1 Abrahami rirau aha, ne wiwingfoi wonong fino Keturai. 2 Na ne wiwing nani, sobu arikang manea aha, amani ewonomi fino, Simrani, Yoksani, Medani, Midiani, Isybaki, Suahi. 3 Yoksani dawingno, Syebai tuti Dedani. Dedani nini ne ririafoi dino inontarai Asyuri fosa, inontarai Letusi fosa tuti inontarai Leumi fosa. 4 Midiani ne arikang saino, Efai, Eferi, Henoki, Abidai tuti Eldai. Ea mani ewe riria na Abrahami ne wiwingno Keturai. 5 Abrahami ne fio minohi tutirafo dohongnai we Isaki. 6 Wape na Abrahami minohi darangfo kontai dohong fianggeng bitoya we ne arikangno etaubau enumi na ne wiwing siaifosa. Tuti demi ne arikang siaifosa era to katai na do wanang murangfoia enayai nayai, ambori ehatai weru Isaki.

7 Abrahami ne fuina piaring piatorua suraya ring (175). 8 Nana mani weinongkutungna tuti nung baibuara, arahio mireha tuti Abrahami fianduhi ria ne werengno emarareha fafong fosa. 9 Ampefe ne kaisung mandufo suru Isaki tuti Ismaeli, usarai na fafo winsaburung Makpelai, romio Sohari inontarai Heti foi antungno Efroni nenifoi, wiatai na do wanang murang Mamre. 10 Wingsaburung nini Abrahami wioriri ria inontarai Heti fosa. Sarai kontai raminde Abrahami sirai na nanai kontai. Ampefe Abrahami tuti Sarai une fafo na katai nani.✝ 11 Abrahami mireha kawurua, Allai mioang ne kaisungno Isaki tuti Isaki niayai kefang we kamirei mereha Lahai-Roi.

12 Abrahami ne kaisung na Hagari, Sarai ne woming wiwingno Mesiri foi, amani Ismaeli ne ririfoi sonina. 13 Ismaeli ne arikang ewesuraya mandufo ewonomifo, ahuai kariri etaubau enumifo mani tonina. Nebayoti kaisung fuba dine, mayeai Kedari, Adbeeli, Mipsami, 14 Misymai, Dumai, Masai, 15 Hadadi, Temai, Yeturi, Nafisi tuti Kedmai.

16 Ismaeli ne arikang sainana, tuti ewonomi finana. Ea mani ewenungkamiei we ene riria suraya mandufo. Ene munuefo tuti ene yawa tendafo kariri ewonomifo.

17 Ismaeli ne fuina piaring piareia suraya itu (137) mani mireha, tuti fianduhi ria ne werengno emarareha fafong fosa. 18 Ismaeli ne ririafoi enayai na katai Hawilai paria sobu Syuri, katai nini wiatai na Mesiri do wanang murangfoi to Asyuria. Tuti ne ririafoi enayai siai weru Abrahami ne riria siaifosa.

19 Abrahami ne kaisung Isaki ne fi airiri kariri darangfo, tuti na ne ririafoi mani sonina. Abrahami dawingno Isaki. 20 Na kutu Isaki ne fuina piaru (40) mani dau Ribkai. Ribkai mani Betueli inontarai Arami na Padan-Arami ne kamitung dine, tuti Labani inontarai Arami foi rorowing dine.

21 Isaki wenadi we Yahwei, weo ne wiwing Ribkai kirawahi fefe. Ampefe Yahwei yoa we ne nadifoi, donio Ribkai doama, ne arikang tantamurui suruine 22 Wape doama nanai, ne arikang mano unayai na Ribkai enemanabufoi urota wawera suru. Ampefe medu deyo, "We fianie isobu fi toninai?" Ainanaya dutang Yahwei kaririai we fi sobuai nanai.

23 Yahwei medu wei deyo,

"Kaiwasa rabuang boru unayai na enemumanabuwai nanai,

tuti kaiwasa rabuang borune ambori uweaiteta wawera suru,

manggatui ambori wemambiriu sewa weru mampuai,

tuti mampuai ambori yufi we fiata manggatui."✝

24 Tete ne rahidafo mai we minohi nanafo, tarai minohituti arikang tantamurui suruine. 25 Mano reantenangfoi kiawariai mandiei mani, netarai rerawafoi derura. Tuti netaraifoi wenuawuru sentenang, toyari ansungno wenuawuru, ampefe esahui na Esauwi. 26 Mayeai mano fuifoi dariai aha. Warangfo yu Esauwi awedidifuifo, ampefe esahui na Yakupi. Na kutu utaubau unumi mani, Isaki ne fuina piatoru (60).

27 Arikangfo suru ufiabai toyai. Esauwi sewai na da sangfo tuti firaise we niayai na airorongfo. Wape Yakupi mani inontaraio wiro medu funoma kaha tuti dohong funoma kaha, tuti firaise we niayai na yawa tendafoi terai. 28 Isaki enewawu Esauwi, weo firaise we dang andowa tarai fefe. Wape Ribkai enewawu Yakupi.

29 Rahida bei mani Yakupi yang fiang fea. Mayeai Esauwi daraberahi na da sangfo ma. Esauwi nuruainso wewisi tuti netarai mirua paria. 30 Esauwi medu we Yakupi deyo, "Bohong karabu barikao rangsa wasa manea ma yangsa wo, weo iwawisi paria." Nanai wedaya esahu Esauwi we Edomi nina.*

31 Wape Yakupi yoa wei deyo, "Tonana mani, bohongno nemu haki wearikang fuba wa we yau akawuru wo." 32 Ampefe Esauwi medu deyo, "Boti, katu mani imereha rai. Haki wekaisung fuba nanai wiro we fieai we yau kaha." 33 Yakupi medu wei deyo, "Fofora we yau akawuruwo." Ampefe Esauwi fefora na Yakupi urengreafo we dohong ne haki wearikang fubafo weia.✝

34 Ainanaya Yakupi dohong roti tuti karabu barika yangsafo manea we Esauwia. Dampi tuti dunung awao kai nanai, mayeai dobariri da wa. Tonanaifa Esauwi wiro deto ne haki wearikang fubafo ahang kahai.