1 Rabuang bo inontarai arahi bitoya na nunei nanai, etawing arikang wiwing fosa kontai. 2 Mayeai Allai ne kaisung* fosa ewati inontarai ene kamitung fosa we euremi bohi paria, ampefe eha kamitung fosa we enewiwing kariri mandoni dino enemirorong sauwei ne. 3 Ampefe Yahwei medu deyo, "Ansengno Yohongni we inontarainesa we dohongsa etarangnei wiro niayai pampang na sa kaha, weo ea mani tarai arora disa tuti emarareha. Na ninai tofongna mani, manei wiro minohia sewa fuina piaring piarei (120) kaha." 4 Na rabuang bonani tuti rabuang bo sua ahafoi, inontarai ebaba, etaidai tuti ewemambiriu enayai na nunei. Inontarai nanisa mani, eweriria na kamitung inontarai mano Allai ne kaisung fosa erausafo. Inontarai ebaba, etaidai tuti ewemambiriu nanisa mani ewe ewonomi paria nano fafongpa.✝

5 Na rabuang bo Yahwei detioai we inontarainesa enari ne karirafo fuba paria na nunei tuti enemitituai ne karirafo pampang,✝ 6 donio Yahwei detua paria, we niari inontaraifosa tuti dohongsa enayai na nuneifo. Enerorongfoi pirahai paria we finanai, 7 ampefe Yahwei medu deyo, "Yau ambori imung inontaraio inarisa ninisa eworu weru nunei, kontai romufosa tuti andowa siai fosa. Weo Yetua paria we inarisarafo." 8 Wape Noki mani kia Yahwei enerorongfoi paria, ampefe Noki sobu ne mahikaifo.

9 Kaiwo kariri Noki ne minohi toa wau mani tonina. Na rabuang bo inontarai fosa enari ne karirafoa tonanafo, Noki mani inontaraio mesi dine, tuti na inontarainei kiai na rabuang bonani mani i mesiri andino denteng na Allai ureng fo ne. Na minohi darangfo mani firao Allai. 10 Noki ne kaisung mantoru, itowonomi fino, Semi, Yafeti tuti Hami.✝ 11 Rabuang bonani inontarai enari ne karirafo na Allai arongfo, tuti emamuna wawerasa pampang na doni kontai. 12 Allai deti we nunei mani, ne karirafo aino detioai terane, weo inontarai nesa kiai ne karirafo aino enari terane.

13 Ampefe Allai medu we Noki deyo, "Ikutuai kawurua we inari inontarainesa tuti fidarangfoi kiai etarangfo werea mai nina. Weo nunei sefang na fi kerirao enaririfoi, ampefe inari nuneia wioru tuti fidarang niayai naifoi kiai. 14 Nari wa fiabai bei na ai Gofiri,* tamu kahutu rorongfoi tuti kefi na aspali na rorongfo tuti boriaifo ambori mereha suayai kaha. 15 Wa fiabai nani nariri tonina, ne deuroifo meteri piaring piareia suraya botoru (133). 16 Nari ne nuwowongwai ketai weru deraungwai senti meteri piarua boa (44). Nari ne rahutu na eneungwa tuti nari wa fiabaiwai ne rorong botoru toyai, amani bo yaifoi, bo rabuangtahifoi tuti bo kofafoi. 17 Taramu ma! Yau ambori inari foa fiabai bei ma sufoi nunei we miung fi darangnei kiai na nunei. Ampefe fi darangnei kiai na nunei wioru. 18 Wape na wau, Yau ambori yohong kariri Nehu kaiwo arerane. Wau ambori wuayai to wa fiabaiwai afui, wau tuti nemu wiwingwai, nemu arikang mantoruwa tuti itone wiwingwa sitoru. 19 Tuti na fidarang urengfoi kiai, ka wiwing manei tuti mang manei, ambori wiro eworu kaha, mae etarang ria wau. 20 Na romu urengfoi kiai tuti andowafoi kiai, ne aweng boafoi tuti ne fiafa na arongfoi na nunei ambori era we wau ma, ampefe wiro eworu kaha. 21 Ka maino fiang bongfoi kiai borarati we fiang we mea tuti andowa fosa kiai." 22 Ainanaya Noki niari kariri fianai aino Allai demi weafo.✝