1 Ainanaya Abrahami da weru Mamre to Kahofa Negepi, tuti niayai rahang Kadesi tuti Syuri. Mayeai niayai na Gerari we inontarai aisei. 2 Na katai nani Abrahami sahu Sarai ne wiwingfoi we ne tahatui dine. Ampefe Abimeleki mananu Gerari foi demi ne inontarai fosa eha Sarai weia.✝

3 Wape dirua mani Allai Da wa medu we Abimeleki na amiei bei deyo, "Mureha rai we wiwing kari ma nani, weo i mani rirau ampa."

4 Wape Abimeleki wiro dena ria Sarai kaharai, ampefe medu we Sengnei deyo, "Sengne waune, wiro ametohong sarawa kahai mae! Boyo mung yau tuti nehu rainei e? 5 Abrahami mantauni dino medurai deyo, wiwing nini mani ne tahatui dine tuti wiwingfoi mantauni kontai yoa deyo, i mani Abrahami rorongwing dine. Ampefe fianai aino inari nina mani na enehurorong mesi, wiro yohong sarawa kaha."

6 Ainanaya Allai medu we Abimeleki nariai aha deyo, "Iwaitawanai we fianai aino nari nina mani na enemurorong mesi, wape Yeyo isua wau ambori wiro nari sasari we Yau fanai. Nanai wedaya wiro Itua wau we ambori bena ria wiwingfoi fanai. 7 Ampefe nina mani, bohong Sarai tiwera we ne mangwai aha. Weo i mani nabi dine, i ambori wenadi we wau ambori wiro mureha kaha. Wape wiro bohongni tiwerawa kaha mani, boitawangnaifa, wau tuti nemu raiwai sentenang memarareha rai."

8 Kamiai kutungna mani, Abimeleki sahu ne inontarai eru fi wei fosa ma. Deisaharai wesa kariri fianai aino dirufa Allai medurai wei na amiei rorongfoi, ampefe inontaraifosa ematai paria. 9 Mayeai Abimeleki sahu Abrahamia medu wei deyo, "Fianai aino nari we amea toninai nina? Tuti fi sarawai fianai aino inari we waune, donio nari yau tuti nehu rainei sentenang enari sasari fiabai nini? Fi nari toninane wiro mai we yau kaha!" 10 Mayeai Abimeleki medu we Abrahami aha deyo, "Enemutituai fianie, donio nari yau toninaifa?"

11 Ainanaya Abrahami medu we Abimeleki deyo, "Enehutituai yeyo inontarai na katai nini mani, wiro esomi we Allai tuti eroasoi kaha, ampefe manei deti nehu wiwingnei tuti enerorong dohong wei mani ambori miung yau ki. 12 Tarai kontai we i mani rorohuwing dine, aune dai mansiari wape wiro aune ai mansiari kaha. Tuti ikari we nehu wiwing. 13 Na kutu Allai sahu yau ira to boriei weru nehu dai ne munurorongfo to katai aiseifoi, imadu we nehu wiwingnei yeyo, ‘Boinawi nemu enemuwawu yau wa, turawa sobu katai bei, manei dutang bera wau we yau mani, boyo nemu tafuai di yau.’ "

14 Mayeai Abimeleki dohong Abrahami ne wiwingno Sarai wei aha, kontai dohong fiahung kambing, domba, sapi tuti woming mang tuti wiwing manea kontai we Abrahami. 15 Tuti Abimeleki medu we Abrahami deyo, "Nehu katai dinini sentenang, mantaung wau biri katai bo doni dino boyo munohi nai ne." 16 Ainanaya medu we Sarai deyo, "Sarae taramuma, kawurua yohongnai we nemu tafuai Abrahami doi peraki piaring we sura we fiainawiai we mandoni kontai weo tarai wau mani wiro bohong sarawa kaha."

17 Mayeai Abrahami wenadi we Allai, tuti Allai Niari Abimeleki tuti ne wiwingfoi tuti ne woming wiwingfosa ebeng aha, ampefe esobu arikang aha. 18 Weo Abrahami ne wiwingno Sarai wedaya mani, donio na Abimeleki ne munu mananufoi, Yahwei kife wiwingfosa kiai enemimanabufo, ampefe enearikang kaha.