1 Ainanaya Yakupi da nariai aha, mayeai Allai ne wewai fosa era ma ehangguni. 2 Na kutu Yakupi detisa nanafo medu deyo, "Katai nini Allai ne afai mamuna enayai nai." Ampefe dohong katai nani wonong fino Mahanaimi*.

3 Mayeai mani Yakupi demi ne inontaraifo manea era foniai to kahofa Seiri na nu Edomi foi, we esobu ne tafua Esauwi. 4 I dohong parenta wesa deyo, "Merawa memadu we nehu tafua Esauwi tonina, yau Yakupi, nemu mangfata nei. Yau inayai ria kahi Labani iwe inontarai aisei paria sobu rahida bonini. 5 Yau kawurua nehu sapi, keledai, kambing tuti domba, woming mang tuti wiwing. Tuti yemi nehu inontarai eteisaharai fi ninai we tafua wau, ambori enemuwawu yau."

6 Ainanaya inontaraio Yakupi demisafo emadua kai nanai, mayeai etaraberasa we Yakupi aha tuti emadu wei eteyo, "Ameteisaharai we nemu tafua Esauwi kawurua ampa, tuti i da ma we sobu wau, da tutu ne inontarai piaring we bea (400)." 7 Yakupi tarao kaiwofo nanai mitai paria tuti arohuayai. Ampefe deto kutu ne inontarai era riati fosa, tuti ne fiahung kambing, domba, sapi tuti unta fosa we rabuang boru. 8 Weo enetituaitai deyo, "Masino Esauwi da ma memuna tuti sahatawang nehu inontarai nesa rabuang bei mani, rabuang bo wei foi ambori ekaharaifa."

9 Mayeai Yakupi wenadi deyo, "Ya Alla mano nehu tafui Abrahami tuti nehu dai Isaki usomi we Wau. Ya Yahweh Wauno kawurua Modu we yau Boyo, Barabera wau to nemu nufoi tuti nemu terafosara. Tuti Yauno yererai we ambori Yohong ne mahikaifo we wau. 10 Wiro imai we isobu Nemu Bengwa tuti Enemuwawuwa kaha, neo Boinawiai we Nemu mangfata ne yau. Weo manta ika aitatohi nini na kutu ira kutu waya Yardeni nini, wape yarabera yau to ninai ma ne nehu inontarai tuti fiahung rabuang boru ampa. 11 Kadono tawing yau weru nehu tafua Esauwi, weo imataiti fefe. Dohonao da ma miung yau tuti nehu wiwingnesa tuti nehu arikangnesa fe. 12 Weo Wau modu kawurua Boyo, Wau ambori nari mahikaifo we yau, tuti Nari nehu ririanei netarai toyario ninuaing na nafareng, ne bitoyafo wiro ato afongsoi kaha." ✝

13 Ainanaya dirua mani dena na nanaifa. Kamiaia mani kia fiembaitafo dohongnai we ne tafua Esauwi, 14 amani, kambing wiwing piaring we beru (200) tuti kambing mang piarei (20), domba wiwing piaring we beru (200) tuti domba mang piarei (20), 15 unta piareia surao (30) etohong uio ene arikang fosa, sapi wiwing piaru (40) tuti sapi mang sura (10), keledai wiwing piarei (20) tuti keledai mang sura (10). 16 Yakupi deto kahutu fiahung fosa werabuang beiru tuti dohongsa we ne mangfata fosa we ewaitawangsa. Medu wesa deyo, "Mera foni yau, tuti meteitawang merawa, wiro rabuang bei da kefang rabuang bei fanai." 17 Yakupi demi ne mangfata mano da fafongfoi deyo, "Masino ne tafua Esauwi sobu wau tuti dutang bera wau deyo, Nemu dai di mandonie? Tuti boyo ro to donie? Mandoni dino ne fiahung fuba nini kiaine? 18 Roa wei tonina, Nemu mangfata Yakupi nengsaine. Fiahung nini kiai dohongsa we fiembaitai we ne tafua Esauwi wau, tuti Yakupi mantauni da na fui fe fo."

19 Yakupi medu kaiwo nanai kontai we mangfata mandufoi tuti mantorufoi tuti inontarai fubao era tutu fiahung rabuangfoi kiai, deyo, "Toyari kaiwo antanafa imadurai kawurua nanai, memadurai we Esauwi masino mera sobui. 20 Tuti todoni kontaio meteisaharai wei meteyo, Nemu mangfata Yakupi mantauni datua amea na fuifo ma fo." Weo Yakupi enetituaitai deyo, "Na fiembaitaio yohongnai ninai, kadono Esauwi enerorong denteng we yau, na wiro ausobu auru kaharai." 21 Ampefe fiembaitafo demi ne mangfata fosa eha fafong, wape mantauni dena na ne yawa tendafoi diru nani.

22 Diru nanai kontaio Yakupi doa weru denafo, kia ne wiwingfo suru tuti ne woming wiwingfo suru tuti ne arikang suraya mansiari (11) fosa, era kutu waya Yaboki na katai sayafo. 23 Kiasa era kutu waya foia nanai, Yakupi daraberahi aha tuti demi ne mangfata fosa eha ne fianggengfo era kutu wayafoi aha. 24 Mae Yakupi mesiri niayai na nanai. Na tantuma inontarai mang manei da wei ma, ururai we ubabari suru paria siwewarai. 25 Na kutu inontaraifoi deitawanai we wiro sahatawang Yakupi kahai nanai, bioifating Yakupi neina awedungfoi, ampefe neina awedungfoi tifating. 26 Ainanaya inontaraifoi medu wei deyo, "Tawing yau ambori ira, weo siwewarai ampa." Wape Yakupi medu wei deyo, "Moang yau akawuru wori, itawing wau ro ki."✝ 27 Ainanaya inontaraifoi dutang berahi deyo, "Wonomu fidoni?" Yakupi yoa wei deyo, "Yakupi." 28 Mayeai inontaraifoi medu wei deyo, "Na ninai tofongna mani wiro wonomu fino Yakupi ahang kaha, mae Israeli*. Weo bapa Allai tuti inontaraifoi tuti tahatawang suru."✝ 29 Ainanaya Yakupi dutang berahi aha deyo, "Wonomu fidoni?" Wape inontaraifoi yoa wei deyo, "We fianie butang we wonohune?" Mayeai mioang Yakupi na nanaia.✝

30 Ampefe Yakupi dohong katai nani wonong fino Penieli*. Weo deyo, "Yau kawurua yeti Allai urengfo na urehune ampa, wape wiro imereha kaha." 31 Wofoi sambewaraia, mayeai Yakupi da weru Penieli, tuti da soberahi weo neina awedung neungfoi tifating fefe. 32 Nanai wedaya paria sobu nina mani, inontarai Israeli fosa wiro etangno andowa taraio nayai na awedungfoi kaha. Weo inontaraifoi bioi fating Yakupi awedung neungfoi fefe.