1 Rabuang bonani mani, inontarai sentenang na nunei ene kaiwo boyari tuti kaiwo emadurafo mai. 2 Mayeai eraiwariai paria sobu do wanang murangfoi, era wa esobu katai we enang bei na Sineari, ampefe enayai na nanaia. 3 Emadu wawerasa eteyo, "Merama taha kahofa ura feai tanari kamiei bata tuti tanunungna mutubaru." Ampefe kamiei batafo we enari munu nayai tuti aspalifo we etaha kamiei batafo nayai. 4 Kontai emadu eteyo, "Merama tabaung bendari bei tuti tanari menara bei dedai ayai sobu rorafaisi, tuti merama tasera we tawonomi, ambori wiro tahatate tata towana tonina fanai." Menara Babeli ebauni

5 Ainanaya Yahwei biari meu we deti bendari tuti menara inontaraifosa ebaunifoi, 6 tuti Yahwei medu deyo, "Oh, inontarai ninisa mani ene nu boyari tuti kaiwo boyari. Tuti arahi fio reantenang etamai tuti enari finina, ampefe na ninai to fongna mani fianai aino enemitituaitai we enarifo mani, enari kariria rai. 7 Neo mahikai mani Tobiari aweu tofobabera ene kaiwofoi, ambori ewe bonggoi, ampefe emadu wawerasa mani wiro eteitawang ene kaiwofoi ahang kaha." 8 Na katai nani Yahwei niarisa ehatatesa to nunei sentenang, ampefe wiro ebaung bendarifoi ahang kaha. 9 Nanai wedaya mani bendari nani wonong fino Babeli, weo na katai nani Yahwei fiobabera kaiwo inontarai nunei sentenang, tuti na nanai Yahwei kiatatesa to nunei sentenang.

10 Semi ne ririafoi mani sonina. Foa fiabaifoi kiai, wefuina boru aha mani, Semi ne fuina piaring (100), i dawingno arikang mang manei wonong fino Arpakhsati.✝ 11 Semi sobu arikang mang tuti wiwing manea aha. Tuti na kutu Arpakhsati saubaunung kawuruampo mani, Semi ne fuina piaring we ring (500) aha. 12 Na kutu Arpakhsati ne fuina piareia suraya ring (35) mani, dawingno Selahi. 13 Arpakhsati sobu arikang mang tuti wiwing manea aha. Tuti na kutu Selahi saubaunung kawuruampo mani, Arpakhsati darang ne fuina piaring we bea botoru (403) aha. 14 Selahi ne fuina piareia sura (30) mani, dawingno arikang mang manei wonong fino Eberi. 15 Selahi sobu arikang mang tuti wiwing manea aha. Tuti na kutu Eberi saubaunung kawuruampo mani, Selahi darang ne fuina piaring we bea botoru (403) aha. 16 Eberi ne fuina piareia suraya boa (34) mani, dawingno arikang mang manei wonong fino Peleki. 17 Eberi sobu arikang mang tuti arikang wiwing manea aha. Tuti na kutu Peleki saubaunung kawuruampo mani, Eberi darang ne fuina piaring we bea piareia sura (430) aha. 18 Na kutu Peleki ne fuina piareia sura (30) mani, dawingno arikang mang manei, wonong fino Rehui. 19 Peleki sobu arikang mang tuti arikang wiwing manea aha. Tuti na kutu Rehui saubaunung kawuruampo mani, Peleki darang ne fuina piaring we beru indeata (209) aha. 20 Na kutu Rehui ne fuina piareia suraya boru (32) mani, dawingno arikang mang manei wonong fino Seruki, 21 Rehui sobu arikang mang tuti arikang wiwing manea aha. Tuti na kutu Seruki saubaunung kawuruampo mani, Rehui darang ne fuina piaring we beru itu (207) aha. 22 Na kutu Seruki ne fuina piareia sura (30) mani, dawingno arikang mang manei wonong fino Nahori. 23 Seruki sobu arikang mang tuti arikang wiwing manea aha. Tuti na kutu Nahori saubaunung kawuruampo mani, Seruki darang ne fuina piaring we beru (200) aha. 24 Na kutu Nahori ne fuina piareia indeata (29) mani, dawingno arikang mang manei wonong fino Terai. 25 Nahori sobu arikang mang tuti arikang wiwing manea aha. Tuti na kutu Terai saubaunung kawuruampo mani, Nahori darang ne fuina piaring suraya indeata (119) aha. 26 Na kutu Terai ne fuina piatorua sura (70) mani, dawingno arikang mang mantoru amani, Abrami, Nahori tuti Harani.

27 Terai ne ririafoi sonina. Terai dawingno Abrami, Nahori tuti Harani. Harani dawingno Loti. 28 Terai minohi darang mae Harani mireha fafongna. Harani mireha na ne katai saubaunung nai foi, amani Ur-Kasdimi. 29 Abrami dauo Saraii tuti Nahori dauo Milkai. Milkai tuti Yiskai mani Harani ne arikang suruine. 30 Saraii kirawahi wiro wearikang kaha. 31 Terai kia ne arikangno Abrami tuti tufumangno Loti, Harani antungfoi tuti urawingno Saraii, Abrami binengfoi. Kiasa era weru Ur-Kasdimi, era to Kanani. Wape erawa sobu kahofa Harani mani enayai na nanaia. 32 Tuti na Harani Terai mireha, tete ne fuina piaring we boru ring (205).