1 Egyu-dɩrɛ Yerobwam wo bugyu buu gedi wʋʋ gɩkyan fwo-nɩyɛfɛ gaanɩ fɔ, Abiya e di bugyu Yuda. 2 E di bugyu Yerusalem bɩkyan besiyee. Wɔna diyere n di Maaka, gɛtɛ è di Uriyeli gɛtɛ e ye Gibeya fɔ wobi-nanɩ.

Wʋ bɛ ba gɛtɛ bɩtà bʋ nʋ̀n Abiya ma Yerobwam boo getite. 3 Abiya ɛ ka bɩtà bʋʋ bɛtalɛ asepekyi dikpilin (400,000) gɛ Yerobwam mɔ ɛ ka wɔ bɩtà bʋʋ bɛtalɛ asepekyi akpilin anyɔɔ (800,000) gɛ bɛ ma tuma akpa.

4 Gɛtɛ Abiya ma wɔ bɩtà bʋʋ bɛtàlɛ fɔ be gyu Efrayim wo-idon yɩɩ gɛtʋnkwaa gii koro fɔ, be yela Semarayim wodon wuu koro, gɛ Abiya e kpen ɛ dɔ̀ alan, <<Yerobwam ma Isareli bete powu, ɩ nʋn maakʋn! 5 Ɩɩn nyɩ̀ alɛ Yahwe, Isareli wo Wurubwarɛ fɔ ɛ dama Dikola dɩɩ gɛtà gɛtɛ dɩ̀ sa gakpaakpa dii koro ɛ ka Isareli bugyu buu gedi ɛ tɛ Dafidi ma wodu wʋʋ bɛnɩ gakpaakpa loo? 6 Mɔ Nebati wobi-teni Yerobwam, gɛtɛ nafɔ è di Dafidi wobi Solomon wɔndɩrɛbi fɔ, ɛ tɔ e yela wofonte wo koro. 7 Gamama gɛtɛ Solomon wobi Rehobwam e di bugyu, gɛ ɛ̀ sangba è di ebi-sorobi gɛtɛ ɛn tɛ nyɩnla ade yaanɩ gepe èè terema ade gɛtɛ ɩɩn kɔlɔ fɔ, bɛnɩ gɛtɛ bɛn ma tɔnɔ, gɛ be silin Yerobwam be tuma fɔ, bɛ yɛ ɛwɔ ma ɛbɛ bɛ tɔ be yela Rehobwam wo koro.

8 <<Gɛ nkele yaamɩnlɛ ii wùlà yɩ alɛ yaà tɔ i yela ma Yahwe bugyu gɛtɛ ɛ ka ɛ sa Dafidi wodu wʋʋ bɛnɩ baalɔ fɔ? Wʋ̀ sa waanɩ gɛtɛ à ba bɩtà bʋʋ bɛtàlɛ asɔ yaanɩ, gɛ à de akwɔbi gɛtɛ Yerobwam ɛ ka sɩka-sɩya ɛ mɛ bekpen ɛ tɛ yɩ fɔ. 9 A berema Yahwe gedi gɩɩ bɛtɛlɛ gɛtɛ bè di Aaron bebi ma Lefi bete fɔ, gɛ a sɩ̀ awɔ gbagba aa gedi gɩɩ bɛtɛlɛ anlɛ gɛtɛ bɩfɩɩ-kurumakyɛɛ bʋʋ mɛ fɔ. Ɛnɩ-kamasɛ gɛtɛ ee len ɛ̀ɛ̀ mɛ bekpen fɔ boo gedi gɩɩtɛlɛ fɔ, ɛ̀ bɔ ɛ ka ɛkwɔ ma bɛyɛran-teni kwarankɩ ɛ ba fɔ, e bilingi bekpen boo gedi gɩɩtɛlɛ, nka Wurubwarɛ gedi gɩɩtɛlɛ.

