1 Na kutu Yakupi taraoai, weo na Mesiri mani etawayang potang, ampefe medu we ne arikang fosa deyo, "We fianie meminohi mewati wawera meuremi ne?" 2 Medu aha deyo, "Itarahuoai kawuru ampa, weo na Mesiri mani etawayang potang. Mera to wanaia mewori potang na wanai we tata, ambori wiro tawawisia tamarareha kaha."✝

3 Mayeai Yusupi ne tafuai ewesura fosa era to Mesiria we ewori potang. 4 Wape Yakupi wiro yoa we Benyamini, Yusupi ne tahatuifoi da ria ne tafuaisa kaha. Weo enetituaitai, dohonao i ambori sodai neo karirafo ahangfe. 5 Ampefe na inontarai mano era wa ewori potangfo mani, Yakupi mano ahui we Israeli foi ne arikang ewesura fosa era kontai, weo kaharifoi miung nu Kanani fefe.

6 Na rabuang bonani mani, Yusupi weinontarai fuba na nu Mesiri foi kawurua, andino dewayang potang we inontarai na nunei sentenang ne. Ampefe Yusupi ne tafuaisa era wa esomi wei awao euremi disangso kahofa wau. 7 Yusupi deti ne tafuaisa nanai deroangsosara. Wape niari anggari we i mani inontarai aisei dine. Na tapapa dutangsa deyo, "Mera na doni ma?" Eroa wei eteyo, "Amea mani inontarai Kanani di amea. Amera ma we amewori fiang ria wau." 8 Yusupi deroangno ne tafuaisa, wape wiro etaroangni kaha.

9 Mayeai Yusupi aro ne amiei kariri eafo. Yusupi medu wesa deyo, "Mea mani inontaraio meuremi boa dimea. Merama we mewati kariri nu nini inontarai manea ewaitawangni ete bererie?"✝ 10 Wape eroa wei eteyo, "Daie bereri! Amea mani nemu mangfata mano manta amera ma we amewori fiang. 11 Amea mani amene dai mansiari, amea mani inontarai beng di amea, wiro inontarai ameuremi boa di amea kaha." 12 Wape Yusupi medu wesa deyo, "Bereri! Mea mani mera ma we mewati kariri nu nini inontarai manea ewaitawangni ete bererie." 13 Mayeai eroa wei eteyo, "Amea mani amewe suraya mandu (12) amewe mambetahatui, na fino amene dai mansiari na nu Kanani foi. Wape mano fuifi minohi ria amene dai fo, tuti manei mireha ampa."

14 Ainanaya Yusupi medu wesa deyo, "Bento! Toyari neo antanafa imadurai kawurua we mea nanai, mea mani inontarai meuremi boa dimea. 15 Na kaiwo memadurai ninai, todoni kontaio ye ititua kariri mea. Na mananu Firauni wonongne, wiro mera weru katai nini kaha, masino mene tahatuifoi wiro da ma kaha. 16 Metami manei na mea daraberahia kia mene tahatuifoi ma. Wape mano weine mea mani irutawang mea na ninai we ititua kariri kaiwo memadurane wetaraie. Masino wiro wetarai kaha mani, na mananu Firauni wonongne, mea mani inontarai meuremi boa dimea." 17 Mayeai esoasa to aitamu rorongfoa ewatai nai rahida botoru.

