1 Mayeai Yakupi sahu ne kaisung fosa ma tuti medu wesa deyo, "Mefanduhi mea kefang yau ma, ambori yeikaririai we mea, kariri fianai aino ambori mesodairai na rahidao da ma foi.

2 Mefanduhi mea metaramididawai, Yakupi ne kaisung ne mea,

metaramio mene dai Israeli.

3 Rubene, wau mani nehu kaisung reantenang di wau,

nehu mambiriu di wau, taubaunumu reantenang na iwe mambiriufo.

Wauno etato wau tuti

wemambiriu sewa nehu kaisung wei fosa ne.

4 Wau wiro ato wau we kaisung fuba ahang kaha,

weo wau nemutarai kariri merehao wiro taupiki kaha.

Wau bena ria tamamu ne wiwingnei na ne fata dena nai nei.

Wau nari tamamu ne fata dena nai nei werarika ampa!

5 Simeoni tuti Lewi mani, mambetahatui di suru,

une fi mamunafo we umei fifiani kontai.

6 Kadono yau wiro imaya we ikontai ria suru we fi umadu ruhiai karirafo kaha,

kadono nuhuaninunei wiro weboyari na efanduhisa fo kaha,

weo ukasou mani umung inontarai,

tuti uferangkutu sapi aweng afai singfo we ufaraise.

7 Yeikanggani ukasoufo,

weo ukasou mani umansansoang paria,

yeikanggani suru, weo uremimamang paria.

Yau ambori yetotatesa na Yakupi ne kaisung fosa.

Tuti isotatesa na inontarai Israeli fosa kiai.

8 Yehudae, wau ambori tahatawang nemu aiteta fosa,

nemu doroifosa ambori efiai wau,

tamamu ne kaisung nesa ambori etuang esomi na aromuwa.

9 Yehudae, wau mani nemu tarai toyari singa antung,

memunara kai mani daraberahi to aisangging foi aha,

disangkapari wiatai toyari singa, mandoni dino wemambiriu we biaungni ne?✝

10 Aitatohi mananu foi wiro tiwera weru Yehudai kaha,

paria mano ne haki sauwifoi dama,

tuti kaiwasanei sentenang ambori etuang esomi wei.

11 I ambori tebuhi ne keledai foi na ai anggurifo,

tuti ne keledai antungfoi na ai angguri denteng paria,

i ambori fia ne ansungfo na angguri nukuru,

tuti ne ansung dawaroifo na angguri nukuru berika toyari rika.

12 Urengfo mahikai paria, barika sewa weru angguri nukuru,

tuti derengfo mutubaru, bua sewa weru ui nei.

13 Sebuloni ambori niayai na nafareng,

ne katai foi ambori we katai kapari dawohi nayai,

ne katai foi fiabai paria werea na Sidoni.

14 Isakari mani netarai toyari keledaio wemambiriu,

wiatai rahangno nawang maraba.

15 Na kutu deti katai minohi ukai nai bei denteng tuti mehikai mani,

suang aweu sodua fi maraba na warabiawafo,

tuti yu fi toyari woming.

16 Dani ambori kiutu kaiwo we ne kaiwasa fosa,

netarai toyari riria Israeli mano wei nesa.

17 Kadono Dani netarai toyari tawai na rangfoi,

toyari tawai memuna wiatai na rang ketuifoi tuti

kiri kuda aweng fo ampefe soiri, wedaya inontarai mano dautai naifoi sawai to fui.

18 Oh Yahweh, yau mani yemang we Tawing yau weru ne karirafo.

19 Gati mani, ambori inontarai emamuna fosa etawi,

wape i ambori daraberahi dawi sa aha.

20 Asyer, wau tuti ne ririanei ambori mene fiang bitoya paria tuti denteng,

wau ambori maoinenang fiang mahikaifo we mananu fosa.

21 Naftali mani netarai toyario rusa wiwingno mito funomai,

i ambori sobu arikang tuti ne arikang fosa euremi bohi paria.

22 Yusupi netarai toyari aio ne bong bitoya,

sifu rurang mereha ureng fefe,

arirawangfo sifu dautai ayai na wore kamiei fo.*

23 Masino ne aiteta fosa etohongburi,

tuti etanai na ene afaifo,

24 wape ne afaifo papayai tuti warangfo mutu,

weo fatafo na Mano we Mambiriu Paria we deitawang wedua Yakupi fo.

I mani Mantahung tuti we Uai Kamiei we Israeli.

25 Kadono nemu dai ne Allai ambori fiata wau,

tuti na Allai Mano weMambiriu sewafoi,

ambori Mioang wau na moangno na rorafaisi,

tuti moangno mereha ureng na rawanang kehabi,

tuti kadono nemu ririanei fiabai tuti nemu fiahung nesa ene arikang bitoya.

26 Tamamu ne moangne fuba sewa weru uai fafongpa,

amani fitantanang, mahikai sewa wiwoio na fafongpa.

Kadono nani kiai bia to Yusupi nungkamieifoi,

tuti bia sau inontarai mano wewonong paria na ne doroifosa.

27 Benyamini mani netarai toyario serigala memuna,

na kamiaifo miung ne aiteta fosa,

tuti na ramindenafo mani deto fio dewarai nanai."

28 Tonanaifa, riria Israeli suraya mandu fosai nana, tuti kaiwo ene dai medurai wesa fo. Na kutu mioangsafo, mansiari-mansiari mioangsa na moangno mai kaririai mansiari-mansiarifo.

29 Ainanaya Yakupi deretawang ne arikang fosa deyo, "Katu mani imereha toyari nehu wereng fosa. Ampefe mesarai yau rurang nehu wereng fosa na wingsaburungno, na Efroni inontarai Heti foi ne romifoi, 30 wingsaburungfoi wiatai na romi Makpelai, na do wanang murang Mamre na kahofa Kanani. Romio Abrahami wioriri kawuru ria Efroni inontarai Heti foi, we ne fafo fine.✝ 31 Katai nani dino, esarai Abrahami tuti binengno Sarai, Isaki tuti binengno Ribkai,✝ na nanai kontai isarai Leai. 32 Romifoi tuti wingsaburung na wanai Abrahami wioriri ria inontarai Heti fosara."

33 Yakupi deretawang ne kaisung fosara kai nanafo, tibari aweu wiatai tuti mirehara. Ampefe mireha ria ne wereng fosa.✝