1 Mayeai Yahwei medu we Abrami na fiainawiai bei we detioi, deyo, "Abrame mutai fanai. Yau ambori iwe foti we wau, tuti ambori Yohong fiembaitai fuba we wau ki."

2 Wape Abrami yoa we Yahwei deyo, "O Yahweh Alla, we fianie Bohong fiembaitai fuba we yau? Yau ambori imereha rai, tuti nehu pari arikang. Nana mani nehu mangfata Elieseri inontarai Damsyiki foi andino ambori sobu nehu ra iminohi tutirafo ne."

3 Abrami medu aha deyo, "Wau wiro bohong riria we yau kaha, donio nehu mangfatanei andino ambori sobu nehu ra iminohi tutira ne ki."

4 Wape Yahwei medu wei aha deyo, "Bereri, wiro nemu mangfatawai kaha, mae nemu arikang bawing teriwai andino ambori bohong nemu ra wai wei ki." 5 Ainanaya Yahwei Demi Abrami da to boriei na ne yawa tendafoi tuti Medu wei deyo, "Boti to rorafaisi, masino wemambiriu we boto awaha fuba niayai na rorafaisi mani, botoria." Tuti Yahwei medu aha deyo, "Nemu ririanei ambori bitoya tonanai ki."✝

6 Ainanaya Abrami yoaso Yahwei, ampefe na tonanafo Yahwei detori we inontarai mesi dine.✝

7 Tuti Yahwei medu wei aha deyo, "Yau mani Yahwei di Yau, Yauno ika wau to boriei weru nu Ur-Kasdimi we Yohong nu bonini we nemuni." 8 Ainanaya Abrami medu deyo, "O Yahweh Alla, todoni ambori iwaitawanai we nu bonini we nehuni ne?"

9 Ampefe Yahwei medu wei aha deyo, "Ka sapi wiwingno ne fuina botoru manei, kambing wiwingno ne fuina botoru manei, domba mangno ne fuina botoru manei, romu afurang manei tuti romu muntung antung manei, andowa wasa kasa we Yau ma." 10 Ainanaya Abrami kia andowa nanisa we Yahweia. Sapi, kambing tuti domba biau sitoru we berurutiai, sanaia watai riruhiai, wape romufo suru mani wiro biau suru kaha. 11 Romu rawei fosa esifo ma eminohi we etang andowa tariraifo, manamo Abrami datasa.

12 Na kutu wofoi rerai we sawai nanai, Abrami denawa seo. Na tantuma mamantiti kapuruyai dohong matai foi soruia.✝ 13 Yahwei medu we Abrami deyo, "Boitawanaifa weo nemu ririanei ambori ewe inontarai aisei na inontarai siai ene nu bei ki, nuo wiro eneni kaha. Ea ambori ewewoming tuti inontarai fosa na kataifoi enari kangganisa paria fuina piaring we bea (400).✝ 14 Wape kaiwasa mano enari nemu ririafoi ewewomingfo mani, ambori Yohong aiboifo wesa ki. Tuti mayeaia mani, nemu ririafoi ambori era to boriei weru nu nani tuti eha fianggeng bitoya paria.✝ 15 Wape wau na rahida bo munohia weinongkutungfo, ro to raimeri ria nemu werengfosa na mai. Tuti ambori esarai wau ki. 16 Wape nemu riria bo boafoi ambori etaraberasa to ninai aha ma ki. Weo na kutu ninai inontarai Amori nesa wiro enari neo karirafo fuba kaharai. Ampefe wiro rahida neungfo mai we Yohong aiboi wesa kaharai, we era to boriai weru katai nini kaharai."

17 Na kutu wofoi sawaia tuti mamantitia, na tantuma wawu weriraung bei tuti antironi denggararu bei sea rahang andowa tariraifo. 18 Na rahida bonani dino Yahwei Dohong kaiwo arerai we Abrami, medu wei deyo, "We nemu ririanei dino Yohong katai nini wesa ne, amani na waya Mesiri foi paria sobu waya fiabaio Efrati.✝ 19 Kahofa ninai mani inontaraio Keni fosa, Kenasi fosa, Kadmoni fosa, 20 Heti fosa, Ferisi fosa, Refaimi fosa, 21 Amori fosa, Kanani fosa, Girgasi fosa tuti Yebusi fosa ene katai fine."