1 Ainanaya Allai mioangno Noki tuti ne arikang mantorufo mae medu we itoru deyo, "Muntorawing separai bitoya we muntosefa nunei.✝ 2 Romu urengnei kiai, andowanesa kiai na rei reisi tuti diangnesa kiai na rawanang rausi, ea kiai ematai muntoru paria. Ambori munto wemambiriu sau ea. 3 Fi darang nani kiai ambori we fiang we mea. Netarai kariri fi tifuo reraung kehe Yohongni na fafongpa, fi nani kiai Yohongni we mea. 4 Wape fiangno wiro metang kaha mani, taraio werikafo, weo arangfoi niayai na rikafoi.✝ 5 Wape we mene rikawa mani, mandoni kontai, inontarai ete andowa, mano miung inontarai mani, Yau ambori Yohong aiboi mararehafo wei ki. 6 Weo Allai niari inontarainei kariri mantauni. Mandoni dino warang rikao inontarai manei mani, wenani kontai ambori inontarai siai manei wararika soi ki.✝ 7 Tuti we mea, metawing separai bitoya ambori mene ririawai sefa nunei sentenang wiro atoafong soi kaha."✝

8 Mayeai Allai medu we Noki tuti ne kaisung mantorufo deyo, 9 "Muntotarami ma, nehu kaiwo arerai Yohongnai we muntoru tuti muntone ririanei, 10 tuti fidarang kiaio enayai ria mea nanisa, amani romuwasa, andowa enayai na rei reisa, amani mano dariai ria mea na wa fiabaiwai. 11 Nehu kaiwo arera we mea finina, na ninai tofongna mani, Yau wiro inari foa fiabai bei ahang kaha we Imung fidarangnei kiai na nunei." 12 Mayeai Allai medu deyo, "Fio we fiainawiai watai we numainu kariri Nehu kaiwo areraio Yohongnai we mea tuti fi darangnei kiai mani, 13 Inari ewi bei netarai toyario afai na rorafaisi we fiainawiai kariri Nehu kaiwo arerai we nunei. 14 Masino Itabung rorafaisi na kafafe kehubang we wemetang, wape ewifoi kiawariai mani, 15 Arohuo Nehu kaiwo arerai Yohongnai we mea ninai, amani we mea tuti fidarangnei kiai, weo wiro Yohong foa fiabai bei we miung nunei awao wioru kaha. 16 Masino Yeti ewifoi kiawariai na kafafefo mani, Arohuo Nehu kaiwo areraio watai we numainufo, na Yau tuti fidarangnei kiai na nunei." 17 Ampefe Allai medu we Noki deyo, "Tonanaifa fiainawiaio Yohongnai kariri Nehu kaiwo arerane we fidarangnei kiai na nunei finana."

18 Noki ne kaisungno itohawariai riati na wa fiabaifoi mani, Semi, Yafeti tuti Hami. Hami mani Kanani ne dai dine. 19 Noki ne kaisung mantorune itone ririanei dino sefarai na nufi sentenang ninai.

20 Noki mani, inontarai dohong romi dine, andino reantenang parifo niari romi angguri ne. 21 Rahida bei dunung anggurifoia meyeru nanai, dena arora na ne yawa tendafoi. 22 Ainanaya Hami, dai we Kanani fosa, detio tamang Noki we wiatai dena arora nanai, da toboriai deisaharai we netafuai suru. 23 Ampefe Semi tuti Yafeti uka ireu rowei, urohongni sawai na uwarami biawafo, ainanaya ura kurumifui afui, mae uwati berahai tuti utabung wedua utamamifoi ne mamayafo.

24 Na kutu Noki ureng marandingfo, taraoai we fianai aino ne kaisung fuifoi niari wei tonanafo, 25 medu deyo,

"Yeikanggani Kanani!

Kadono i ambori wewomingno tewawa paria we ne doroi weifosa."

26 Tuti Noki medu aha deyo,

"Fayai feai we Yahwei, Allai mano Semi somi weifoi.

Wape Kanani ambori wewoming we Semi.

27 Kadono Allai mioang Yafeti na dohong katai bitoya wei.

Kadono ne ririafoi eminohi ria Semi ne ririafoi.

Wape Kanani ne ririafoi ewewoming we Yafeti ne ririafoi."

28 Foa fiabaifoia kiaia mani, Noki minohi darang fuina piaring we betoru piarua sura (350) aha. 29 Ampefe Noki mireha na ne fuina piaring we indeata piarua sura (950).