1 Na rahida beia mani, mananu Mesiri foi ne mangfata urufi wei foi, amani mano wenunggamiei we deitawang ne fio dunungfo tuti mano wenunggamiei we deitawang ne roti dangfo unari sarawai we mananufoi. 2 Ampefe mananu Firauni* kesou suru paria. 3 Donio demi ne inontarai fosa eha suru to aitamufoi. Aitamufoi wiatai na mano wenunggamiei we deitawang mananufoi ne munufoi. Na katai nani eru aitamuo Yusupi kontai. 4 Inontarai mano wenunggamiei we mano ewaitawang wedua mananufoi, dohong suru afui tuti demi Yusupi we fiata suru. Ampefe eru aitamuo uru wairoi kuteaifa.

5 Na diru beia mani, inontarai mano eru aitamuo surufo, amani mano wenunggamiei we deitawang mananu Mesiri foi ne fio dunungfo, tuti mano wenunggamiei mano enari ne rotifo, uramiei ruhiaifa na diru nani. Wape une amieifo suru ne werorongfo wiro masi kaha.

6 Kameaia mani, Yusupi da we surua, deti we suru mani wiro uremi mararising kaha. 7 Ainanaya Yusupi dutang bera suru mano itonayai ruhiai na aitamufoi, deyo, "We fianie rahida bo nini wiro muremine mararising kahai nina?" 8 Uroa wei ureyo, "Diruafa auramiei, wape wiro manei ne awai feai we deisaha kariri aune amiei ne suru une werorongfo kaha." Mayeai Yusupi deyo, "Manta Allai mesiri andino dohong awai we inontarai, ambori deisaha kariri amieine. Ampefe mureiriri kariri mune aimiei ne suru we yau."

9 Mayeai mano wenunggamiei we deitawang mananufoi ne fio dunungfo, deiriri kariri ne amieifoi we Yusupi deyo, "Na nehu amieinei iwati ai angguri rowei doari na arohune. 10 Na tantuma, ai angguri nani sobaurai webotoru, arahio arirawangfo deo wereraung mani, nebufoi dariai kawurua tuti bongfoi miraia. 11 Tuti na warahune iru Firauni ne nofi dunung nai foi. Angguri bongfoi ikaria tuti ikuari to Firauni ne nofi foi, mayeai yohongni we Firaunia."

12 Yusupi medu wei deyo, "Nemu amieinei werorong tonina, angguri arawang botoru fo mani, deinawi rahida botoru. 13 We rahida botoru aha mani, Firauni ambori sawing wau tuti dohong wau rufi kariri fafong nanai aha. Tuti wau ambori bohong Firauni dunung na nofi foi aha, toyari na kutu wenunggamiei we boitawang mananunei ne mereha dunungfo. 14 Wape aromuo yau, masino wobu maifo. Boinawi nemu enemuwawu yau ne, na boiriri kaririai we Firauni toyari fianai aino isodairai nina, tuti fata yau ambori ira to boriei weru munu aitamu nini. 15 Weo ehamanana yau weru nu inontarai Iberani foi, tuti na ninaifa wiro inari sara fiea kaha, neo wedaya yau mani isuayai to aitamu rorong nini"

16 Na kutu mano wenunggamiei we deitawang wedua mananufoi ne roti dangfo, taraoai we ne maniwowirifoi ne amieifoi ne werorongfo denteng paria, ampefe medu we Yusupi deyo, "Yau kontai yemiei, amani iwatio ika roti sosiru botoru, watai sau nuhukamieinei. 17 Na sosiru boyai pari foi mani, roti tatowa bitoya we fiang we mananu Firauni. Wape romufosa esifo ma etang roti na sosiru bo yaifoi, na nuhu kamieinei."

18 Yusupi yoa wei deyo, "Nemu amieinei ne werorongfo mani tonina, sosiru botoru fo mani, deinawi rahida botoru. 19 Na rahida botoru ninai, Firauni ambori demi ne inontarai fosa ferangkutu numukamieiwai, tuti eruai nemu taraiwai ayai sawai, tuti romufosa esifo ma etang nemu taraiwai."

20 Tuti rahida botorua mani, tete rahida Firauni saubaunungnai foi, ampefe Firauni dohongsua ne rahida saubaunung nai foi, ria ne inontarai mano erufi wei fosa. Mayeai demi ne inontarai erufi wei fosa etawing inontarai mano wenunggamiei we deitawang ne fio dunungfo, tuti mano wenunggamiei we deitawang ne roti dangfo weru aitamu rorongfo. Tuti eha surua uminohi rahang ne inontarai mano erufi wei fosa. 21 Inontarai mano wenunggamiei we deitawang wedua ne fio dunungfo, mananufoi dohongni we yu ne fio yu fafongfo aha. 22 Mae mano wenunggamiei we deitawang wedua mananufoi ne roti dangfo emungni, kariri kaiwo Yusupi medurai wei kariri amieifoi.

23 Wape mano wenunggamiei we deitawang wedua mananufoi ne fio dunungfo, firandengno Yusupia, tuti wiro arooi ahang kahaifa.