1 Na kutu wewaifo suru ura weru Abrahami kawurua nanafo, ura paria sobu bendari Sodomi mani reraiwe dirua. Na kutu nana mani, Loti minohi na rahutu borong bendarifo, tuti deti suru nanai. Doabariri da weu surua, tuti disangkapa awebuka somi aweu ureng disangso kahofa wau, 2 mae medu deyo, "Dai muruine diru ampa. Ampefe mumaya mani mura to nehu munufoia. Muruai muawemiwa tuti murena kio aha kamiai wori mura pari aha ki." Uroa we Loti ureyo, "Bento, aurena na katai kehabi boriei wanai ki." 3 Wape Loti denggewa suru paria, ampefe ura riati to ne munufoia. Mayeai meinenang fiang we suru, tuti niunung rotio weragi kaha feai dohongnai we suru, ainanaya wewaifo suru urangna.

4 Wape wewaifo suru urena kaharai, mang na bendari Sodomi fosa, na mano ewebariboai fosa paria sobu mano ewepaituang fosa, era kiaia etoawari Loti ne munufoi. 5 Ebibe esahu we Loti eteyo, "Inontarai mandu ura ma, urena na nemu mununei diru bonini, ansurui doni? Bohong suru we amea mandiei ambori amenai ria suru."✝

6 Ainanaya Loti dariai ariei detisa, wape kife rahutufoi aha, 7 tuti medu wesa deyo, "Doroi ne meai ne, wiro menari ne karira tonina ne fanai. 8 Metaramima, nehu kamitung mandune, wiro urena ria mang manei kaharai. Ansuruino kadono yohong suru we mea mau we menari suru todoni kariri mene metawia wa. Wape wiro menari ne karira feai we inontarai ura ma uminohi ria yau ne suru fanai. Weo todoni kontaio yauno yemang wedua suru."

9 Manamo ebibe we Loti eteyo, "Ro weruai!" Emadu we manei to manei aha eteyo, "Inontarai nini mani inontarai aisei da ma minohi na tane katainei, andino deyo kiutu kaiwo we tata re? Ro weruai ahera, mae bereri mani, ambori amenari kanggani wau maraba sewa inontarai manduo uminohi ria wau nini suru ki." Ainanaya etuangsaya Loti to dowei tuti etawangpasa rahutufoi we inontaraifo suru afui. 10 Manamo wewaifo suru uwarami ariei urabi Loti to rorong afui tuti ukafe rahutufoia. 11 Mayeai unari inontarai mano era ma etoari na boriei na Loti ne munufoi, na mano ewebariboai fosa paria sobu mano ewepaituang fosa euremifo kabe. Donio erurai esera we rahutufoi wape wiro esobu rahutufoi ahang kaha.✝

12 Ainanaya wewaifo suru umadu we Loti ureyo, "Nemu tera manei na bendari nini konta ne? Uramu ete nemu kaisung ete nemu kamitung ete mano mene rika fifau foi na bendari nini mani, kasa mera to boriei weruai. 13 Weo bendari nini ambori aumeiria wioru rai, weo kawurua Yahwei tarao kaiwo atua bitoya kariri ne karira inontarai na bendari nini enarifo ampa. Nanai wedaya Yahwei demi auru ma we aumeiria wioru." 14 Ainanaya Loti da wa medu we kaisung manduo sahu suru we urangfo, ambori urau ne kamitungfo suru, medu deyo, "Musahera mura weru katai nini, weo Yahwei ambori mei bendari ninia wioru rai." Wape uwaitaraihio Loti mei we suru terai.

15 Siwewaraia mani, wewaifo suru uranggewa Loti we sikera da weru bendarifoi. Wewaifo suru umadu ureyo, "Wukahera, ka nemu wiwingwai tuti nemu kamitungwa suru, mera weru katai nini. Ambori wiro memarareha fanai, na kutu bendari nini aumeiria wioru."

16 Na kutu Loti dohong fantamai nanai, wewaifo suru uwaramia uru na Loti warangfo, ne wiwingfoi tuti ne kamitungfo suru. Uka ea to boriei weru bendarifoia tuti utawing eara. Weo Yahwei enewawu Loti fefe.✝ 17 Na kutu enayai na boriaifo nanai, wewaifo manei medu we Loti deyo, "Memito weru katai nini ambori mekaharai weru mararehafoi! Wiro mewati to mekurumufui fanai, tuti wiro meminohi ukai na doni kontai na enang Yordani fanai. Memito to weuaifo ambori wiro memarareha fanai!"

