Provérbios 31

ଗୁନ୍‌ଚଲନ୍ ରଇବା ମାଇଁଜି

10 ଗୁନ୍‌ଚଲନ୍ ରଇଲା ମାଇଁଜି କେ ପାଇ ପାର୍‌ସି? ସେ ମତି ମୁକ୍‌ତାର୍‌ ତେଇଅନି ଅଦିକ୍ ମୁଲିଅର୍‌ ଦନ୍ ପାଇସି । 11 ମୁନୁସର୍‌ ମନ୍ ତାର୍‌ ଲଗେ ଆକା ଆସା ବର୍‌ସା କର୍‌ସି, ଆରି ସେ କାଇ କାମ୍‌ କଲେ ମିସା ଉନା ନ ଅଏ । 12 ସେ ତାର୍ ଜିଇବା କାଇବା ଜାକ ତାର୍ ମୁନୁସ୍‌କେ କାଇ କସ୍‌ଟ ନ ଦେଇ ଉନତି କର୍‌ସି । 13 ସେ ମେଣ୍ଡା ରମ୍‌ ଆରି ମସିନା*31:13 ଗଟେକ୍ ରକାମର୍ ପୁଲ୍ ଗଚ୍, ସେ ପୁଲ୍ ତେଇଅନି ଚିକନ୍ ବାରଇସି ଆରି ସେ ନାଡା ତେଇ ଅନି ସୁତା ବାର୍‌କରାଇ ଲୁଗା, ରାଗୁ ତିଆର୍ କର୍‌ତେ ରଇଲାଇ, ତାକେ କଇବାଇ ମସିନା, କଜି ସୁସ୍‌ତା ସଙ୍ଗେ ନିଜର୍‌ ଆତେ କାମ୍‌ କର୍‌ସି । 14 ସେ ବେପାର୍‌ବାଟ୍‌ କର୍‌ବା ଜାଜ୍‌ ପାରା; ସେ ଦୁର୍‌କେ ଅନି ନିଜର୍‌ କାଦିକଣ୍ଡା କଜି ଆନ୍‌ସି । 15 ଆରି ସେ ସାକାଲ୍ ସାକାଲ୍ ଉଟ୍‌ସି ଆରି ନିଜର୍‌ ଗରର୍ ସବୁକେ କାଇବାକେ ଦେଇସି ଆରି ଚାକ୍‌ରାନି ମନ୍‌କେ କାମ୍ ତିଆର୍‌ସି । 16 ସେ ବାଡର୍‌ ବିସଇ ଟିକିନିକି ବୁଜି କରି ଗେନ୍‌ସି, ସେ ନିଜେ ବାଡେ, ଅଙ୍ଗୁର୍‌ ମାଲ୍‌ ରପ୍‌ସି । 17 ସେ ନିଜର୍ ଆଁଟା ଡାଟ୍ କର୍‌ବାକେ ବାନ୍ଦି ଅଇସି ଆରି ନିଜର୍‌ ଆତେ ବପୁ ଲାଗାଇସି। 18 ସେ ବେବାର୍ ବାଟ୍‌ କରି ଲାବ୍‌ କର୍‌ସି, ସେଟା ସେ ବୁଜ୍‌ଜି; ଆରି, ରାତିର୍‌ବେଲେ ତାର୍‌ ଗରର୍ ଦିପ୍ ନ ଲିବାଏ । 19 ସେ ନିଜର୍‌ ଆତେ ସୁତା ବେଟ୍‌ସି ଆରି ଲୁଗା ବୁନ୍‌ସି । 20 ସେ ଦୁକି ଲକ୍‌ମନ୍‌କେ ଲବ୍ ନ କର୍‌ତେ ଦେଇସି ଆରି କାକୁର୍‌ତି ଲକ୍‌ମନ୍‌କେ ଜିବନ୍ ଦୁକାଇସି । 