1 Ampefe Allai niari rorafaisi tuti nunei, tuti fi kiaio niayai naifo, kai finanaia. 2 Ainanaya Allai fiotourai na rahida bo itufoi.✝ 3 Ainanaya Allai mioang rahida bo itufoi tuti diri rahida nani we rahida mirarebanai paria. Weo rahida bonani fiotourai weru fi niaririfoi.✝

4 Allai niari rorafaisi tuti nunei tuti fi kiaio niayai naifoi mani sonina.

Na rabuang bo Yahweh Allai niari rorafaisi tuti nuneifo mani, 5 wiro fi tifufo kawariai na kahofanei kaharai. Weo Yahweh Allai wiro niari metangfoi bia to nunei kaharai, tuti wiro inontarai manea we erufi nai kaharai. 6 Wape merehafoi dautai na kahofafo we dohong wawasa nunei.

7 Na rabuang bonani Yahweh Allai kia kahofa feai, niari mang manei, tuti firarang ansengfoi to ubongkamireifoi, ampefe darang we inontaraia.✝

8 Mayeai Yahweh Allai niari romi bei na Edeni, na do wanang murangfoi, tuti dohongno inontarai niariri nani niayai nai. 9 Yahweh Allai niari ai denteng bitoya paria doari na romifoi. Tifu ne bongfoi mehikai paria we angni. Na romi rabuangtahifo, tifu ai roworu amani, aio dohong arang we fitawafa tuti aio wedaya waitawang kariri ne bengfo tuti ne karirafo.✝

10 Waya rowei deda na Edeni we dohong wawasa romifoi. Waya nani dedara kewariai mani sobaurai weroboa amani, 11 bo reantenangfoi wonong fino Pisoni, waya nani dedara dedawari kahofa Hawilai. 12 Katai nani ne emasifoi denteng sewa tuti kesi bedola ne kaisea* na nanai, tuti kamiei krisoprasi* kontai na nanai. 13 Waya bo borufoi mani wonong fino Gihoni, waya nani dedara dedawari kahofa Kusi. 14 Waya bo botorufoi wonong fino Tigrisi. Waya nini deda na Asyuri do wanang murangfoi. Mae waya bo boafoi mani wonong fino Efrati.

15 Ainanaya Yahweh Allai kia mangfoia dohongni niayai na romi Edeni we yufi na romifoi tuti derarati. 16 Yahweh Allai medu we mangfoi deyo, "Ai doari na romi fenini, bongnei kiai mani bangni, 17 wape aio we waitawang kariri ne bengfo tuti ne karirafo nani mani wiro bang bongfoi fanai. Weo rahida bo bangnifoi mani, mureha rai."

18 Mayeai Yahweh Allai medu aha deyo, "Inontarainei meiri keburu mani, beng kaha. Ampefe Inari ne maniwowirio mesi wei manei we fiatari." 19 Mayeai Yahweh Allai kia kahofafeai. Na kahofa nanai, Niari maino andowanesa tuti romunesa fafong akawuruwo. Andowa nanisa Kiasa we mangfoia, ambori Allai deitawang kariri todoni dohong ewonomifo. Ampefe tonanaifa reantenang pario andowanei kiai tuti romunesa kiai ewonomi finanaifa. 20 Inontaraifoi dohong andowanei kiai tuti romufosa ewonomifo, wape mantauni wiro sobu ne maniwowiri mesi manei we fiatari kaha.

21 Ainanaya Yahweh Allai niari mangfoi denawa seo, na kutu dena nanai, Allai fiating mangfoi neina neurangfo bei, tuti katai fiating neina weruifo mani tebung weduarai na taraifeai. 22 Na neina neurangfoi nani, Yahweh Allai niari wiwing manei nai tuti kiari weia. 23 Ainanaya mangfoi medu deyo, "Andinini, inontaraio mesi kariri yau, ne neina nei na nehu neina nei, ne tarainei na nehu tarainei. I mani afui we wiwing, weo Yahwei kiari na mangnei fefe*." 24 Nanai wedaya mangfoi ambori sawing inang tamang suru, tuti weboyari ria ne wiwingfoi. Ampefe uweboyari we ubaung une munurorong.✝ 25 Mangfoi tuti wiwingfoi unayai arora, wape wiro umamaya wawera suru kaha.