1 Mayeai Yahwei mioang Sarai tuti Niari kariri ne kaiwo areraio medurai ampo. 2 Ampefe na rahida Allai kiutuafo, Sarai doama minohituti ne kaisung manei. Fi ninai kawariai na kutu Abrahami weinongkutungfo, kariri Allai ne kaiwo arerai medurai weia ampo.✝ 3 Abrahami dohong kaisung mano Sarai minohitutiri foi wonong fino Isaki.

4 Ainanaya Abrahami wesunati Isaki na ne rahida indeatorufo, kariri fianai aino Allai demi weafo.✝ 5 Tuti Abrahami ne fuina piaring (100) mani ne kaisung Isaki saubaunung.

6 Sarai medu deyo, "Allai niari yau imiri tuti ifaraise ampa, ampefe mandoni kontai taraoa mani, miri tuti firaise ria yau." 7 Medu aha deyo, "Mandoni dino medu we Abrahami deyo, ‘Sarai dohong uio arikang ne?’ Wape ninaia mani deti iminohituti kaisung manei we Abrahami, na kutu weinongkutungne."

8 Mayeai Isaki fiabai toyai. Na kutu fiotou dunung inang ne uifo, Abrahami niari muniara fiabai bei we dohong suari nai.

9 Na rahida bei mani Sarai detioai, weo Ismaeli, Hagari wiwing Mesiri foi ne kaisung mano minohitutiri we Abrahami foi deinahi* ria mantauni ne kaisungno Isaki. 10 Ampefe Sarai medu we Abrahami deyo, "Bata womingnei tuti ne kaisungfoi weruai! Ambori wiro sobu nemu fianggengnei ria nehu kaisungno Isaki fanai."✝

11 Abrahami wiro firaise we kaiwofo kaha paria, weo Ismaeli kontai ne kaisung dine. 12 Wape Allai medu we Abrahami deyo, "Wiro aromukuayai we nemu kaisungfoi tuti nemu womingfoi fanai. Mae bohong kariri fianai aino Sarai medura wa, weo nemu ririanei mani na nemu kaisung Isaki terai.✝ 13 Wape nemu womingfoi ne kaisungfoi kontai ambori Inariri we kaiwasa fiabai, weo i kontai nemu kaisung dine fefe."

14 Kamiai kutungna mani, Abrahami kia roti feai tuti mereha feai na kirbati* bei dohongnai watai na Hagari warabeawafo, tuti dohongnai ne kaisungfoi, mayeai demi da wa. Ampefe Hagari da wa, wiro deitawang da weafo kaha na katai wiarora wekamamiei na Bersyeba. 15 Na kutu mereha uka na kirbatifoi kai nanai, Hagari dohong Ismaeli wiatai na ai raifofa rorongfo, 16 da wa minohi waroi werui kuteai, tarahio meteri piaring (100) tea rai. Tuti medu na enerorong deyo, "Wiro nehu mambiriu feai we iwati nehu kaisungnei mirehane kaha." Hagari minohi na nanai tuti saiao deidu.

17 Mayeai Allai tarao kaisungfoi we saifo. Ampefe Allai ne wewaifo manei medu we Hagari na rorafaisi meu deyo, "Hagare, fiani dino wai wei ne? Mutai fanai, weo Allai tarao nemu kaisungfoi rawafui sai nanai, na katai wiatai nai foi ampa. 18 Boabari wau ro we kaisungfoia tuti woworiri we nemboru, weo na kaisung nani ambori Inariri ne ririafoi we kaiwasa fiabai ki."

19 Ainanaya Allai fiobai Hagari urengfoa deti na mai, ampefe deti kamirei mereha bei. Da wa soni merehafo na kirbatifoia, mayeai dohongnaia arikangfoi dunungna.

20 Tuti Allai weriria arikangfoi, donio fiabai toyai. I niayai na katai wiarora wekamamiei na Parani, tuti sewai paria na dana riria fo. 21 Ampefe niayai na nanai tuti inang kia wiwing Mesiri manei wei ma dauti.

22 Na rahida bei Abimeleki tuti Pikholi mano wenunggamiei we ne afai mamunafosa foi, ura we Abrahamia. Abimeleki medu we Abrahami deyo, "Yetioai kawuru ampa, we wau Allai fiata wau pampang na fianai aino nari ne.✝ 23 Ampefe fofora we yau na Allai arongreane, we wiro totofa yau ete nehu arikangnesa ete nehu ririanei sentenang kaha. Kariri yau inari ne bengfo we wau kawuru ampo, wau kontai nari tonanai we yau tuti nuo munohi nai iweinontarai aisei nini." 24 Ainanaya Abrahami medu deyo, "Yo, yau ifafora!"

25 Wape kawurua fefora nanai, Abrahami detua we Abimeleki we kamirei mereha bei, weo Abimeleki ne mangfatafosa etawari wesa fefe. 26 Abimeleki yoa we Abrahami deyo, "Wiro iwaitawang mandoni dino niari fi tonanafo ne, kontaio wiro boisaha finanai we yau kaha, tuti paria sobu rahida bonini wiro tarahuo finana kaharai."

27 Ainanaya Abrahami kia domba tuti sapi manea tuti dohongsa we Abimeleki, mayeai utabuhi kaiwo arera foa. 28 Wape Abrahami diri domba antung wiwing itu, siai weru domba weifosa. 29 Ainanaya Abimeleki medu we Abrahami deyo, "Domba antung ituo birisa siai ninai we fiani e?"

30 Abrahami yoa deyo, "Ka domba antung wiwing itu ninisa na warahune, ambori we fiainawiai we inontarainesa weo kamirei mereha nini mani yauno isarai ne."

31 Nanai wedaya inontarai esahu katai nani we Bersyeba*, weo na katai nani inontaraifo suru umadu kaiwo fafora fo. 32 Na urohong kaiwo arera kawurua na Bersyeba fo, Abimeleki tuti Pikholi mano wenunggamiei we afai mamuna fosa foi, urarabera suru to inontarai Filistini fosa ene kataifoia. 33 Ainanaya Abrahami niayai na Bersyeba tuti sanangno ai tamariska bei na katai nani, tuti na wanai i somi we Yahwei, Allai mano darang we fitawafa. 34 Tuti Abrahami niayai wairoi weinontarai aisei na inontarai Filistini fosa ene nu foi.