama ngamiya wankwiza. 64 Vilaa Rebeka pakanyasuliti masu gakuyi na pakamwoniti Isaka, yomberi kasulukiti pasi 65 na kumkosiya ntumintumi gwa Abrahamu, "Muntu ulii gaa yakatyanga kulilambu kulii, kiza kutuwanka?" Ntumintumi ulii kawankula.

"Ulii mtuwa gwangu," Su Rebeka katola nguwu yakuwi, kaligibikira sheni.

66 Shakapanu ntumintumi ulii kamgambiriti Isaka goseri yagatendikiti. 67 Isaka kamtola Rebeka kugenda muliringu lyaliweriti lya Sara mawu gwakuyi. Rebeka kawera mdala gwakuyi na Isaka kamfiriti nentu. Su Isaka kazyangitwi zyangitwi na Rebeka pamawu gwakuyi kuhowa.