1 Su Yakobu kawapikaniriti wana wa Labani pawalonga, "Yakobu katola kila shintu sha tati gwetu, yomberi kawera na ulunda awu woseri kulawirana na virii vyaviwera vya tati gwetu." 2 Yakobu kavimaniti kuwera Labani kamsheriti ndiri mweni gambira kwanja ntambu yaiweriti. 3 Shakapanu Mtuwa kamgambiriti Yakobu, "Guwuyi mlushi lwa wazewi waku na kwa walongu waku, neni haweri pamuhera na gwenga."

4 Su Yakobu kawatuma wantu kuwashema Raheli na Leya, na womberi wamgenderiti kuntundu kwakaweriti kankuwalolera wankanyama. 5 Yakobu kawagambira, "Mona kuwera tati gwenu kanshera ndiri gambira kwanja ntambu yaiweriti, kumbiti Mlungu gwa tati gwangu kapamuhera na neni. 6 Muvimana kuwera nimtendera tati gwenu kwa makakala gangu goseri, 7 pamuhera na hangu yomberi kampayira na kushigalambula shibenamgongu shangu mala lilongu, kumbiti Mlungu kamlekeziyiti ndiri kuntenda. 8 Tati gwenu pakatakuliti, wankanyama yawawera na madowadowa hawaweri shibenamgongu shaku, su vipinga vyoseri vya wankanyama viwiyuriti wana yawawera na madowadowa. Na yomberi pakalongiti, wankanyama wana yawawera na misitali hawaweri shibenamgongu shaku, su vipinga vyoseri viyuwiriti wana yawawera na misitali. 9 Mlungu ndo ntambu yakatoliti wankanyama wa tati gwenu, kampananiti neni.

10 Shaka sha wankanyama sha kupata yinda ndotiti, na mukulota aku moniti wankanyama washipalu woseri yawawakweniti wankanyama wa shidala, waweriti na misitali na madowadowa na malembumalembu. 11 Ntumintumi gwa kumpindi gwa Mlungu kayoweriti na neni mukulota, kanshemiti, Yakobu, na neni nimwitikiriti, Napanu! 12 Yomberi kang'ambiriti, guloli, wambuzi pongu woseri yawawakwena wambuzi washidala, wawera na misitali na madowadowa na malembumalembu. Shitwatira ashi shiwera ntambu ayi toziya mona ntambu yakakutenderiti Labani. 13 Neni ndo ulii Mlungu yakakulawiriti kulii Beteli, pahala palii pagutuliti libuwi kwajili ya lihengu lyaku kwa kulimiminira lipaki na guntuliriti shirapu. Vinu guwuki muisi ayi na guwuyi muisi yaku."

14 Shakapanu Raheli na Leya wamwankuliti Yakobu, "Kwahera shintu shoseri twenga tuweza kupata tati gwetu pakahowa! 15 Kayi kankutuwona twenga gambira wahenga, toziya katushuwuza twenga na vinu mpiya zilaa zilii zyazituhemeriti, yomberi kankuzitendera. 16 Ulunda woseri Mlungu wakautoliti kulawa kwa tati gwetu ndo watwenga pamuhera na wana wetu. Su gutendi ntambu yagugambiritwi na Mlungu."

17 Su, Yakobu kalitandiriti kugenda mwanja, su kawakweniziya wana na wadala wakuyi panani pa wankanyama ngamiya. 18 Kawatoliti wankanyama wakuyi woseri pamuhera na vintu vyakuwi vyoseri vyakavipatiti aku Padan Aramu, yomberi kanjiti mwanja gwakuyi kuwuya isi ya Kanani kwa Isaka tati gwakuyi. 19 Shaka shilii Labani kagenditi kuwamoga mibahira wankanyama wakuyi, Raheli kiwiti vinyagu vya wamlungu wa tati gwakuyi. 20 Yakobu kampayira Labani muntu gwa lushi lwa Aramu kwa kuwuka pota kumgambira. 21 Yomberi katoliti ulunda wakuyi woseri, katugiti na pakalokiti kala lushemba Eufrati, kagenditi Gileadi, lushi lwa vigongo.

22 Mashaka matatu pa Yakobu kuwuka, wantu wamgambiriti shilii shashilawiriti. 23 Labani kawatola walongu wakuyi na kumsakula Yakobu kwa mashaka saba, kamwoniti yomberi kulugongu, muisi ya Gileadi. 24 Kumbiti pashiru, Mlungu kamlawiriti mundotu Labani muntu gwa lushi lwa Aramu, "Kamgambiriti, guliloli weri! Nagumtenda Yakobu kakalali."

25 Su Labani kasoka kwa Yakobu. Shaka ashi Yakobu kaweriti kagonjera mwanja gwakuyi kulugongu. Labani pamuhera na walongu wakuyi, wagonjeriti mwanja gwawu kulugongu lwa Gileadi.

26 Shakapanu Labani kamgambiriti Yakobu, "Gutenda shishi? Iwera hashi gunzyanga na guwatola wahinga wangu gambira watuga isi mungondu? 27 Iwera hashi gutugiti kwa kubada na kunzyanga? Kwashishi gung'ambiliti ndiri su nikugambiri kwahere kwa sheleku na nyimbu na malimba na mbalapi? 28 Iwera hashi gundekeziyiti ndiri niwanoneri wazukulu wangu na kuwagambira kwahere wahinga wangu? Gutenda shintu shifaa ndiri. 29 Nana uwezu wa kukutenda, kumbiti Mlungu gwa tati gwaku kandawiriti lishu pashiru, kang'ambiriti, guliloli weri! Nagumgambira Yakobu shisoweru shoseri sha kumtenda kakalali. 30 Vinu guwuka toziya gwana mata ya kuwuya ukaya kwa tati gwaku, kumbiti iwera hashi gwiwa vinyagu vya milungu wangu?"

