1 Mayeai Yusupi suang aweu fiaung tamanai, sai tuti niunahi. 2 Tuti Yusupi demi manggarawang mano erufi wei fosa, we enari tamang netarai mirehafoi na fi nunsai mamporifo. Ampefe manggarawang fosa enari Israeli netarai mirehafoi na fi nunsai mamporifo. 3 Fi enari nanai dang rahida piaru (40), weo enari fi nunsai mamporifo we inong marareha mani wairoi tonanai. Tuti inontarai Mesiri fosa esai Yakupi wairoi rahida piatoru sura (70).

4 Rahida eminohi ewekoyafo kai nanai, Yusupi medu we inontarai mano erufi na Firauni ne munu mananu rorongfo, deyo, "Masino menemiwawu yau mani, memadu we Firauni, meteyo, 5 nehu dai demi yau ifafora kawurua, deyo, ‘Wiro waroi ahang kaha mae imereha rai. Wurai yau na nehu fafo imainenangni kawurua na kahofa Kanani fo.’ Ampefe roa we yau ira to wanaia, ambori isarai nehu dai, mayeai yarabera yau aha ma."✝

6 Ainanaya Firauni medu deyo, "Ro to wanaia tuti wurai nemu dai toyari neo demi wau kawurua we foforafo."

7 Mayeai Yusupi da to Kanani we sirai tamangnaifa. Tuti mano erariati mani, Firauni ne inontarai mano erufi wei fosa, mano ewewafoniai na munu mananu rorongfo tuti mano ewewafoniai na kahofa Mesiri fo, 8 Yusupi ne munurorongfosa kontai, ne doroifosa tuti ne dai ne munurorongfosa. Mano wiro era riata kaha mani, ene arikang raifofa fosa tuti ene fiahungfosa, eaino enayai na kahofa Gosyeni ne. 9 Afaimamunao etautai na kereta tuti kudafo era riati kontai, donio inontarai era riati fosa efau paria.

10 Na kutu era wa sobu Goren-Haatati, kataio eteni potangnai, na waya Yardeni do wanang murangfoi, na nanai esaifo fuba paria, tuti Yusupi minohi koya we tamanai wairoi rahida itu. 11 Na kutu inontarai Kanani fosa ewati inontarai Mesiri fosa esai na Goren-Haatatifo, emadu eteyo, "Nina mani inontarai Mesiri esai ne fuba pari finina." Nanai wedaya mani katai nani wonong fino Abel-Misraimi, nana mani inontarai Mesiri esai fuba paria. Katai nani wiatai na waya Yardeni eneung dowaruai.

12 Yakupi ne kaisung fosa enari kariri fianai aino dererai wesafo. 13 Ea ehari to kahofa Kanani, tuti esirai na wingsaburung Makpelai, amani romi na do wanang murang Mamrei, neo Abrahami wiori kawurua ria Efroni inontarai Heti foi we fafo we ne munurorong fosa.✝ 14 Esirai tamangnaia kai nanai, Yusupi tuti ne doroifosa tuti inontarai mano era ruhiai riati we esirai tamangna foi etaraberasa to Mesiri aha.

15 Na esirai etamamifoia kai nanai, Yusupi ne tafuai ewatioai we etamami foi mireha ampo, emadu eteyo, "Masino Yusupi aroo fi karira tanari weifo mani todoni raie?" 16 Ampefe etami inontarai manei deisaharai we Yusupi, "Wiro nemu dai mireha kaharai mae, dereraia kawurua deyo, 17 kaiwo ambori memadurai we Yusupi, meteyo, ‘Boyai nemu tafuai ene sarawai tuti ene sasari nei, weo ea enari ne karirafo we wau kawuruampo.’ Ampefe kutu ninai boyai amene sarawaio amenari we waufo. Amea mani mangfata Allai, mano tane dai somi weifoi." Na kutu Yusupi tarao kaiwofo nanai saia.

18 Mayeai ne tafuai mantaungsa era ma etisangkapa eawemibuka na arongfo tuti emadu eteyo, "Amera ma we amewe mangfata we wau."

19 Wape Yusupi medu wesa deyo, "Mematai fanai, weo wiro Allai di yau kaha. 20 Tarai, mea metohong ne karirafo we yau kawuru ampa, wape Allai kawurua yiwangna ne bengfo, kariri fianai aino arahi kawariai nina, ambori dewawu inontarainei sentenang etarang. 21 Ampefe wiro mematai fanai, yau ambori yohong fiang we mea tuti we mene arikang wasa kontai." Tonanaifa, Yusupi wewori ne tafuai enemirorongfoi na kaiwo medurafo.

22 Yusupi tuti ne doroifosa tuti ene munurorongfo, enayaia epapayai na Mesiri, tuti Yusupi darang fuina piaring sura (110). 23 Yusupi wiro mireha kaharai mae, deti Efraimi ne arikang tuti ne tafuisa paria sobu riria bo botorufoi. I kontai deti Manasyei ne kaisung Makiri ne arikang mano etaubau enumi na Yusupi ne munurorongfo mani kiasa we mantauni ne arikang.

24 Yusupi medu we ne doroifosa deyo, "Wiro waroi ahang kaha mae ambori imereha rai, wape Allai ambori Fiata mea tuti Kia mea to boriai weru nu nini, to nu bo Dereri kawurua na Fefora we Abrahami, Isaki tuti Yakupi fo."

25 Ainanaya Yusupi demi Israeli ne arikang fosa efafora, deyo, "Allai ambori Fiata mea ki. Na kutu mera to boriaifo mani meha nehu tarai mirehanei weru nu nini."✝

26 Mayeai Yusupi mireha na ne fuina piaring sura (110). Netarai mirehafoi enariri na fi nunsai mamporifo, tuti etohongni wiatai na burua (wa) inontarai mararehafoi na Mesiri.