18 Na rahida bo botorufoi Yusupi medu wesa deyo, "Yau mani inontarai mano isomi we Allai tuti iroasoi, ampefe menari toninaifa ambori metarang. 19 Masino mea mani inontaraio menemirorong mesi di mea mani, manei na mea irutawangni na munu aitamu rorongne. Wape mano weine mea mani meha potangne mera we mene munurorongfoa weo ewawisi fefe. 20 Mene tahatui fuifoi, todoni kontaio mehari we yau ma, ambori kaiwo memadurane wetarai tuti memarareha kaha." Ampefe eroa we kaiwo Yusupi medurafo. 21 Emadu wawerasa eteyo, "Antu paria arahi tasodai dadira finina, weo raminde tanari sarawai we tane tahatuinei. I sahu we tata we taaromioi, wape wiro tataramio sahufo kaha. Nanai wedaya tasobu dadirafe nina." 22 Ainanaya Rubeni medu wesa deyo, "Raminde imadurai we mea yeyo, wiro menari karira we tane tahatuinei fanai! Wape wiro metaramio kaiwo imadurane kaha. Ampefe nina mani ne rikanei su tata finina."✝ 23 Wape eserawawerahai, weo Yusupi deitawang kaiwo emadurafo. Ampefe emadu we Yusupi mani, inontarai mano deitawang ene kaiwofoi andino yiwang kaiwo emadurafo we Yusupi ahane. 24 Ampefe Yusupi da werusa, tuti saia. Mayeai daraberahi wesa aha tuti meduriasa. Ainanaya kia Simeoni werusa tuti demi ne inontarai fosa ewora warangfo na ne tafuai euremifo. 25 Mayeaia mani Yusupi demi inontarai mano erufi fosa, esoni potangfo na ne tafuai ene karungfo, tuti ene doifo etohong berahai aha esoniai na mansiari-mansiari ne karungfo. Kontaio demisa, emainenang fiang wesa na ene rang rorongfo. Inontarai mano erufi fosa enari kariri fianai aino Yusupi demisa weafo. 26 Ainanaya eruai potangfo to ene keledaifo, mayeai era wa nina.

27 Na katai ete etena nayafo mani, manei nasa sefa ne karungfoi we dohong ne keledaifoi dampi, na tantuma detio ne doifo watai sau potangfo na karung rorongfo. 28 Medu we ne doroifosa deyo, "Nehu doife tawera aha ma nina, mewati nayai na karung rorongfe nina!" Ampefe earomikuayai tuti ematai, tuti ewati wawerasa, mae emadu eteyo, "Fianai aino Allai niari we tata ninai?"

29 Na kutu erawa esobu etamami Yakupi na nu Kanani foi, eteisaha kariri fianai aino esodairafo. Emadu eteyo, 30 "Inontarai mano wenunggamiei na nu Mesiri foi, sua amea na tapapa paria tuti dinggai amea we inontarai ameuremi boa diamea. 31 Wape amemadu wei ameteyo, ‘Amea mani inontarai beng diamea, wiro inontarai ameuremi boa diamea kaha. 32 Amea mani mambetahatui suraya mandu (12) amene dai mansiari. Manei na amea mireha ampa tuti amene tahatui mano fuifoi niayai ria amene dai na kahofa Kanani fo.’ 33 Ainanaya inontarai mano wenunggamiei we nu Mesirifoi medu we amea deyo, Na fio memadurai ninai, yeo ititua kariri mea, antue inontarai beng dimea ete bererie? Ampefe todoni kontaio manei na mea niayai na nina. Wape mano weine mea mani, meha potangne merawe mene munurorongfoa weo ewawisi fefe. 34 Wape metarabera mea mani, meha mene tahatui fuiwai we yau ma. Ambori yeitawanaifa weo mea mani wiro inontaraio meuremi boa kaha, wape inontarai beng dimea, tuti ambori yohong mene tahatuinei tiwera we mea aha, tuti ambori mewori fi tuti metawayang fi na nu Mesiri nini, wiro inontarai manei sua mea kaha."

35 Na kutu efai karungfo tuti etitaifo, na tantuma ewati aderi esoni doi nayafo nayai na ene karung rorongfo, ampefe ea tuti ene dai ewati aderi doifo nanai ematai paria. 36 Ampefe etamami Yakupi medu wesa deyo, "Mewedaya isera we nehu arikang ne sitoru. Yusupi mireha ampa, Simeoni daraberahi kaha, tuti meteyo meha Benyamini kontai aha, yau isodai dadira marabane paria!"

37 Mayeai Rubeni medu we tamanai deyo, "Daie, bohong Benyamini we yauma, yau ambori ikari tiwera we wau ahama. Masino bereri mani, dai mung nehu arikang mangne suru."

38 Wape Yakupi medu we Rubeni deyo, "Bereri! Benyamini wiro daria mea kaha. Weo ne tafuai mireha ampa tuti manta andino niayai terane. Masino sobu dadira na rang rorong mera nai neife, dohonao mewedaya paituang nini yau ambori ibia to raimerife, weo enehurorongnei fituayai fefe."