1 Rabuang bo Abrami ne fuina piara suraya indeata (99) nanai, Yahwei Deinawi netaraifoi we Abrami tuti Medu wei deyo, "Yau mani Allai Mano Iwemambiriu Sewafoi di Yau*. Taramuo Yau tuti nari kariri Nehu awiane pampang. 2 Yau ambori Yohong nehu kaiwo arerafo na Yau tuti wau, tuti Inari nemu ririafoi bitoya paria."

3 Ainanaya Abrami disangkapa awebuka somi aweu urengfo disangso kahofawau, tuti Allai medu wei deyo, 4 "Nehu kaiwo arerai Yohongnai we wau finina. Wau ambori we wereng we kaiwasa bitoyafoi. 5 Ampefe ninaia mani wiro wonomu Abrami* ahang kaha, mae wonomu fino Abrahami*. Weo Iruai wau we dai we kaiwasa bitoyafoi.✝ 6 Yau ambori Inari wau bawing separai, nemu ririafoi bitoya paria, tuti ewe kaiwasa bitoya, tuti na nemu ririanei ambori manea ewe mananu ki. 7 Yau ambori Yohong kaiwo arerafo na Yau tuti wau, tuti nemu riria bia we riria we fitawafa, ambori Yau iwe Allai we wau tuti we nemu ririafoi sentenang.✝ 8 Nu munohi nai we inontarai aisei nini, amani nu Kanani foi ambori Yohongni sentenang we wau tuti nemu ririafoi we nemuni we fitawafa, tuti Yau ambori iwe Allai wesa."✝

9 Allai medu we Abrahami aha deyo, "We wau mani, rutawang Nehu kaiwo areranea mutu, wau tuti nemu riria bia we riria. 10 Nehu kaiwo areraio rutawangnaia mutu mani, na wau tuti nemu ririanei mani tonina, inontarai mang mano etaubau enumi na nemu ririawai mani todoni kontaio ewe sunati.✝ 11 Todoni kontaio wau we sunati, tuti fi nanai we fiainawiai kariri kaiwo arerai na Yau tuti wau. 12 Inontarai mangwasa kiai mano ene rahida indeatoru to yai, todoni kontaio ewesunati, amani mano nemu ririawai tuti mano wiro nemu riria kaha, wape etaubau enumi na nemu munu rorongwa ete worisa na doi ria inontarai asei fosa. 13 Ampefe mano etaubau enumi na nemu munu rorongwa tuti mano worisa na doi fosa todoni kontaio wesunati. Sunati nani we fiainawiai na mene taraiwai, we deinawi Nehu kaiwo areraio Yohongnai we meane watai we numainu. 14 Mano wiro niari kariri sunatifoi kaha mani, todoni kontaio metatari weru ne kaiwasa terafosa, weo niari kariri Nehu kaiwo arerane kaha."

15 Mayeai Allai medu we Abrahami aha deyo, "Nemu wiwingno Saraii mani, wiro wahui na Saraii ahang kaha, wape na ninai tofongna mani wahui na Sarai, i wonong finana. 16 Yau ambori Imoangni ki tuti i ambori minohituti kaisung manei we wau ki, tuti ambori Imoangni kontai. Ampefe i ambori we ai we kaiwasanei kiai. Tuti na ne ririawai, ambori manea ewemananu ki."

17 Ainanaya Abrahami disangkapa awebuka somi aweu ureng disangso kahofa wau, tuti miri bororawa, medu na enerorong, "Taraie, manei ne fuina piaring (100) mani ne arikang ne? Tuti taraie Sarai na ne fuina piara sura (90) kawurua ninai minohituti arikang raie?" 18 Ampefe Abrahami medu we Allai deyo, "Tonana mani, Ismaeli dino Roa wei we sobu nebengfo ria Wau."

19 Wape Allai medu wei deyo, "Bereri! Mae nemu wiwingno Sarai ambori minohituti kaisung manei we wau, tuti bohongni wonong fino Isaki. Na i ambori Yohong Nehu kaiwo arerafo riati tuti kaiwo arerai nanai watai we numainu we ne ririafosa. 20 Wape we Ismaeli mani, butangnaifa fefe Iroa we nemu kaiwowa. I ambori Imoangni tuti Yohong ne riria bitoya paria tuti i ambori dawingno mananu suraya mandu (12). Yau ambori Inari ne ririafoi ewe kaiwasao bitoya ki. 21 Wape wiro Yohong kaiwo arera riati kaha. Nehu kaiwo arerane mani Yohongnai ria Isaki, nemu kaisungno Sarai minohitutiri we waufoi, na fuina bo da ahamafoi, toyari na kutu ninaifa." 22 Allai medu ria Abrahamia kai tonanafo, Da weruia.

23 Mayeai Abrahami sahu ne kaisungno Ismaeli tuti inontarai mangfosa mano etaubau enumi na ne munurorongfoi, tuti mano wiorisa na doi fosa kiai, na rahida nani kontaio wesunatisa kiai, kariri fianai aino Allai medurai weifo. 24 Na rabuang bo Abrahami wesunati nani mani tete ne fuina piara sura indeata (99) finana. 25 Tuti Ismaeli kontai wesunati nana mani ne fuina suraya botoru (13). 26 Ampefe Abrahami tuti ne kaisung Ismaeli uwesunati ruhiai na rahida boyari, 27 kontai ne inontarai mang mano etaubau enumi na ne munurorongfoi, tuti mano wiorisa na doi fosa, ewesunati kiai ruhiai riati.