1 Fuina beiru teai aha mani, Allai titua kariri Abrahami ne yoasoafo. Medu we Abrahami deyo, "Abrahame" Ainanaya yoa deyo, "Ya, Seng"✝

2 Allai medu wei aha deyo, "Ka nemu kaisung mansiari Isaki mano enemuwawuti wai, ro to kahofa Moria, tuti bohongni we korbanio nunumi we Yau na uai bo ambori Yeinawi we waufoi."✝

3 Ampefe Abrahami doari kameai kutung, meinenang ne keledaifoi, tuti sahu ne mangfata mandu tuti ne kaisungno Isaki. Bebau aimasa feai meinenangmai we korbani nunumifoi, ainanaya era to katai bo Allai deikariri wei foi. 4 Era wa rahida bo botoru foia mani, Abrahami yuai ureng deti afong mani, deti katai era weifoi na wairoi. 5 Mayeai Abrahami medu we ne mangfatafo suru deyo, "Munayai na ninai tuti keledainei, mae yau tuti nehu kaisungnei auruino aura to wanaia we auwenadi nayai, awao kai mani aurarabera auru we muru aha ma."

6 Ainanaya Abrahami kia aimasao we niunung korbani nayafo, yuaisai ayai ne arikang Isaki soduatai, mae andino kia adiafo tuti noifoi. Tonanaifa ura ruhiai to kataifoi. 7 Urawa rang rabuang Isaki dutang tamang Abrahami deyo, "Daie!" Tamang yoa wei deyo, "Kaisung ne wau tofino?"

Isaki medu aha deyo, "Adia fininai tuti aimasa finanai, mae domba antung ohongni we korbani nunumifoi andidonie?" 8 Abrahami yoa deyo, "Nehu kaisung ne wau, Allai dino ambori meinenang domba antung manei we korbani we Mantauni terai ki." Ainanaya ura ruhiai paria.

9 Na kutu ura paria usobu katai Allai deikariri we Abrahami foi, Abrahami biaung mesba bei na nanai, sang aimasafo watai na mesbafoi. Mayeai wiora Isaki warangfo tuti awengfo, dohong Isaki wiatai na aimasa nuwowongfo na mesbafoi.✝ 10 Mayeai Abrahami fiating noifoi, yuaisi we disang ne arikangfoi we miungni we korbani.Abrahami de miung Isaki 11 Wape na kutu Abrahami de disang ne arikangfoi, na tantuma Yahwei ne wewai manei medu na rorafaisi meu deyo, "Abrahame! Abrahami wo!"

Abrahami yoa wei deyo, "Ya Seng, yau nina." 12 Yahwei medu na wewaifoi deyo, "Wiro mung arikangwai fanai ete nariri towea fanai. Weo ninaia mani Yeitawangnai ampa weo tarai womi we Yau tuti roasoaifa, tuti wiro enemurorong soriru we bohong nemu arikang mansiari wai we Yau kaha."

13 Mayeai Abrahami fiobera ureng deti kurufuia mani, na tantuma deti domba mang manei nungkaradoifo sobu na ai raifofa arirawangfo. Ampefe kia dombafoi ma miungni dohongni we korbani nunumi we Allai, we yiwang ne arikangfoi.Domba nungkaradoi sobu na ai arirawang 14 Ampefe Abrahami dohong katai nani wonong fino, "Yahweh Yireh, nana mani Yahwei meinenang fianai aino tatohong weafo." Donio paria sobu ninai inontarai emadu eteyo, "Na uaifo Yahwei ambori meinenang fianai aino tatohong weafo."

15 We beru Yahwei ne wewaifoi medu na rorafaisi we Abrahami meu, 16 deyo, "Ifafora na mantaung Yau Wonohune terai. Weo wau nari kaririai ampa, tuti wiro enemurorong soriru we bohong nemu arikang mansiari wai we Yau kaha,✝ 17 ampefe Imoang wau fuba paria tuti Inari nemu ririawai bitoya toyari awaha na rorafaisi tuti toyari ninuaing na nafareng, tuti nemu ririanei ambori etahatawang ene aitetafosa.✝ 18 Na nemu riria nani dino kaiwasa na nunei sentenang esobu moangfo, weo wau nari kariri Nehu kaiwone."✝

19 Mayeai Abrahami tuti ne arikangfoi urarabera suru we ne mangfata mandufo suru aha, tuti etarabera ea ruhiai to Bersyebara, tuti Abrahami niayai pampang na nanaia.

20 Mayeai Abrahami tarao kaiwo we ne tafuaio Nahori ne wiwingno Milkai sobu kaisung indeatoru. 21 Kaisung reantenangfoi wonong fino Usi, ne tahatuifoi wonong fino Busi. Sua aha mani Kemueli, andino Arami ne dai dine. 22 Kontai Keseti, Hasoi, Pildasi, Yidlafi tuti Betueli. 23 Betueli nini dino dawingno Ribkai ne. Ampefe arikang indeatoru ninisaino Milkai dawingsa we Nahori, Abrahami ne tafuai. 24 Nahori kontai ne wiwing siai manei wonong fino Reumai. Tuti Reumai nini ne arikang mana amani, Tebahi, Gahami, Tahasi tuti Maakhai.