1 Na rahida bei Allai medu we Yakupi deyo, "Moinenang we barabera wau to Beteli aha, we nayai na wanai tuti baungno mesba bei we Yau, Allai mano kawurua Yeinawi nehu tarai we waufoi, na kutu wowu nemu tarai weru nemu tafua Esauwi fo."✝

2 Mayeai Yakupi medu we ne munurorongfosa kiai tuti we inontarai fubao enayai ruhiafosa deyo, "Mehabi aririwang aiseio mehasa wasa, meruairurang menemirorong waia mirarebanai tuti metata ansung mararebanai. 3 Mera ma tamainenang tara to Beteli, na wanai ambori ibaungno mesba bei we Allai, mano kawurua Fiata yau na kutu isobu dadirafo tuti mano kawurua weriria yau na nehu rang rorong ira nayane." 4 Ainanaya etohong ene aririwang aisei watai riasafo tuti fimarandinai na etaramifo*, etohongnaia kai we Yakupi, mayeai Yakupi kiara sirayai rurang ai fiabai rowei kefang to bendari Sikemi. 5 Na kutu Yakupi tuti ne inontarai fosa erafo, Allai ne mambiriufo nayai woru bendario watai kefang na nanafo. Ampefe inontarai na nana fosa ematai paria, donio wiro etawi Yakupi tuti ne inontarai fosa kaha.

6 Ainanaya Yakupi tuti ne inontarai fosa erawa sobu kahofa Kanani na bendari Beteli, fafongpa wonong fino Lusi. 7 Na katai nani Yakupi biaungno mesba bei tuti dohong kataifoi wonong fino El-Beteli, weo Allai kawurua deinawi netarai wei na nanai, na kutu wewu netarai weru ne tafuaifo.

8 Na katai nani kontaio Deborai, wiwingno dewawu Yakupi inangno Ribkai na ketuifo mireha. Ampefe esarai na ai fiabai rowei arowawahifo na bendari Beteli do wanang sai. Nanai wedaya inontarai esahu ai fiabai nani we, "Ai rayai."

9 Na kutu Yakupi da weru Padan-Arami to Beteli fo aha mani, Allai deinawi netarai wei aha tuti mioangni. 10 Allai medu wei deyo, "Na rahida bonini tofongna mani, wiro wonomu fino Yakupi ahang kaha, mae wonomu fino Israeli, wonomu finana." Ampefe Allai dohong wonong fino Israeli.✝

11 Ainanaya Allai medu wei aha deyo, "Yau mani Allai Mano Iwemambiriu Sewa di Yau. Bawing separai bitoya, tuti na mene ririanei ambori we kaiwasa bitoya, tuti na nemu ririanei ambori ewemananu ki.✝ 12 Tuti nu nini mani kawurua Yohongni we Abrahami tuti Isaki, ambori Yohongni we wau tuti we nemu ririanei." 13 Mayeai Allai da weru Yakupi na kataio Medu wei naifoi.

14 Ainanaya Yakupi biaungno tugu bei na katai nani, amani kamiei tugu dine, sari angguri tuti maning saituni sau kamieifoi.✝ 15 Yakupi dohong kataio Allai medu wei nai nani wonong fino Beteli.

16 Mayeai Yakupi tuti ne inontaraifosa era weru Beteli. Era wa kefang we Efrata mani, Raheli amaina pirahai we minohi, wape sobu dadira paria na minohituti arikangfoi fo. 17 Na kutu niruainso pirahai paria nanai, bidanfoi medu wei deyo, "Mutai fanai tawang wau, weo nemu arikang mang dine aha." 18 Wape Raheli rerai we mirehafo mani, dohong ne kaisungfoi wonong fino Ben-Oni, wape Yakupi dohong kaisungfoi wonong fino Benyamini.

19 Ampefe Raheli mirehafo, esarai na rang deraung to Efrata kataio fui nina esahui we Betlehemi. 20 Yakupi biaungno tugu bei na Raheli ne fafo foi, tuti tugu nani doari na wanaifa.

21 Mayeaia mani Israeli da nariai aha, da wa biaung ne yawa tendafoi na Migdal-Ederi* do wanang sai foi. 22 Na kutu Israeli niayai na katai nani fo, Rubeni dena ria tamangno Israeli ne wiwingno Bilhai, Raheli ne womingfoi, ampefe fio niari nanai Israeli taraoaifa.✝

Yakupi ne arikang mang fosa mani ewesuraya mandu. 23 Leai ne kaisung wonang, amani Rubeni, Yakupi ne kaisung reantenang dine, mayea mani Simeoni, Lewi, Yehudai, Isakari tuti Sebuloni. 24 Raheli ne kaisung mandu, amani Yusupi tuti Benyamini. 25 Tuti Bilhai, Raheli ne woming wiwingfoi ne kaisung mandu, amani Dani tuti Naftali. 26 Tuti Silpai, Leai ne woming wiwingfoi ne kaisung mandu, amani Gati tuti Asyeri. Ampefe Yakupi ne kaisung etaubau enumi na Padan-Arami sainana.

27 Ainanaya Yakupi da wa sobu tamangno Isaki na Mamre kefang we Kiryat-Arbai ahui kontai we Hebroni, katai Abrahami tuti Isaki unayai nai we inontarai aisei.✝ 28 Isaki weinongkutung paria, ne fuina piaring piara (180) mani mireha, 29 ampefe Isaki ne arikangfo suru, Esauwi tuti Yakupi usarai ria ne wereng fosa.