31 Yakobu kamwankula, "Ntiriti toziya nivimaniti megumpoki wahinga waku kwa makakala. 32 Kumbiti handa pagumwona yoseri kawera na vinyagu vya milungu waku, nakalikala. Kulongolu kwa walongu wetu, gulanguziyi shoseri shashiweriti shaku, gushitoli." Yakobu kavimaniti ndiri kuwera Raheli kiwiti vinyagu vya milungu wa Labani.

33 Su Labani kasakula vinyagu avi vya milungu wakuyi muliringu lya Yakobu na lya Leya na lya walii yaya wawili, kumbiti kavipatiti ndiri, kalawa muliringu lya Leya na kwingira muliringu lya Raheli. 34 Raheli ndo yakavitoliti vinyagu avi na kavififiti pasi pa mkeka gwa kulivagira pa nkanyama ngamiya na kulivaga pampindi pakuwi. Labani kavisakula muliringu lyoseri kumbiti kavipatiti ndiri. 35 Na Raheli kamgambiriti tati gwakuyi, "Shondi shondi tati, aguleka mtuwa gwangu kakalali, hapeni wezi kwimuka kulongolu kwaku, toziya wera mumashaka gangu." Su Labani kavisakula vinyagu vya milungu wakuyi, kumbiti kavipatiti ndiri.

36 Su Yakobu kamkalaliti "Labani pakalonga, hashi, shidoda sha neni shishi? 37 Hashi, gupata shishi shashiweriti shaku ata pagusakuliti kala muvisanka vyangu vyoseri? Gushituli kulongolu kwa walongu waneni na walongu waku, su womberi waamuwi pakati petu twenga wawili. 38 Nilikala na gwenga kwa shaka sha mivinja malongu mawili. Na shaka shoseri ashi kondolu waku, ama wambuzi waku hawenipati kuhalabisiya yinda, ama neni kuliya kondolu washipalu gwa shipinga shaku. 39 Neni Nikujegiriti ndiri ata mala yimu nkanyama gwaku yakalaguwitwi na nkanyama gwa kuntundu, mbuziliriti asara ayi ulaa namweni. Gwenga gufiriti ndipi pota kulishera handa wamwiwiti paluwala ama pamihi! 40 Ayi iweriti ntambu ya neni, paluwala hepeleriti mshenji gukalipa na pashiru hepeleriti mbepu ata nsinditi kugonja mpota. 41 Mivinja malongu mawili yoseri ayi nilikaliti mnumba mwaku. Nikutenderiti kwa mivinja lilongu na msheshi kwajili ya wahinga waku wawili, na mivinja sita niwaloleriti wankanyama waku. Kumbiti gwenga gugalambula shibenamgongu shangu mala lilongu. 42 Gambira Mlungu gwa mbuyi gwangu Abrahamu, Mlungu yakamtenditi tati gwangu Isaka kalendemeri, mekaweri ndiri uwega wa neni, nakamu megundeki ng'endi mawoku hera kumbiti Mlungu kakuwona kutabika kwaneni na lihengu lyandenditi kwa mawoku gangu, kakukalipiriti lishu pashiru."

43 Shakapanu Labani kamwankula Yakobu, "Wahinga awa wahinga waneni, wana awa wana waneni, wankanyama awa wankanyama waneni, vyoseri vyaguviwona panu, vyaneni. Kumbiti neni hawezi kutenda shishi leru kwa wahinga waneni ama kwa wana wawu yawawiyuriti? 44 Vinu gwizi tutendi lipatanu gwenga na neni; su liweri ukapitawu pakati pa gwenga na neni."

45 Su Yakobu katola libuwi kaligolosiya gambira lusiki lwa kuliholera. 46 Kayi Yakobu kawagambira walongu wakuyi, "Mjojoniri mabuwi, nawomberi wajojoniriti mabuwi na kutula shilundu, shakapanu waliyiti shiboga pakwegera na shilundu ashi sha mabuwi." 47 Labani kashishema shimatiru ashi Yegari Sahadusa, kumbiti Yakobu kashishema Galeedi. 48 Labani kalonga, "Shilundu ashi shiwera upitawu pakati pa gwenga na neni leru. Ndo mana shilundu ashi shishemuwa Gileadi. 49 Na lusiki lulii lushemuwa Misipa, toziya yomberi kalongiti, Mtuwa Mlungu katuloleri patuwera kutali pota kuliwona. 50 Paguwatabisiya wahinga waneni ama paguyuga wadala wamonga, su guvimani kuwera kwahera muntu gwingi pakati petu, Mlungu ndo kapitawu pakati petu.

51 Shakapanu Labani kamgambiriti Yakobu, guloli shilundu ashi pamuhera na lusiki lwanulituriti pakati petu. 52 Shimatiru ashi ndo kapitawu na lusiki alu ndo kapitawu kuwera neni hapeni noki shimatiru ashi kwiza kwa gwenga kukutenda na gwenga haguloki ndiri shimatiru ashi na lusiki alu kwiza kwaneni kuntenda. 53 Mlungu gwa Abrahamu na Mlungu gwa Nahori, hakaamuwi pakati pa twenga. Su Yakobu kalilapiriti kwa Mlungu yakamtenditi Isaka tati gwakuyi, katetemi." 54 Na Yakobu kalaviyiti tambiku kulugongu na kawashemiti walongu wakuyi kuliya shiboga na womberi pawaliyiti kala shiboga, wagonjiti kulaa kulugongu pashiru poseri. 55 Mandawira putiputi Labani kimukiti, kawanonera wazukulu pamuhera na wahinga wakuyi, kawapetiriti mashi. Shakapanu kanjiti mwanja, kawuyiti ukaya.