1 Mayeai Yakupi da weru Beteli, da fo waroi paria to do wanang murangfoi. 2 Na kutu deti wari kataifoi sentenang, deti kamirei mereha bei na katai kehabi weninoi foi, tuti deti kambing tuti domba rabuang botoru ewatai kefang kamirei merehafoi. Weo na kamirei mereha nani dino inontarai etohong ene kambing tuti domba etunung mereha nai ne. Kamirei merehafoi etabungni na kamiei fuba bei. 3 Masino mantahungfosa efanduhi kambing tuti domba rabuangfosa kiai to kamirei mereha foia mani, mantahungfosa etadoi kamieifoi weru kamirei merehafoi borongfo. Mayeai etohong kambing tuti domba etunung. Masino etunungna kai mani, mantahungfosa etadoi nari kamieifoi aha wedua kamirei merehafoi borongfo.

4 Yakupi dutang mantahung fiahung fosa deyo, "Doroi meaine, mera na doni ma?" Eroa wei eteyo, "Amera na Harani ma." 5 Yakupi dutang berasa nariai aha deyo, "Metaroangso Nahori tufumangno Labanie?" Eroa wei eteyo, "Yo, ametaroangsoi." 6 Ainanaya dutangnai aha deyo, "Minohi na mai e?" Eroa wei eteyo, "Minohi na mai. Botia, ne kamitungno Raheli diwani, da tuti ne kambing tuti domba fosa ma wana." 7 Mayeai Yakupi deyo, "Mewati, rahida rabuang nendai, wiro ramindena we mefanduhi fiahungnesa to ene munu fiahungfoi kaharai. Ampefe metohong mene kambing tuti domba fosa etunungwo, mayeai mehasara etampi aha." 8 Wape eroa wei eteyo, "Wiro amenari tonana kaha. Ametamang paria fiahung rabuangfosa era kiai ma kawuru wo, arahio ametadoi kamieifoi weru kamirei merehafoi borongfo, tuti ametohong amene kambing tuti domba nesa etunung finanai." 9 Na kutu Yakupi medu ria ea rai mae, Raheli da tuti tamang ne kambing tuti domba fosa ma, weo andino dehungsa ne. 10 Na kutu Yakupi deti Raheli, nera Labani antuwingfoi tuti ne kambing tuti domba fosa nanai, da kefangna, mayeai dedoi kamieifoi weru kamirei merehafoi borongfo tuti dohong kambing tuti domba fosa etunung. 11 Mayeai Yakupi niuna Raheli tuti sai na rawafui fiabai, weo firaise fefe. 12 Ainanaya Yakupi deikaririai we Raheli deyo, "Yau mani Labani rorowingno Ribkai ne kaisung di yau." Ampefe Raheli mitoa deisaha kaiwo taraoafo we tamangno Labani. 13 Na kutu Labani tarao kaiwo kariri rorowingno Ribkai antungno Yakupi nana fo, mito ahera weia. Mayeai fiaungni tuti niunahi, ainanaya kiari to ne munufoia. Ampefe Yakupi deisaha kariri fi fuba sodairi foi kiai we Labani. 14 Labani medu wei deyo, "Tarai, wau tuti yau mani rika fifau." Ampefe Yakupi minohi ria Labani embai bei.

15 Mayeai Labani medu we Yakupi deyo, "Wau mani anohumang di wau, mai kahai we rufi we yau arora. Boisaharai we yau fiembaitai fianai aino masi we yohongnai we wau ne?" 16 Labani ne kamitung mandu, mano fuba foi wonong fino Leai tuti mano fui foi wonong fino Raheli. 17 Leai urengfo mahikai, wape Raheli urengfo mahikai sewa tuti netarai denteng paria. 18 Yakupi ne mayanafo nayai na Raheli, ampefe medu we Labani deyo, "Yeyo irufi we wau defuina itu we isobu Raheli, nemu kamitung fui wai." 19 Ainanaya Labani yoa wei deyo, "Mahikai sewa mani yohongni we wau, masino yohongni we inontarai siai. Ampefe munohi ria yau na nina." 20 Ampefe Yakupi yufi defuina itu we sobu Raheli, wape defuina itu nanai toyari rahida beiru teai, weo ne mayanafo nayai na Raheli fefe.

21 Defuina itu foa kaia nanai, Yakupi medu we Labani deyo, "Rahida turapawafo mai ampa, ampefe bohongno Raheli we yau, ambori irauti." 22 Ainanaya Labani wenoti inontarai na nana fosa ma tuti niari muniara mandirau foi. 23 Wape dirua mani, Labani kia Leai we Yakupia, donio Yakupi dena riatia. 24 Tuti Labani dohongno Silpai kontai ambori we woming we ne arikang Leai.

25 Wape kamiaia mani, na tantuma Yakupi detioai weo Leai dine. Ainanaya Yakupi medu we Labani deyo, "Wefianie nari yau toninai? Irufi we wau we isobu Raheli, todonie tofa yau?" 26 Labani yoa wei deyo, "Na amene koangnei mani, wiro inontarai manei dohong ne kamitung fui foi rirau fafong weru mano fuba foi kaha. 27 Bomang rahida ituo ohongsua mune muniara mandiraune kai kawuruwo, ambori yohong Raheli we wau we fiembaitai, masino rufi we yau defuina itu aha."

28 Ainanaya Yakupi niari kariri finanai, amani dohongsua ne muniara mandirau ria Leai foa kai, mayeai Labani dohong ne kamitungno Raheli we Yakupi dauti. 29 Labani kontai dohong ne woming wiwingno Bilhai, ambori Bilhai we woming we ne kamitung Raheli. 30 Yakupi dena ria Raheli, tuti ne mayanafo tau we Raheli sewa Leai. Ampefe yufi we Labani defuina itu aha.

31 Yahwei detioai we Yakupi ne mayanafo tau we Raheli sewa Leai, ampefe Dohong Leai nearikang, mae Niari Raheli kirawahi. 32 Leai doama, minohituti ne kaisung manei, dohongni wonong fino Rubeni. Weo enetituai deyo, "Antu, Yahwei kawurua Detio nehu dadirane, ampefe ninaia mani nehu mangnei ne mayanafo ambori tau we yau."

33 Leai nearikang nariai aha, minohituti ne kaisung manei, medu deyo, "Tarai we Yahwei taraoai. Weo wiro nehu mangnei ne mayana tau we yau kaha, ampefe Dohong arikang nini kontai we yau aha." Ainanaya dohong ne kaisungfoi wonong fino Simeoni. 34 Leai doa ahama, ainanaya minohituti ne kaisung manei. Ampefe medu deyo, "Kutu nina mani, nehu mangnei enerorongfoi sawaia mitu we yau, weo iminohituti kaisung mantoru wei fefe." Ainanaya dohong kaisungfoi wonong fino Lewi. 35 Mayeai mani Leai doama minohituti ne kaisung manei aha. Ampefe medu deyo, "Nina mani yau ambori ifiai Yahwei." Nanai wedaya Dohong kaisungfoi wonong fino Yehudai. Na minohituti Yehudai kawuruampo wiro nearikang ahang kahaia.