1 Na rabuang bo nani, Abrahami weinongkutung paria tuti Yahwei mioangni na fiani kontai. 2 Rahida bei mani, Abrahami medu we ne mangfata mano yufi wairoi sewafoi, amani mano deitawang wedua ne rafoi, medu wei deyo, "Bohong waramuwa ma watai sau awehu wowongne*. 3 Fofora na Yahweh, Allai mano wemambiriu na rorafaisi tuti nunei, dohongnao ka wiwing Kanani nesa manei we nehu kaisung Isaki we ne wiwingfe. 4 Wape todoni kontaio ro to nehu katai itaubaunuhu naifoi, we nehu terafosa, na wanai wobu wiwing manei we nehu kaisung Isaki."

5 Ainanaya mangfatafoi medu we Abrahami deyo, "Masino wiwingfoi wiro miaya we da ria yau to katai nini ma kaha mani, tofino? Ika nemu kaisungnei to nemu katai taubaunumu nai foia ne?"

6 Wape Abrahami yoa wei deyo, "Nanafanai! Wiro ka nehu kaisungnei to katai wanaia fanai. 7 Yahweh, Allai mano wemambiriu na rorafaisi, Andino sahu yau ira to boriei weru dai ne munufoi, kontai weru nehu terafosa ene kataifoi. Tuti Medu we yau na Fefora we ambori Dohong katai nini we nehu ririanesa ki. I kontai ambori Demi ne wewaifoi da foni wau we fiata wau, donio wobu wiwing manei na wanai we nehu kaisungnei. 8 Wape masino wiwingfoi wiro miaya we da ria wau ma kaha mani, fofora we yau nina wiro we aiboi we wau kaha. Ampefe todoni kontaio wiro ka nehu kaisungnei to wanaia fanai." 9 Ainanaya mangfatafoi dohong warangfoa wasau Abrahami awewowongfo, tuti fefora we niari kariri fianai aino Abrahami medurai weifo.

10 Ainanaya mangfatafoi kia unta sura na ne dai Abrahami tuti kia maino fianggeng ne harga dedaio Abrahami minohi tutirafo weai, tuti da to Arami-Mesopotamia, to bendario Abrahami ne tahafuai Nahori raminde darang mani minohi naifoi. 11 Da wa sobu bendari deraung boriaifo, dohong ne untafosa eminohi na katai kefang we kamirei merehafoi. Ramindenawa, teterai we wiwing fosa era to boriei we etutu merehafo.

12 Ainanaya mangfatafoi wenadi deyo, "Yahweh, Allai mano nehu dai Abrahami somi we Wau. Fata yau ambori fianai aino ira weane mani isobuai na rahida bonini kontai, tuti Boinawi Nemu enemuwawuwa we nehu dai Abrahami. 13 Yau yoari rurang we kamirei merehanei ne, tuti kadawing na bendari ninisa katu mani era mandiei we etutu mereha. 14 Kadono fio ira weai ninai Boinawiai we yau tonina, kadawing mandoni dino katu mani imadu wei yeyo, ‘Tu nemu babeuwai meu, bohong mereha feai ma yunung.’ Masino yoa deyo, ‘Bunungna, tuti nemu untafosa yohongsa etunung kontai, kadawing nani dino Biriri we Nemu mangfata Isaki.’ Masino fininai kawariai tonana mani, yeitawangnai weo Wau kawurua Boinawi Enemuwawuwa we nehu dai Abrahami."

15 Mangfatafoi wiro wenadia kai kaharai mae, na tantuma deti kadawingno wonong fino Ribkai sodua ne babeufoi na warabeawafo da to kamirei mereha foia. Ribkai nini mani, Betueli ne kamitung dine. Betueli mani, Nahori tuti Milkai une kaisung dine, mae Nahori mani Abrahami ne tafuai tera dine. 16 Ribkai mani ureng bohi paria tuti wiro dena ria mang manei kaharai. Bia to kamirei merehafoia dutu mereha na ne babeufoi, tuti dautai aha.

17 Mayeai Abrahami ne mangfatafoi mito weia tuti medu wei deyo, "Kamitung ne wau, bohong mereha kuteai na nemu babeuwai we yunungwo." 18 Ampefe Ribkai su ne babeufoi to warangfo, tuti medu we mangfatafoi deyo, "Daie, bunungto." 19 Ribkai dohong mangfatafoi dunungna kaifo, medu we mangfatafoi deyo, "Yutu merehafeai we nemu untanesa etunung kontai, ambori earomitataha ahang kaha." 20 Ainanaya na ahera sari mereha na babeufoi to fi unta etunung naifoi, tuti mito to kamirei merehafoi aha we dutu mereha feai, ambori untafosa etunungna ehai. 21 Wape mangfatafoi doa mamunggasai, wiro medu fieai ahang kahai, mae seiraria kariri Ribkai ne niarifo, we deitawang kariri fio da weafo Yahwei fiatari we sobuai na mai ete bererie.

