1 Ainanaya Israeli fintang ne rafoi kiai, tuti da to Mesiri. Da wa sobu Bersyeba mani, dohong korbani we Allai, mano tamang Isaki somi weifoi.

2 Na dirua mani Allai medu we Israeli na fiainawiai bei deyo, "Yakupe, Yakupi wo!" Yakupi yoa Wei deyo, "Ya, Seng." 3 Mayeai Allai medu wei aha deyo, "Yau Allai, Allai mano tamamu Isaki somi Weifoi di Yau, wiro mutai we ro to Mesiri fo fanai, weo Yau ambori inari nemu riria wai fiabai na wanai ki. 4 Yau ambori iweriria wau, na kutu ro to Mesiri fo, tuti Yau kontai ambori Ika nemu riria wai etauberahai to nu nini aha ma ki. Tuti Yusupi ambori minohi kefang wau na kutu boyo murehafo."

5 Ainanaya Yakupi da weru Bersyebai to Mesiria. Ne kaisung fosa eruai ene dai, ene wiwing fosa, tuti ene arikang fosa to kereta mananu Firauni denatui ma fo ayai. 6 Ea kontai eha ene fiahung fosa tuti ene ra esobui na kahofa Kanani fo. Mayeai era to Mesiri, mano era mani Yakupi tuti ne ririafoi kiai.✝ 7 Ne kaisungfosa tuti tufumang tuti tufuwing, ne ririafoi kiai kiari to Mesiri.

8 Yakupi ne kaisung mano era riati to Mesiri mani ewonomi fi nina. Yakupi ne kaisung fubafoi mani Rubeni. 9 Rubeni ne kaisungfosa mani, Henoki, Palui, Hesroni tuti Karmi. 10 Simeoni ne kaisungfosa mani, Yemueli, Yamini, Ohadi, Yakini, Sohari tuti Sauli. Sauli inana mani wiwing Kanani dine. 11 Lewi ne kaisungfosa mani, Gersoni, Kehati tuti Merari. 12 Yehudai ne kaisungfosa mani, Eri, Onani, Syelai, Peresi tuti Serahi. Wape Eri tuti Onani umereha na Kanani, tuti Peresi ne kaisung suruino Hesroni tuti Hamuli. 13 Isakari ne kaisungfosa mani, Tolai, Puai, Ayupi tuti Simroni. 14 Sebuloni ne kaisungfosa mani, Sereti, Eloni tuti Yahleeli. 15 Riria ninisa mani Leai minohitutisa we Yakupi na Padan-Arami tuti ne kamitungno Dinai. Ampefe ea kiai, mang tuti wiwing mani ewe piareia suraya mantoru (33).

16 Gati ne kaisungfosa mani, Sifyoni, Hagi, Syuni, Esboni, Eri, Aroti tuti Areli. 17 Asyeri ne kaisungfosa mani, Yimnai, Yiswai, Yiswi tuti Beriai tuti eroromibingno Serahi. Tuti Beriai ne kaisung suruino Heberi tuti Malkieli. 18 Riria nanisa mani, na Yakupi binengno Silpai, wiwing womingno Labani dohongni we ne kamitungno Leai. Ea kiai mani ewe suraya wonang (16). 19 Yakupi ne wiwingno Raheli ne kaisung mandu amani, Yusupi tuti Benyamini. 20 Na Mesiri Yusupi ne wiwingno Asnati, Potiferai imami na Oni ne kamitung dine, minohituti kaisung mandu amani, Manasyei tuti Efraimi.✝ 21 Benyamini ne kaisungfosa mani, Belai, Bekheri, Asybeli, Gerai, Naamani, Ehi, Roshi, Mupimi, Hupimi tuti Areti. 22 Riria ninisa mani Raheli minohitutisa we Yakupi. Ea kiai mani ewe suraya mana (14).

23 Dani ne kaisung mansiari mani, Husimi. 24 Naftali ne kaisungfosa mani, Yahseeli, Guni, Yeseri tuti Syilemi. 25 Riria nanisa mani na Yakupi binengno Bilhai, woming wiwingno Labani dohongni we ne kamitung Raheli. Ea kiai mani ewe itu.

26 Inontarai mano eraria Yakupi to Mesiri fosa mani, ne arikang tera fosa, mae wiro ato urawing fosa kontai kaha. Ea kiai, ewe piatorua wonang (66). 27 Yusupi ne kaisung mandu utaubau unumi na Mesiri. Ampefe Yakupi ne munurorong enayai na Mesiri mani ewe piatorua sura (70)*.✝

28 Era wa kefang kaharai mae, Yakupi demi Yehudai da fafongna deisaharai we Yusupi, ambori Yusupi da to Gosyeni ma sobu tamangnaifa. Tuti era wa sobu Gosyeni. 29 Ainanaya Yusupi demi ne mangfata fosa emainenang ne keretafoi, ambori da to Gosyeni, we sobu tamangno Israeli. Na kutu sobu tamangnafo, fiaung tamanai tuti saifo wairoi paria, na tamang warabeawafo.

30 Mayeai Israeli medu we Yusupi deyo, "Ninaia mani imereha te towea kaha, weo iwati uremu ne ampa tuti yeitawangnai weo barang nendai."

31 Ainanaya Yusupi medu we ne doroifosa tuti ne dai ne munurorong fosa deyo, "Yau ambori ira wa yeikaririai we Firauni yeyo, ‘Nehu doroifosa tuti nehu dai ne munurorong fosa kiai, mano enayai na Kanani fo, era kawuru we yau ma ne.’ 32 Yau kontai ambori yeisaharai weo mea mani mantahung kambing tuti domba, weo mea mani metahungno kambing, domba, sapi tuti ene fi kiaio ehafo. 33 Masino Firauni sahu meara dutang mea deyo, ‘Fianai aino merune?’ 34 Meroa wei meteyo, ‘Amea mani mantahung fiahung di amea, na ameraifofafo paria sobu ninai, toyari amene wereng fosa.’ Ambori Firauni dohong kahofa Gosyeni we menayai nai." Yusupi medu tonanai weo inontarai Mesiri nesa enemirireu mano etahung fiahung fosa.