18 Manamo Loti medu we suru deyo, "Oh dai! Wiro muremi amea amemito to weuaifo fanai. 19 Tarai dai enemuwawu amea fefe fata amea kawuru ampa. Wape weuaifo waroi paria, ampefe masino amemitoa sobu kataifoi kaharai mae amemararehara, weo aiboi miung bendarifoi dawi amea fefe. 20 Botia! Na toaromine bendari katui bei na wanai, wiro waroi turura kaha. Todoni mani bomi amea amemito to wanaia, ambori amekaharai weru mararehafoi."

21 Wewaifo manei medu wei deyo, "Yo! Iroa we kaiwo modurawa, bendari ketui nini wiro imeiria wioru kaha. 22 Memito ahera! Weo wiro inari fiea kahai, paria memito sobu katai wani akawuru wo." Loti sahu bendari nani we ketui, ampefe bendari nani esahui we Soari.

23 Na kutu Loti mitoa sobu Soari mani, wofoi dautaia.

24 Na tantuma Yahwei suo metang belerang* tuti adia, dohongnai na rorafaisi to bendari Sodomi tuti Gomorai. 25 Yahwei niunung bendarifo suru na adia, kontai enang Yordani tuti fi tifu nai foi kiai kontaio inontaraifosa kiai awao eworu.✝ 26 Wape Loti ne wiwing dariatifoi daraberahi deti to kurufui we bendarifoia nanai, mayeai wediri kamieio meuaia.✝

27 Kameai kutung Abrahami sikahera da to katai ramindenafa doa medu ria Yahwei nayafo. 28 Na wanai deti to bendari Sodomi tuti Gomorai tuti to enangno Yordani sentenang, deti riraungfoi we mintantunung na kahofa nuwowongfo ayai, netarai toyari riraung sinu na wawu fiabai. 29 Tonanaifa, na kutu Allai mei bendarifo na enang Yordani, katai Loti minohi nai foia wioru. Allai aro Abrahami ampefe Fiata Loti wewu netaraifoi weru kataifoi.

30 Mayeai Loti tuti ne kamitung mandufo suru itora weru Soari to weuaifo we itonayai na wanai, weo mitai we niayai na Soari fefe. Na wanai itominohi na winsaburung bei. 31 Na rahida beia mani, kamitung mano fubafoi medu we ne tahatuifoi deyo, "Dai weinongkutung ampa, tuti wiro mang manea na katai nini we ambori turau mandu we tune mang, toyari fianai aino inontarai na nunei sentenang enarifo ne. 32 Ro ma turohong dai dunung angguria meyeru, tuti turena riati ambori tusobu arikang we tune dai ne ririanei."

33 Diru nani kontai urohong une dai dunung anggurifoa meyerua, mayeai kamitung mano fubafoi da afui dena ria tamanai. Wape tamang meyeru paria, ampefe serawawera fianai aino ne kamitungfoi niari weifo. 34 Kamiaia mani, kamitung mano fubafoi medu we ne tahatuifoi deyo, "Diruafa yena ria dai ampa, ampefe diru bonini kontaio turohongni dunung nariai aha, tuti wuai afui bena riati, ambori na tonanafo turohong riria we dai."

35 Ampefe diru nani kontai urohong anggurifo utamami Loti dunungna meyerua. Ainanaya kamitung mano fuifoi da afui dena ria tamanai nariai aha, tuti tamang meyeru paria ampefe wiro deitawang fianai aino ne kamitung mano fuifoi niari tonanai weifo kahai.

36 Ainanaya kamitung mandufo suru uwearikangna we urena ria utamami Loti fefe. 37 Mayeai mano fubafoi minohituti ne kaisung manei, dohongni wonong fino Moapi, andino we wereng we riria inontarai Moapi fosa ne. 38 Mano katuifoi kontai minohituti ne kaisung manei tuti dohongni wonong fino Ben-Ami, andino we wereng we riria inontarai Amoni fosa ne.