10 <<Ɛtɩ bɩrɛ, Yahwe n di tii Wurubwarɛ, gɛ tɩn nan kere wɔ gɛtɛrɛma tɩ ya. Gedi gɩɩ bɛtɛlɛ gɛtɛ bɛɛ mɛ Yahwe gʋtʋn fɔ bè di gɛ Aaron bebi, gɛ Lefi bete bɛɛ kpa bɛ. 11 Gagyɩgyan ma ɔgyɔlɔ-kamasɛ bɛɛ tɛ-tɛ Yahwe gekuma gedi, bee kuma olifwi-kpara bɛ tɛ Yahwe. Bɛɛ ka boroboro bɛ sɩ̀ ɔkpʋlɔ-fɩrɩnfɩrɩn wuu koro, fɔ bɛ kyangɩ bɛkandɩya gɛtɛ bɛ̀ gyaga sɩka-sɩya bɛkandɩya bɔɔ gɛgyagakʋn gii koro ɔgyɔlɔ-kamasɛ. Tɩɩ mɛ ade wùlàlɛ gɛtɛ Yahwe, tii Wurubwarɛ e wùlà alɛ tɩ mɛ fɔ. Mɔ i fi gama i ten wɔ. 12 Wurubwarɛ ɛ̀ sa ma ɛtɩ. Ɛwɔ n di tiigyegeyelɛ. Wo gedi gɩɩ bɛtɛlɛ bè de baakantan fɔ. Baà fʋ̀n yɩ be kpèlè bàà bɛ̀ tà bɩtà ma ɛyɩ. Oo Isareli bete, ɩ kara kpà ma Yahwe, yiitu ɛbɛ boo Wurubwarɛ, yema ɩn nan talɩ i di wo koro.>>

13 Mɔ fɔ, Yerobwam ɛ sa wɔ bɩtà bʋʋ bɛtàlɛ fɔ baakpi ɩkɩ bɛ ma bu Yuda bete bɔɔ gama ɔkankɩ. Gɛ bekurumakyɛɛ mɔ be ye bɛ sʋ bɛ bʋnʋn-bʋnʋn. 14 Yuda bɩtà bʋʋ bɛtàlɛ be fi bɛ nya fɔ, be we gɛtɛ bɛ sʋ bɛ sa bʋnʋn ma gama. Gɛ be wula be kpèlè Yahwe, gɛ gedi gɩɩ bɛtɛlɛ fɔ be fʋ̀n baakantan. 15 Gɛ Yuda bete bɛɛ gbɛrɛ akpa yaafala kin-kin. Gɛtɛ bɛɛ gbɛrɛɛ akpa yaafala fɔ, Yahwe ɛ yɛ Abiya ma Yuda bɩtà bʋʋ bɛtàlɛ fɔ bee di Yerobwam ma Isareli bete powu boo koro. 16 Isareli bete be serenti be ye Yuda bete bɔɔ bʋnʋn, gɛ Wurubwarɛ ɛ yɛ Yuda bete fɔ be di Isareli bete boo koro. 17 Abiya ma wɔ bɛnɩ be wolo Isareli bɛnɩ asepekyi dikpilin ma ton (500,000) gɛtɛ bɛ nyɩ̀ bɩtà bʋʋ gɛtà gepepe. 18 Gɛ Yuda bete be di Isareli bete boo koro, yema bɛ ka bɔɔ bʋnʋn bɛ gyaga Yahwe, bootu ɛbɛ boo Wurubwarɛ fɔ wo koro.

19 Abiya ɛ kpà ɛ gyaga Yerobwam wo koro, gɛ e to Beteli, ma Yesana, ma Efron baatele, fɩya ma yaatelebi gɛtɛ i silin yɩ i tuma fɔ. 20 Yerobwam ɛ mini wura ɔkɛma yela Abiya waawi yaanɩ. Gɛ Yahwe ɛ gbɛrɛ wɔ ɛ fɩna gɛ e ku.

21 Abiya bɩrɛ, ɛ dan ma ɔkɛma. Gɛ e to bɛna fwo-bɛnaa, gɛ e wo bebi-teni dikpilin ma bɛnyɔɔ, ma bebi-nanɩ fwo-kooron.

22 Bɛ ŋwara Abiya bugyu baade-kurumakyɛɛ, ma ade gɛtɛ ɛ mɛ, ma ade gɛtɛ ɛ dɔ̀ fɔ bɛ sa Wurubwarɛ wɔtabʋrʋlɛ Ido wo koro gaade yɩɩ gɩkpa gaanɩ.