22 Na kutu untafosa etunungna efotourafo, mangfatafoi kia fimarandinai emasi satarai na Ribkai ubongfoi, tuti sata araha emasi boru na warangfo, fi ninai maraba tuti ne harga dadai. 23 Mayeai mangfatafoi medu wei deyo, "Boisaharai we yau, mandoni ne arikang diwau? Tuti na tamamu ne munufoi katai feai we ametena naya ne?" 24 Ainanaya Ribkai yoa wei deyo, "Nehu dai wonong fino Betueli, Nahori tuti Milkai une arikang dine. 25 Tuti na antone munufoi mani, katai feai we metena nayai, tuti na wanai ninoi sarahiai bitoya we nemu untanesa etang tuti etena nayai."

26 Ainanaya mangfatafoi disangkapa awebuka tuti somi aweu ureng disangso kahofa wau we Yahwei, 27 mae medu deyo, "Ifayai Yahwei, Allai mano nehu dai Abrahami somi wei, mano Enewawu tuti dohong kariri Ne kaiwo arerane we nehu dai Abrahamifo. Tuti Yahwei, mano wiwiaing yau kawurua na nehu rang rorongne to nehu dai Abrahami ne teranesa ma ninai!"

28 Mayeai kamitungfoi mito to inang ne munufoia tuti deisaha kariri fi kawariai nanai kai. 29 Ribkai roromang manei wonong fino Labani. 30 Na kutu Labani deti fimarandinai na Ribkai ubongfoi tuti araha na warangfo, tuti tarao kaiwo Ribkai medurai kariri kaiwo mangfatafoi medurai weifo, na ahera mitoa sobu kamirei merehafoi. Ampefe Labani sobu Abrahami ne mangfatafoi doari ria ne untafosa na wanai. 31 Ainanaya Labani medu we mangfatafoi deyo, "Dai mano Yahwei mioang wau, we fianie boari na borieine? Merama tara to antone munufoia. Imainenang katai na nehu munufoi we wau ampa, tuti katai kontai we nemu untanesa."

32 Ainanaya Abrahami ne mangfatafoi tuti ne inontaraifosa, era ria Labani to ne munufoi afui. Labani demi ne mangfatafosa etu fianggengfo weru untafosa, tuti etohong untafosa etampi tuti ebuai ninoi sarahiafo we katai untafosa etena nayai. Mayeai eha mereha feai we Abrahami ne mangfatafoi tuti ne inontaraifosa, eruai eawemifo nayai. 33 Na kutu emainenang fiangfo we etampifo, Abrahami ne mangfatafoi medu deyo, "Wiro yampi kaharai, mae yeyo yeikariri kaiwo ika ira ma ne akawuruwo." Ampefe Labani medu wei deyo, "Yo, tonana mani boisaharai ma."

34 Abrahami ne mangfatafoi medu deyo, "Yau mani Abrahami ne mangfata di yau. 35 Yahwei mioang nehu dai Abrahami paria, donio ne ra bitoya paria. Yahwei mioangni Dohong kambing, domba, sapi, keledai, unta tuti fianggengno emasi, peraki tuti woming mang tuti wiwing efau kontai. 36 Dai Abrahami nini ne wiwingno Sarai paria wewiwingkutung, arahio minohituti ne kaisung manei. Tuti kaisung nini dino Abrahami dohong ne ra minohitutirifoi we neni. 37 Nehu dai dino demi yau ifafora we ambori inari kariri kaiwo medurafo. Medu we yau deyo, ‘Wiro ka wiwing Kanani nini manei we nehu kaisungno Isaki fanai. 38 Wape todoni kontaio ro to nehu dai ne munufoia tuti we nehu terafosara we ka wiwing manei we nehu kaisungnei.’ 39 Iroa wei aha yeyo, ‘Masino wiwingfoi wiro miaya we da ria yau kaha mani todoni?’ 40 Wape medu we yau deyo, ‘Yahwei mano na arongfo iminohi yarangne, na yohong kariri Ne awiafo ambori Demi Ne wewaifo manei da ria wau we fiata wau. Donio fi ro weai ninai wobuai na mai, amani ka wiwing manei we nehu kaisungnei na nehu dai ne munurorongfo tuti na nehu terafosa. 41 Masino nehu terafosa wiro eroa we etohong ene kamitung manei we kari we nehu kaisungnei ma kaha mani, kosau weru nemu foforao tobuhirai ria yau ninai.’

42 Na kutu irawa sobu kamirei merehafoi mani, iwenadi na enehurorong yeyo, ‘Yahweh, Allai mano nehu dai Abrahami somi we Wau, kadono Fai rang we yau ambori fio ira weai ninai isobuai na mai. 43 Na ninai yoari kefang kamirei merehanei nina, masino kadawing manei da ma dutu mereha tuti imadu wei yeyo, "Bohong mereha feai na nemu babeuwai ma yunungwo," 44 masino kadawingfoi yoa deyo, "Yo, bunungna, tuti we nemu untafosa yohongsa etunung kontai," nana mani kadawing nani dino Yahwei deinawi we nehu dai ne kaisungfoi we ne wiwingne.’

