1 Na rahida bei Yahwei medu we Abrami deyo, "Ro weru nemu katainei, weru nemu teranesa tuti weru tamamu ne mununei, ro to kataio ambori Yeinawi we wau foi.✝ 2 Yau ambori inari nemu ririanei bitoya tuti we kaiwasa fiabai. Yau ambori imoang wau tuti inari wau wewonomu tuti wau we moang. 3 Yau ambori imoang inontaraio emoang wau fosa, tuti Yeikanggani inontarai mano eteikanggani wau fosa. Tuti na wau, ambori imoang kaiwasa na doni kontai na nunei."✝

4 Mayeai Abrami da weru Harani kariri fianai aino Yahwei medurai weifo, tuti Loti da riati kontai. Abrami ne fuina piatorua suraya ring (75) mani da weru Harani. 5 Abrami da to nu Kananifoi mani, kia ne wiwingno Saraii, anomangno Loti, tuti ne ra minohi tutirafo kai tuti ne womingno kiasa na Haranifo.

6 Tuti erawa esobu Kananifo mani, Abrami tuti mano era riati fosa, erawari katai nani paria sobu ai Tarbantini na More, amani kefang we Sikemi. Rabuang bonani mani inontarai Kanani fosa enayai na katai nani. 7 Mayeai Yahwei deinawi netarai we Abrami tuti medu wei deyo, "Kataio ambori Yohongni we nemu ririanei dinini." Ainanaya Abrami biaungno mesba bei na nanai we Yahwei mano deinawi netarai wei kawurua.✝

8 Mayeai na nanai da pari to weuaifo na Beteli do wanang murangfoi. Biaung ne yawa tendafoi rahangnai na bendari Beteli tuti bendari Ai. Beteli na do wanang fuifoi tuti Ai na do wanang murangfoi. Ainanaya biaung mesba bei we Yahwei na nanai tuti somi we Yahwei. 9 Mayeai Abrami tuti mano era riati fosa, era nariai aha, erafo waroi aha to kahofa Negepi.

10 Rabuang bo kahari fiabaifoi miung katai nanifo, Abrami da to nu Mesirifoia niayai na nanai weinontarai aisei, paria sobu kaharifoi kiai. 11 Na kutu da wa sobu nu Mesiri foi nanai, medu we Saraii deyo, "Iwaitawanai we wau mani wiwingno uremu mahikai paria. 12 Masino inontarai Mesiri fosa ewati wau mani ambori eteyo, ‘Inontaraifoi ne wiwing diwani.’ Ampefe nana mani ambori emung yau, wape etawing wau barang. 13 Ampefe modu boyo wau mani nehu tahatui di wau, ambori enari sua yau tuti wiro emung yau kaha, weo wau fefe."✝

14 Tuti nanai antu kaririai, Abrami suai to nu Mesirifoi afui nanai, inontarai Mesiri fosa ewati Saraii we urengfo mahikai paria. 15 Tuti na kutu mananu Mesirifoi ne inontarai erufi wei fosa ewati Saraii tonanafo efiai na mananu Firauni* arongfo, ampefe mananufoi demi inontarai eha Saraii to munu mananufoia. 16 Mananu Firauni dohong sua Abrami na mai paria, weo enerorongfoi dohong we Saraii fefe, tuti Abrami sobu fiahung, kambing, domba, sapi, keledai mang tuti keledai wiwing, unta, tuti sobu woming mang tuti wiwing manea. Unta

17 Wape Yahwei dohong fimaninang kerira bitoya paria we Firauni, tuti inontarai mano enayai na munu mananufoi, weo kiao Abrami binengno Saraii fefe. 18 Ainanaya Firauni sahu Abrami ma medu wei deyo, "Todonie nari yau toninai nina? We fianie wiro boisaharai we i mani nemu wiwing dine kahai nina? 19 We fianie modu boyo nemu tahatui dine, wedaya ikari we nehu wiwing nina? Nemu wiwingfi dinini, kari mau tuti mura!" 20 Ainanaya Firauni demi inontarai maneiru teai etadung Abrami, ne wiwingfoi tuti ne fianggengfoi kiai, we era to boriai weru Mesiri.