21 ସେ ବେସି ସିତ୍‌କେ ମିସା ନିଜର୍‌ ଗର୍‌କୁଟୁମର୍ ଲାଗି ବଲିକରି ନ ଡର୍‌ତେ କାମ୍ କର୍‌ସି; କାଇକେବଇଲେ ତାର୍‌ ସବୁ ଗର୍‌କୁଟୁମର୍ ଲକ୍‌ମନ୍ ଉସୁମ୍‌ ବସ୍‌ତର୍ ପିନ୍ଦ୍‌ବାଇ। 22 ସେ ନିଜର୍ ପାଇଁ କାବ୍‌ରା ଚିତ୍‌ରା ରଙ୍ଗ୍‌ର ବସ୍‌ତର୍ ବୁନ୍‌ସି, ଆରି ସେ ଦବ୍‌ଲା ଜିନ୍‌ଜିନା ପାତଲ୍ ଲୁଗା ଆରି ଜାମ୍‌କଲିଆ ରଙ୍ଗର୍ ବସ୍‌ତର୍ ପିନ୍ଦ୍‌ସି । 23 ତାର୍‌ ମୁନୁସ୍‌ ଦେସର୍‌ ନେତାମନର୍‌ ସଙ୍ଗେ ନଅଁରର୍ ଦୁଆରର୍ ସଦର୍ ଦାଣ୍ଡେ ବସି ରଇଲା ବେଲେ ଜାନା ପଡ୍‌ସି । 24 ସେ ଦବ୍‌ଲା ବସ୍‌ତର୍‌ ତିଆର୍‌ କରି ବିକ୍‌ସି, ଆରି ବେବାରିମନ୍‌କେ ଆଁଟାବେଡା ମିସା ବିକ୍‌ସି । 25 ବପୁ ଆରି ଗୁନ୍‌ଚଲନ୍ ଆକା ତାର୍ ବସ୍‌ତର୍‌ ପାରା, ଆରି ଆଇବା ଦିନ୍‌ମନ୍‌କେ ସେ କାଇଟାକେ ମିସା ନ ଡରେ । 26 ସେ ବାବିବିଚାରି କରି କାତା କଇସି; ସେ ସବୁବେଲେ ସୁଆଲ୍ ସୁତର୍ ସଙ୍ଗେ ସିକିଆ ଦେଇସି । 27 ସେ ନିଜର୍‌ ଗର୍‌କୁଟୁମର୍‌ ଚାଲିଚଲନ୍‌କେ ମନ୍‌ଦିଆନ୍ ଦେଇସି, ଆରି ସେ କାମ୍ ନ କଲେ ସରି ନ କାଏ । 28 ତାର୍‌ ପିଲାଟକିମନ୍‌ ଉଟିକରି ତାକେ ଦନିଅବାଦ୍ ବଲିକରି କଇବାଇ ଆରି ତାର୍‌ ମୁନୁସ୍‌ ମିସା ସେ ରକାମ୍ ବଡିଆ ବଡିଆ ବଲିକରି ସାର୍‌ଦାର୍ କାତା କଇସି; 29 ବେସି ଦାଙ୍ଗ୍‌ଡି ମନର୍ ଲଗେ ଗୁନ୍‌ଚଲନ୍ ଆଚେ, ମାତର୍ ସେ ସର୍‌ତେ ଦାଙ୍ଗ୍‌ଡିମନର୍ ତେଇ ଅନି ତୁଇ ଅଦିକ୍ ସୁନ୍ଦର୍‌ । 30 ବେସି ସୁନ୍ଦର୍‌ଟାକେ ଦେକି କରି ରସି ଜିବାଟା ବଲ୍ ନାଇଁ, ସେଟା ସବୁଜାକ ବେକାର୍‌, ମାତର୍‌ ଜନ୍‌ ମାଇଁଜି ସବୁବେଲର୍‌ ମାପ୍‌ରୁକେ ଡର୍‌ସି, ସେ ଆସିର୍‌ବାଦ୍‌ ପାଇସି । 31 ତାର୍‌ କଲାକାମର୍‌ ଆସିର୍‌ବାଦର୍ ପଲ୍‌ ତାକେସେ ଦିଆସ୍‌, ଆରି ତାର୍‌ ନିଜର୍‌ କାମ୍‌ ଇସାବ୍‌ରେ ନଅଁରର୍ ଦୁଆରେ ତାକେ ଆସିର୍‌ବାଦ୍ କରା ।