45 Wiro iwenadi na enehurorong awao kai kaharai mae, na tantuma yeti Ribkai sodua babeufoi na warabeawafo, bia to kamirei merehafoia dutu mereha. Mayeai imadu wei yeyo, ‘Bohong mereha feai ma yunungwo.’ 46 Na ahera su babeufoi na warabiawafoi aweu tuti medu deyo, ‘Bunungna, tuti nemu untafosa yohongsa etunung kontai.’ Ainanaya yunung merehafo tuti nehu untafosa dohongsa etunung kontai.

47 Mayeai yutangni yeyo, ‘Mandoni ne kamitung di wau?’ Yoa we yau deyo, ‘Nehu dai dino Betueli, Nahori tuti Milkai une kaisung dine.’ Ainanaya itata fimarandinai emasi na ubongfoi tuti araha emasi boru na warangfo.

48 Ainanaya yisangkapa awehubuka ituang aweu urehu disangso kahofa wau isomi we Yahwei. Ifayai Yahwei, Allai mano nehu dai Abrahami somi wei, weo Andino wiwiaing yau na rangbo mesinei, donio isobu kamitung manei na nehu dai ne teranesa we ne kaisungfoi we ne wiwing nina. 49 Kawurua metaramio imadufe ampa, ampefe masino meteinawi menemiwawuwa we nehu dai Abrahami mani, meteisaharaifa we yau, wape bereri mani meteisaharaifa kontai we yau, ambori iwaitawanaifa tuti iserawe rang siai."

50 Ainanaya Labani tuti Betueli uroa wei ureyo, "Fio boiriri nini kiai na Yahwei ma, ampefe wiro aumadu fieai ahang kaha. 51 Boti, Ribkai dino doari na aromufe nana, kari tuti mura wa, ambori we wiwing we nemu dai Abrahami ne kaisungfoi, kariri fianai aino Yahwei medurafo."

52 Na kutu Abrahami ne mangfatafoi tarao kaiwo umadurafo, disangkapa awebuka suang aweu ureng disangso kahofa wau somi we Yahwei. 53 Mayeai mangfatafoi saio fimarandinai emasi, peraki tuti ansungno ne harga dedai, dohongnai we Ribkai. Tuti dohong fio ne harga dedaifo weai kontai we roromangfoi tuti we inanaifa. 54 Ainanaya Abrahami ne mangfatafoi tuti ne inontaraifosa etampi tuti etunung ruhiai tuti etena na nanaia.

Etenawa kamiaia mani, mangfatafoi medu deyo, "Muntoroa we yau we yarabera yau to nehu dai Abrahami aha."

55 Manamo Ribkai roromangfoi tuti inanai umadu wei ureyo, "Todoni mani, Ribkai niayai ria amea na ninai ari bei ete rahida sura akawuru wo, arahio da ria wau ki."

56 Manamo Abrahami ne mangfatafoi medu we suru deyo, "Wiro muwedua yau fanai, weo Yahwei niari yau isobu fio ira weane kawuru ampa. Ampefe muroa we yau yarabera yau we nehu dai Abrahami aha."

57 Ainanaya emadu wei eteyo, "Tonana mani, tasahu kadawingfoi mantauni ma tatutangni." 58 Ainanaya esahu Ribkai ma etutangni eteyo, "Maya we ro ria inontarainei e?" Yoa deyo, "Yo, imaya we ira riati." 59 Ampefe eroa we Ribkai tuti ne mangfata mano deitawangni na ketuifo, ura ria Abrahami ne mangfatafoi tuti ne inontaraifosara. 60 Tuti emoang Ribkai eteyo,

"Amerorombing ne wau, kadono wau we ai we arikang fubao wiro atoafong soi kaha!

Kadono nemu ririanei etahatawang ene aitetafosa tuti enayai na ene bendarifo!"

61 Ainanaya Ribkai tuti ne mangfata wiwingfosa emainenang ene fiangengfo, tuti etautai na untafo era ria Abrahami ne mangfatafoi tuti ne inontaraifosa. Tonanaifa mangfatafoi kia Ribkai, etaraberasa we Abrahami aha.

62 Na kutu nanai Isaki kawurua da na kamirei mereha Lahai-Roi ma tuti niayai na Kahofa Negepi na ne yawa tendafoi. 63 Na ramindena bei mani, Isaki dariai na ne yawa tendafoi ariei da wawerahai na katai wiarora weninoifo. Mayeai fioai ureng detia mani, deti untafosa era ma. 64 Ribkai kontai fioai ureng deti, na kutu detia Isaki nanafo, biari weru ne untafoi, 65 tuti dutang Abrahami ne mangfatafoi deyo, "Mang mandoni dino da ma nina?" Mangfatafoi yoa wei deyo, "Nehu dai, Isaki dine." Ainanaya Ribkai tebung wedua urengfo na ireu sawai na rahanangfo.

66 Mayeai mangfatafoi deisaha kariri fi kiaio niarifo we Isaki. 67 Ainanaya Isaki kia Ribkai, usuayai to inangno Sarai ne yawa tendafoi afui, tuti kiari we ne wiwingna. Isaki eneo Ribkai paria tuti na tonanafo sobu wawori. Weo enerorong fituayai na kutu inang Sarai mirehafo.