1 Fi aiririai kariri Esauwi mano esahui we Edomi foi mani sonina. 2 Esauwi kia wiwing Kanani mantoru we bineng, amani Adai, Eloni inontarai Heti foi ne kamitung dine, tuti Oholibamai, Anai ne kamitungfoi, Sibeoni inontarai Hewi foi tufuwing dine.✝ 3 Tuti Basmati, Ismaeli ne kamitungfoi, imani Nebayoti rorowing dine.✝ 4 Adai dawingno Elipasi we Esauwi, tuti Basmati dawingno Rehueli, 5 mae Oholibamai dawingno Yeushi, Yaelami tuti Korahi. Esauwi ne arikang sainana, etaubau enumi na kahofa Kanani.

6 Mayeai Esauwi kia ne wiwing fosa, ne kaisung tuti kamitung fosa, tuti ne inontarai mano enayai ruhia fosa kiai. Kia ne fiahungfosa tuti ne ra fubao sobuai kawurua na kahofa Kanani fo. Ainanaya da weru ne tahatui Yakupi to nu siai beia. 7 Weo une rafoi bitoya kareraifa, donio wiro unayai ruhia kaha, tuti nu unayai nai nani wiro katai kehabi weninoi bei demoyarai we une fiahung fosa etang kaha. 8 Ampefe Esauwi mano ahui we Edomi foi, da wa niayai na katai weuaifo na Seiri.

9 Fi aiririai kariri inontarai Edomi na katai weuai Seiri na ene werengno Esauwi mani sonina.

10 Esauwi ne wiwingno Adai dawingno kaisung manei wonong fino Elipasi tuti Esauwi ne wiwingno Basmati dawingno Rehueli. 11 Elipasi ne arikang saino, Temani, Omari, Sefoi, Gaetami tuti Kenasi. 12 Elipasi ne wiwing siai manei wonong fino Timnai. Timnai dawingno Amaleki we Elipasi. Esauwi tuti Adai une tafui sainana. 13 Rehueli ne arikang saino, Nahati, Serahi, Syamai tuti Misai. Esauwi tuti Basmati une tafui sainana. 14 Esauwi ne wiwingno Oholibamai ne kaisung saino, Yeushi, Yaelami tuti Korahi. Oholibamai nini mani Anai ne kamitung dine, i mani Sibeoni tufuwing dine.

15 Riria Esauwi mano ewemambaiseng sainina. Riria Elipasi, Esauwi ne kaisung fubafoi, andino we wereng we inontarai Temani fosa, inontarai Omari fosa, inontarai Sefoi fosa, inontarai Kenasi fosa, 16 inontarai Korahi fosa, inontarai Gaetami fosa tuti Amaleki fosa. Eaino ewemambaiseng na kahofa Edomi ne. Ea kiai eweriria na Esauwi tuti Adai une kaisung Elipasi. 17 Esauwi tuti Basmati une kaisungno Rehueli andino we wereng we inontarai Nahati fosa, Serahi fosa, Syamai fosa tuti Misai fosa. Riria ninisa kontai enayai na kahofa Edomi. 18 Anai ne kamitungno Oholibamai, Esauwi ne wiwingnei, une kaisung nesaino ewe wereng we inontarai Yeushi fosa, inontarai Yaelami fosa tuti inontarai Korahi fosa. 19 Mano ewemambaiseng na Esauwi mano ahui kontai we Edomi foi sainana.

20 Seiri inontarai Hori foi ne arikang saino, Lotani, Syobali, Sibeoni, Anai, 21 Disyoni, Eseri tuti Disyani. Inontarai Hori ewenunggamiei na Seiri ne ririafoi, ninsaino reantenang pari enayai na kahofa Edomi ne*. 22 Lotani ne kaisung mandu amani, Hori tuti Hemani. Lotani rorowing dino Timnai. 23 Syobali ne kaisung ewering amani, Alwani, Manahati, Ebali, Syefoi tuti Onami. 24 Sibeoni ne kaisung mandu amani, Anai tuti Ayai. Anai nini dino sobu mereha ureng meninggapoi fo na katai wiarora wekamamiei foi, na kutu deitawang wedua tamang Sibeoni ne keledai fosa. 25 Anai ne arikang mandu amani, Disyoni tuti rorowingno Oholibamai. 26 Disyoni ne arikang ewe mana amani, Hemdani, Esybani, Yitrani tuti Kerani. 27 Eseri ne arikang itowemantoru amani, Bilhani, Saawani tuti Akani. 28 Disyani ne arikang mandu amani, Usi tuti Arani. 29 Ampefe riria na Seiri inontarai Hori nini dino we wereng we inontarai Lotani fosa, Syobali fosa, Sibeoni fosa, Anai fosa, 30 Disyoni fosa, Eseri fosa tuti Disyani fosa. Inontarai Hori ewenungkamiei sainana. Ansaino enayai na kahofa Seiri ne.

31 Na rabuang bo inontarai Israeli fosa ene mananu kaharai, mananu mano eru parenta na nu Edomi foi sainina. 32 Na Edomi mano yu parenta mani Beori antungno Belai na bendari Dinhabai. 33 Belai mireha mani, Serahi antungno Yobapi yiwangni wemananu aha. I mani na bendari Bosrai. 34 Yobapi mireha mani, Husyami na nu Temani foi yiwangni wemananu aha. 35 Husyami mirehara mani, Bedadi antungno Hadadi yiwangni wemananu aha. I mani na bendari Awiti. Hadadi nini dino memunara sahatawang inontarai Midiani fosa na Moapi ne. 36 Hadadi mireha mani, Samlai na bendari Masrekai foi yiwangni wemananu aha. 37 Samlai mireha mani, Sauli na bendari Rehoboti, na waya deraungfo, yiwangni wemananu aha. 38 Sauli mirehara mani, Akhbori antungno Baal-Hanani, yiwangni wemananu aha. 39 Baal-Hanani mireha mani, Hadari na bendari Pahui yiwangni wemananu aha, tuti ne wiwingfoi wonong fino Mehetabeeli. Mehetabeeli nini tamang dino Matreti tuti tufung dino Mesahapi.

40 Mambaiseng mano eweriria na Esauwi, ewonomifo tuti ene kahofafo ansainina. Timnai, Alwai, Yeteti, 41 Oholibamai, Elai, Pinoni, 42 Kenasi, Temani, Mibsari, 43 Magdieli tuti Irami. Riria ninisa ene katai taterai, tuti kataifo wonongfo mani kariri ewonomifo. Inontarai Edomi ene wereng dino Esauwi.