1 Mayeai Yusupi da wa deisaharai we Firauni deyo, "Nehu dai tuti nehu doroifosa, eha ene fiahung kambing, domba, sapi tuti ene ra eminohi tutirai na Kanani fo, era ma enayai na Gosyeni ne." 2 Yusupi kia ne doroi ewering era we Firauni.

3 Firauni dutang bera Yusupi ne doroifosa deyo, "Fianai aino meru ne?" Eroa wei eteyo, "Nemu mangfata ne amea mani mantahung domba, toyari amene wereng fosa." 4 Emadu we Firauni aha eteyo, "Amerama we amenayai na nu nini we inontarai aisei. Weo na Kanani kaharifoi fiabai paria, donio ninoi bereri we nemu mangfatane amene fiahung rabuang nesa etang kaha. Ampefe roa we nemu mangfatane amea we amenayai na kahofa Gosyeni."

5 Ainanaya Firauni medu we Yusupi deyo, "Tamamuaifa tuti nemu doroifosa era kawurua we wau ma. 6 Nu Mesiri nei fiabai we wau. Ampefe boinawiai we nemu dai tuti nemu doroifosa katai denteng na nu nini, bento ea enayai na Gosyeni. Tuti masino boitawanai, manea na ea esawai mani, bohongsa ewaitawang wedua nehu fiahung nesa."

7 Yusupi kia tamang Yakupi kontai awa deinawi we Firauni. Mayeai Yakupi mioang Firauni. 8 Ainanaya Firauni dutang bera Yakupi deyo, "Nemu fuina beiru ampa?" 9 Yakupi yoa wei deyo, "Fuinao iraiwariai iwe inontarai aisei ne, fuina piaring piareia sura (130). Fuina iminohi yarang fuba kaha tuti dadira paria. Wiro netarai toyari nehu wereng fosa ene fuina eraoai fo kaha, amani ene fuina eraiwariai eweinontarai aiseifo."

10 Ainanaya Yakupi mioang Firauni, mayeai dariai to boriai weruia. 11 Mayeaia mani Yusupi deinawi katai we tamangna tuti ne doroifosa we enayai nai, amani dohong kahofa beng paria na nu Mesiri we ene, na kahofa Ramsesi*, karirio Firauni demi fo. 12 Tuti Yusupi dewawu tamangna tuti ne doroifosa tuti tamanai ne munurorong fosa na fiang, kariri ene arikang fosa efau toafo.

13 Na kutu nanai mani kaharifoi fiabai paria, donio inontarai na kahofa Mesiri foi sentenang tuti kahofa Kanani foi efanahang weo kaharifoi fefe. 14 Ampefe Yusupi fiangduhi doi na inontarai Mesiri fosa tuti inontarai Kanani fosa, ewori potang nai foi, tuti Yusupi kia doifo to Firauni ne munu mananu rorongfoa. 15 Na kutu inontarai Mesiri fosa tuti Kanani fosa ene doifo kaia nanai, inontarai Mesiri fosa era wa emadu we Yusupi eteyo, "Bohong fiang we amea! Wiro tua ameara amemarareha fanai. Weo amene doife kai ampa."

16 Yusupi yoa deyo, "Masino doi bereri mani, metohongno mene fiahung wasa, ambori yohong fiang we mea ki." 17 Ainanaya eha ene fiahung kuda, kambing, domba, sapi tuti keledai we eriwang fiang nayai ria Yusupi. Ampefe na fuina bonani Yusupi dohong fiang wesa weriwang ene fiahung fosa.

18 Na fuina bo sua aha foi, era aha ma emadu we Yusupi eteyo, "Ameteisaha parai we dai wau, amene doife kai ampa, amene fiahung fesa ehai ampa. Wiro amene fieai ahang kahai, weo amewori fiang nayai. Manta titou amenetarainei tuti amene kahofa ne. 19 Wiro tua ameara amemarareha fanai, amea tuti amene kahofane. Wori amea tuti amene kahofane we riwang fiang, ampefe amewemangfata we Firauni, tuti amene kahofane mani ne fi fine. Bohong aibong feai kontai, ambori ametarang tuti wiro amemarareha kaha, tuti kahofane wiro sarahia kaha."

20 Mayeai Yusupi wiori inontarai Mesiri fosa ene kahofa foa kai we Firauni. Inontarai Mesiri fosa mansiari-mansiari dewayang ne kahofafo, weo kaharifoi fiabai miungsa paria. Ampefe nu Mesiri foi sentenang mani Firauni neni. 21 Tuti inontarai fosa kiai, ewemangfata na nu Mesiri foi sentenang. 22 Manta imami fosa ene kahofafo aino wiro wiori kaha ne, weo ea mani esobu fiembaitai pampang ria Firauni. Tuti ea mani etarangna fiembaitafo, nanai aino wedaya mani ene kahofafo wiro etawayangna kaha.

23 Yusupi medu we inontarai fosa kiai deyo, "Na rahida nini yau iwori mea kawurua tuti mene kahofane we Firauni, mene aibong finina, ambori mehafasa na kahofafo. 24 Na kutu meteting fianangfoi mani metato baurai we ring, beyari we Firauni, mae ne seafo weai we fiang we mea tuti mene munurorongfo, tuti weai we metanang aha."

25 Mayeai emadu aha eteyo, "Daie, enemuwawu amea tuti fata amea ametarang ampa. Kadono amemai na dai uremuwa mani, amemainenang we amewe mangfata we Firauni." 26 Yusupi niari finanai we kaiwo kiutuai we inontarai fosa etohong kaririai na nu Mesiri foi sentenang amani, fianangfoi etato baurai we ring, tuti etohong beyari we Firauni. Kaiwo kutuai nanai nayai paria sobu ninaifa. Mae manta imami fosa ene kahofafo aino wiro Firauni kia kaha.

27 Na kutu inontarai Israeli fosa enayai na kahofa Gosyeni na nu Mesiri foi nanai, ene rafoi bitoya tuti etawing sefarai bitoya aha. 28 Tuti Yakupi minohi darang na Mesiri fuina suraya itu (17) aha. Ampefe Yakupi darang fuina piaring piarua itu (147). 29 Na kutu Israeli rerai we mirehafo mani, demi inontarai esahu ne kaisungno Yusupi, tuti medu wei deyo, "Masino enemuwawu yau mani, ruai waramune ma wasau awehuwowongne tuti fofora, weo wau ambori boinawi nemu enemuwawuwa we yau. Wiro wurai yau na Mesiri nina kaha. 30 Weo, ye iwatai ria nehu wereng fosa. Ampefe imereha mani, ka yau weru Mesiri tuti wurai yau ria ea na ene fafo fo." Yusupi yoa deyo, "Yo daie, yau ambori yohong kariri nemu kaiwo modurane ki."✝ 31 Mayeai Yakupi medu deyo, "Fofora we yau we wau ambori nari kaririai ki." Ampefe Yusupi fefora we tamangnaia. Mayeai Israeli disangkapa awebuka suang aweu somi we Allai na ne fata nunggamieifoi.